Byamba Bantu pa Kulomba kwi Lesa
MARÍA waambile’mba: “Inge mbena kupita mu makatazho nalomba, ñumvwa’mba Lesa nji nanji, wankwata ku kuboko kabiji ubena kuntangijila.”
RAÚL waambile’mba: “Mukazhami wafwile na kansa kabiji waikele na kino kikola myaka 13. Nalombanga kwi Lesa moba onse, mambo nayukile’mba Lesa wayuka byo mbena kupitamo. Akino kyankwashishe kwikala na mutende wa mu milanguluko.”
ARNE waambile’mba: “Kulomba ke bupe bwawama bingi bwitupa Lesa.”
Abano bonse basatu ba María, Raúl, Arne ne bantu bakwabo bayuka’mba kulomba ke bupe bwanema bingi. Bamba’mba besamba ne Lesa mu milombelo, kumusanchila ne kulomba’mba ebakwashe. Baswa na muchima yense byaamba Baibolo pa kulomba kwi Lesa kuba’mba: “Luno lo luketekelo lo tuji nalo mwi aye amba kintu kyonse kyo twakonsha kumulomba mwayila kyaswa muchima wanji, aye witumvwa.”—1 Yoano 5:14.
Kabiji bantu bavula kechi baswa byaamba Binembelo pa mambo a kulomba kwi Lesa ne. Ba Steve balumbulwile byo baumvwine ku muchima pa kulomba kwi Lesa. Baambile’mba: “Byo nafikizhe myaka 17, balunda nami basatu, wa mulume umo ne babakazhi babiji, umo wafwile mu mapuso a pa mukwakwa kabiji bakwabo babiji bafwijile pa kalunga ka mema.” Ñanyi kintu kyaubile ba Steve? Baambile’mba: “Nalombele kwi Lesa kuba’mba ngyuke kyalengela balunda nami kufwa, pano bino kechi wankumbwile ne. Neipwizhe’mba, ‘Mambo ka o mbena kulombela kwi Lesa?” Bantu bavula balanguluka’mba Lesa kechi ukumbula milombelo yabo ne. Kabiji kino kibalengela kulanguluka’mba kulomba kwi Lesa kutayatu kimye.
Kuji bintu bikwabo bilengela bantu kulanguluka’mba milombelo kechi ibakwasha ne. Bamo bamba’mba Lesa wayuka bintu byonse, ko kuba’mba wayuka bintu byo tukeba ne makatazho onse o tubena kupitamo. Onkao mambo, kechi kyailamo kumubuula bintu byo ayukila jimo ne.
Bakwabo nabo bamba’mba Lesa kechi wakonsha kumvwa milombelo yabo ne, mambo balengelepo mambo. Ba Jenny baambile’mba: “Lukatazho lukatampe lo nji nalo ke lwa kulaguluka’mba kechi nanema ne. Naubile bintu bindengela kwizhachisha kabiji ndanguluka’mba nangwatu ndombe kwi Lesa kechi wakonsha kumvwa milombelo yami ne.”
Nga anweba mulangulukapo amba pa kulomba kwi Lesa? Inge ne anweba mwapitamo mu bintu byo twaambapo, yukai’mba Baibolo wakonsha kwimukwasha. Twafwainwa kuswa byaamba Baibolo pa kulomba * kwi Lesa, kabiji wakonsha kwimukwasha kutaana mikumbu ya ano mepuzho:
-
Nanchi kine Lesa umvwa milombelo yetu nyi?
-
Mambo ka Lesa o abujila kukumbwila milombelo ya bantu bamo?
-
Mwakonsha kuba byepi pa kuba’mba Lesa omvwe milombelo yenu?
-
Mwakonsha kumwenamo byepi inge mwalomba?
^ jifu. 9 Mu Baibolo muji milombelo yalombele bakalume ba Lesa bajingako kala ne yalombele Yesu Kilishitu. Mu Binembelo bya Kihebelu, bavula byo batela’mba Lulayañano lwa Kala muji milombelo 150.
Mwakonsha Kutemwa
BANYIKE BEPUZHA’MBA
Mambo ka o nafwainwa kulombela?
Nanchi kulomba kwaikalatu nobe muchi utontololako misongo nyi, inyi kuji bintu bikwabo byavwangiwamo?
KYAMBA KYA USOPA
Nanchi Mwafwainwa Kulomba Nyi?
Lesa wakonsha kukumbula milombelo kwakubula kumwesha byakukumya.
