BYA KUPWISHA LUPATO
1 | Kwikala na Misalululo Ne
Lufunjisho lwa mu Baibolo:
“Lesa kechi uji na misalululo ne, bino mu bisaka byonse muntu umwakamwa ne kuba byaoloka ye witabilwa kwi aye.”—BYUBILO 10:34, 35.
Byo Kilumbulula:
Yehoba * Lesa kechi utala pa kyalo kyetu, mutundu, kikoba, nangwa kisho ne. Pakuba umona byo tuji mukachi. Kya kine, “muntu umonatu pangye ya mubiji, pakuba Yehoba utala mu muchima.” —1 Samwela 16:7.
Byo Mwakonsha Kuba:
Nangwa kya kuba kechi tumona mu michima ya bantu ne, pano bino, twakonsha kulondela byuba Lesa ne kubula kwikala na misalululo. Ibikaingako kumona byubilo biji na muntu umo umo. Inge mwamona kuba’mba mwatendeka kwikala na milanguluko yatama pa bantu bamo, kampe na mambo a kikoba nangwa kyalo ko bafuma, lombai kwi Lesa kuba’mba emukwashe kuleka ino milanguluko. (Salamo 139:23, 24) Inge mwalomba kufuma panshi ya muchima kwi Yehoba kuba’mba emukwashe kubula kwikala na misalululo, mwakonsha kushiinwa kuba’mba ukomvwa milombelo yenu ne kwimukwasha.—1 Petelo 3:12.
^ Yehoba jo jizhina ja Lesa.—Salamo 83:18.
“Kyo kyajinga kimye kitanshi kwikala pamo na muzungu mu mutende . . . Pano naikele mu kisemi kya balongo ne banyenga betemwa kya kine mwaya ntanda yonse.”—BA TITUS
Mwakonsha Kutemwa
LABAINGA!
Misalululo—Nanchi Muji na Kino Kyubilo Nyi?
Ñanyi bintu byo twafwainwa kuyukilako amba mu muchima wetu muji misalululo?
