Pa myaka yavula yapitapo, kafwako wayukile mukumbu wa buno bwipuzho ne. Kabiji myalo ne bikola byaipayile bantu bavula bingi. Byo papichile kimye, basayansi bataaine kilengela bikola. Balumbulwile’mba kuji twishi tuleta bikola. Kuyuka bino kwalengela bantu kuzhikijilwa ku bikola byavula bingi, kabiji kino kyalengela bantu bavula kwikala na butuntulula bwa mubiji bwawama ne kubula kufwa bukiji.

Nanchi mwalanguluka’mba kuyuka mikumbu ya ano mepuzho alondelapo kwakonsha kwimukwasha mu bwikalo bwenu nyi?

• Lesa ye Ñanyi?

• Yesu Kilishitu ye Ñanyi?

• Bufumu bwa Lesa bo bu ka?

• Ñanyi bintu bikamweka kulutwe na lwendo?

Bantu bavula mwaya ntanda bataana mikumbu ya ano mepuzho anema kabiji kibalengela kwikala na lusekelo mu bwikalo bwabo. Ne anweba mwakonsha kwikala na lusekelo inge mwayuka mikumbu ya ano mepuzho.

Mwakonsha kwishikisha’mba, ‘Nanchi kyakonsheka kuyuka bukine pa bintu nyi?’ Ine, mambo kyakatazha kutaana bukine pa bintu byo mubena kukeba kuyuka. Mambo ka?

Bantu bavula kechi baketekela makafulumende, bantu boba busulu, nangwa byambo bya pa mwela ne bamba masawakya kwibabuula bya kine ne. Bantu kibakatazha bingi kuyuka inge babena kwibabuula bya kine nangwa ne. Na mambo a kuba’mba bantu mu ino ntanda batemwa kubepa bakwabo kabiji kechi beketekela ne, kino kibalengela kubula kuswa byo bebabuula.

Nangwa byonkabyo, mwakonsha kuyuka mikumbu ya mepuzho anema. Mwakonsha kuba byepi bino? Inge mwauba byonka byo muba pa kuyuka bishinka pa bintu bimo.

Pa juba pa juba, mukeba bishinka pa bintu bimo. Akilangulukai pa byaubile ba Jessica. Baambile’mba: “Mwanami wa mukazhi ukolwa bingi inge waja nyimu. Nangwatu inge wajapotu tucheche, ukolwa bingi.” Onkao mambo, ba Jessica bamona kuba’mba kajo ko babena kupota kechi kasakulengela mwanabo kukolwa ne. Kabiji baambile’mba: “Kintu kitanshi kyo nguba saka nkyangye kupota kajo ke kutanga byambo bijipo pa kuba’mba ngyuke biji mu kajo ko nkeba kupota. Kabiji nkebakeba bishinka ne kwipuzha kampanyi kalenga kano kajo pa kuba’mba bambule inge kechi babikilemo nyimu pa kwikanengezha ne. Kabiji ngipuzha ne bantu bakwabo kumbula pa uno kampanyi byo alenga kajo.”

Kampe mashinda o mwingijisha pa kukeba bishinka apusanako na engijisha ba Jessica, pano bino mwakonsha kuba byonka byo boba pa kuba’mba muyuke mikumbu ya mepuzho o muji nao.

• Yukai bishinka.

• Kebakebai bishinka.

• Ipuzha bantu bakonsha kwimubuula bya kine.

Mwakonsha kwingijisha jishinda jintutu jimo pa kutaana mikumbu ya mepuzho anema bingi. Mu ñanyi jishinda?

Ba Jessica byo bakebelenga bukine bwa mu Baibolo, baubile byonka byo boba pa kukeba kuyuka kajo kakonsha kulengela mwanabo kubula kukolwa. Baambile’mba: “Kutanga ne kukeba bishinka kwankwashishe kutaana bukine bwa mu Baibolo.” Byonkatu byaubile ba Jessica, bantu bavula bayuka byaamba Baibolo pa ano mepuzho:

• Mambo ka o twaikelako?

• Ñanyi kintu kimweka inge muntu wafwa?

• Mambo ka buyanji o bwavujila bibye?

• Lesa ukoba byepi pa kupwisha buyanji?

• Twakonsha kwikala byepi na lusekelo mu kisemi?

Mwakonsha kutaana mikumbu ya kine ya ano mepuzho inge ke mutange Baibolo ne kukebakeba bishinka pa www.pr418.com/kqn.