“Anweba mumvwa milombelo, bantu ba mitundu yonse bakeya kwi anweba.”—Salamo 65:2.

Bantu bamo balomba kwi Lesa mambo balanguluka’mba popo bomvwako bulongo ku muchima nangwa kya kuba bayuka’mba kafwako ubena kwibateleka ne. Bino kechi tulombatu kwi Lesa kuba’mba tukasuluke mu milanguluko pa kuba’mba tuyuke bya kuchinchika makatazho o tubena kupitamo ne. Baibolo witubuula’mba “Yehoba * uji kwipi na bonse bamwita, ku bonse bamwita mu bukine. . . . Aye umvwa kujila kwabo kwa kukeba bukwasho.”—Salamo 145:18, 19.

Atweba twafwainwa kushiinwa kuba’mba Yehoba Lesa umvwa milombelo ya bapopweshi banji. Lesa mwine waamba bino amba: “Anweba mukangita ne kwiya kwi amiwa ne kulomba kwi amiwa, kabiji amiwa nkemumvwa.”—Yelemiya 29:12.

“Lombainga na mukoyo.”—Loma 12:12.

Betutundaika mu Baibolo “kutwajijila na kulomba” ne “kulomba kimye kyonse . . . mwayila mupashi.” Abye byambo byamwesha’mba Yehoba Lesa ukeba atweba kulombanga kwi aye.—Mateo 26:41; Efisesa 6:18.

Mambo ka Lesa o akebela atweba kulomba kwi aye? Langulukai pa kino: Nsemi utemwa bingi inge mwananji wamwambila’mba tata nkwashaiko. Kwambatu kine, nsemi uyukila jimo bintu bibena kukeba mwana, pano bino inge waumvwa mwananji na kumwambila’mba tata nkwashai, kimwesha’mba uno mwana waketekela shanji kabiji wamukasulukila bingi. Kyo kimotu, inge twalomba kwi Lesa, tumwesha’mba twamuketekela kabiji tukeba kufwenya kwipi ne aye.—Byambo bya Maana 15:8; Yakoba 4:8.

“Saka mutaya bijikila byenu byonse pe aye, mambo wimuta muchima.”—1 Petelo 5:7.

Lesa ukeba’mba tulombenga kwi aye, mambo witutemwa kabiji wituta muchima. Lesa wayuka makatazho etu onse ne bijikila byo tuji nabyo kabiji ukeba bingi kwitukwasha.

Mu bwikalo bwanji bonsetu, Mfumu Davida walombanga kwi Yehoba kuba’mba amukwashe kabiji wamubuulanga byonsetu byamukatazhanga ku muchima. (Salamo 23:1-6) Lesa wamonanga byepi Davida? Lesa wamutemenwe bingi Davida kabiji wakumbulanga milombelo yanji. (Byubilo 13:22) Byobyo oba ne kwi atweba, Lesa umvwa milombelo yetu mambo wituta muchima.

Nyimbo wa masalamo ye wanembele bino byambo. Wayukile’mba Lesa umvwa milombelo yanji, kabiji kino kyamukwashishe bingi. Wajinga na bulunda bwakosa ne Lesa kabiji waikele na bulume bwa kuchinchika makatazho o apichilengamo ne bulanda bo ajinga nabo.—Salamo 116:1-9.

Inge twashiinwa’mba Lesa umvwa milombelo yetu, kiketukwasha kulombanga kwi aye kimye kyonse. Monai byapichilemo Pedro wikala mu Northern Spain. Wafwishishe mwananji wa mulume wajinga na myaka 19 mu mapuso a pa mukwakwa. Nangwa wajinga na bulanda, Pedro wabuujile Lesa byonse ne kutwajijila kulomba kuba’mba amutekeneshe ne kumukwasha. Ñanyi kintu kyafuminemo? Pedro waambile’mba: “Yehoba wakumbwile milombelo yetu na mukazhami mambo balongo ne banyenga betutekeneshe ne kwitukwasha bingi.”

Nangwa kya kuba milombelo yabo kechi yasangwile mwanabo ne, bino milombelo yakwashishe Pedro ne kisemi kyanji kuchinchika. Mukazhanji aye María Carmen waambile’mba: “Kulomba kwankwashishe kuchinchika bulanda bo najinga nabo. Nayukile’mba Yehoba Lesa wayuka byo mbena kupitamo mambo byo nalombanga nakasulukanga bingi ne kwikala na mutende wa mu milanguluko.”

Baibolo ne bintu byapitamo bavula mu bwikalo bwabo bimwesha’mba Lesa ukumbula milombelo. Pano bino, akino kechi kibena kulumbulula’mba Lesa ukumbula milombelo ya bantu bonsetu ne. Mambo ka Lesa o abujila kukumbwila milombelo ya bantu bamo?