Lesa Jizhina Janji Ñanyi? Lesa aye mwine waamba’mba: “Amiwa yami Yehoba. Jino jo jizhina jami.” (Isaya 42:8) Mu Baibolo, jizhina ja Lesa jitanwamo bimye 7,000. Nangwa byonkabyo, mu Mabaibolo avula baingijisha jizhina ja mushingi nabiji ja kuba’mba “Nkambo.” Lesa ukeba’mba mwikale balunda nanji. Onkao mambo, wimutundaika ‘kwita pa jizhina janji.’—Salamo 105:1.

Mazhina a Mushingi a Yehoba. Baibolo utela Yehoba na mazhina a mushingi nabiji a kuba’mba, “Lesa,” “Wa Bulume Bonse,” “Mulenga,” “Tata,” “Nkambo,” ne “Mfumu.” Milombelo yavula yo banemba mu Baibolo, Yehoba bamutela na mazhina a mushingi ne jizhina janji ja kuba’mba Yehoba.—Danyela 9:4.

 Lesa byo Aji. Lesa mupashi, kechi umweka ne. (Yoano 4:24) Kabiji Baibolo waamba’mba “kafwako muntu wamonapo kala Lesa ne.” (Yoano 1:18) Baibolo waamba pe Lesa byo omvwa pa bintu. Bantu bakonsha kumukozha ku muchima nangwa ‘kumutokesha ku muchima.’—Byambo bya Maana 11:20; Salamo 78:40, 41.

Byubilo Byawama Biji na Lesa. Lesa kechi uji na misalululo ne. Watemwa bantu ba mu bisaka byonse. (Byubilo 10:34, 35) Kabiji uji na “lusa ne kifyele, ubanda kuzhingila, wavula butemwe bubula kwaluka ne bukine.” (Kulupuka 34:6, 7) Nangwa byonkabyo, Lesa uji na byubilo bina bikatampe.

Bulume. Na mambo a kuba’mba “Lesa wa Bulume Bonse,” wakonsha kufikizha byonse byo alaya.—Ntendekelo 17:1.

Maana. Kafwako muntu uji na maana nobe Lesa ne. O ene mambo Baibolo o aambila’mba ye “yenkatu uji na maana.”—Loma 16:27.

Bololoke. Kimye kyonse Lesa uba byaoloka. Mingilo yanji “yalumbuluka,” kabiji kechi ‘uba byatama’ ne.—Mpitulukilo ya mu Mizhilo 32:4.

Butemwe. Baibolo waamba’mba “Lesa butemwe.” (1 Yoano 4:8) Lesa kechi umweshatu butemwe ne. Aye ye butemwe. Butemwe bo bumulengela kuba bintu, kabiji tumwenamo mu mashinda avula bingi.

Bantu Bakonsha Kwikala Balunda ne Lesa. Lesa ke Shetu wa mwiulu wa butemwe. (Mateo 6:9) Inge twamwitwabila, twakonsha kwikala balunda nanji. (Salamo 25:14) Kabiji Lesa witubuula kufwenya kwipi ne aye mu lulombelo ne ‘kutaya bijikila byetu pe aye, mambo wituta muchima.’—1 Petelo 5:7; Yakoba 4:8.

Yesu Kechi Lesa ne. Yesu wapusanako bingi mambo Lesa aye mwine ye wamulengele. O ene mambo Baibolo o imutelela’mba Mwana Lesa. (Yoano 1:14) Byo alengele Yesu, Yehoba waingijishe uno mwananji mubeji kwikala “sendwe” pa kulenga bintu byonse.—Byambo bya Maana 8:30, 31; Kolose 1:15, 16.

 Yesu kechi waambilepo’mba waesakana pamo ne Lesa ne. Waambile’mba: “Yami namwimenako, ne aye ye wantuma.” (Yoano 7:29) Byo aambilenga na mwananji wa bwanga umo, Yesu watelele Yehoba amba “Batata kabiji Bashenu” ne kuba’mba “Lesa wami kabiji Lesa wenu.” (Yoano 20:17) Yesu byo afwile, Yehoba wamusangwile ne kuya mwiulu kabiji bamutumbijikijile ku kuboko kwa kilujo kya Lesa.—Mateo 28:18; Byubilo 2:32, 33.

Yesu Kilishitu Wakonsha Kwimukwasha Kufwenya Kwipi ne Lesa

Yesu waishile pano pa ntanda na kwitufunjisha bukine pe Shanji. Yehoba aye mwine waambile pe Yesu amba: “Uno ye Mwanami, ye natemwa. Mumvwinai.” (Mako 9:7) Yesu ye wayuka bulongo Lesa kukila muntu uji yense. Waambile’mba: “Kafwako wayuka Batata ne, poso yenka Mwana ne yense Mwana ye akeba kumusolwelabo.”—Luka 10:22.

Yesu umwesha byubilo bya Lesa. Yesu wamweshanga byubilo bya Shanji. O ene mambo o aambijile’mba: “Awa wammona, wamona ne Batata.” (Yoano 14:9) Yesu wakwashishe bantu kufwenya kwipi ne Lesa mambo wamweshanga butemwe bwa Shanji mu byambo ne mu byubilo. Yesu waambile’mba: “Amiwa yami jishinda ne bukine ne bumi. Kafwako wiya kwi Batata ne, poso wapichila mwi amiwa.” (Yoano 14:6) Kabiji waambile’mba: ‘Bapopweshi ba kine bakapopwelanga Batata na mupashi ne na bukine, mambo Batata babena kukeba bantu ba uno mutundu kwibapopwela.’ (Yoano 4:23) Akilangulukai pa kino! Yehoba ubena kukeba bantu baji nobe anweba kuyuka bukine pe aye.