Nangwa kya kuba Baibolo kechi buku wa bya michi ne, maana ajimo awama kabiji akwasha bantu. Ano maana akwasha muntu uji na kikola kya ku bongo. Akilangulukai pa byakumwenako bimo.

“Bantu batuntulu kechi bakeba shayuka wa michi ne, poso aba bakolwa.”—MATEO 9:12.

Baibolo kechi buku wa bya michi ne. Bino muji maana afwainwa kukwasha muntu.

“Mu kwikosesha kwa mubiji umwenamo.” —1 TIMOTI 4:8, Buku wa Lesa.

Kuba bintu bikosesha mubiji kwakonsha kwimukwasha kwikala na butuntulu bwa mubiji bwawama. Abino bintu byavwangamo kukosesha mubiji kimye kyonse, kuja kajo kawama ne kulaala kimye kyabaya.

“Muchima wa lusekelo ye muchi wawama, bino muchima wauba bulanda upwisha ngovu.”—BYAMBO BYA MAANA 17:22.

Kutanga mashimikila aji mu Baibolo ne kwibikila bikonkwanyi byawama byo twakonsha kufikizha kwitukwasha kwikala na lusekelo.  Kuta muchima pa bintu byawama bya mu bwikalo ne kuketekela’mba bintu bikawama kulutwe kukemukwasha kuchinchika makatazho a mu milanguluko.

“Maana aji na bepelula.”—BYAMBO BYA MAANA 11:2.

Inge mwataana’mba kechi mwakonsha kuba bintu byo mukeba kuba bunke bwenu ne, mwafwainwa kulomba bukwasho ku bakwenu. Kisemi kyenu ne balunda nenu bakonsha kukeba’mba bemukwashe, bino kechi bakonsha kuyuka mwakubila bino ne. Babuulai byo bafwainwa kwimukwasha. Kange muketekelenga’mba basakwimupa bintu byonse byo mukeba ne, bino mwafwainwa kwibasanchila pa bukwasho buji bonse bo bakonsha kwimupa.

“Byo nayukile’mba nakolwa, nayile ku kipatela na kumona badokotala. Bataine’mba nji na kikola. Kuya ku kipatela kwankwasha kuyuka kikola kyo nakolwa ne kuyuka muchi wafwainwa kunkwasha.”—Nicole, a uji na kikola kya bukonye.

“Nafunda’mba kutanga Baibolo kimye kyonse na bakazhi bami kunkwasha kwikala na milanguluko yawama. Bimye bimo inge nalefulwa, kyepelo kinkwasha.”—Peter, uji na kikola kya kupopomenwa.

“Naumvwanga bumvu kubuula bakwetu kikola kyo nji nakyo. Mulunda nami wa pa muchima uteleka inge mbena kwamba ne kuyuka byo mbena kupitamo. Kinetu unkwasha bingi, kabiji undengela kwiumvwa’mba kechi nji bunke ne.”—Ji-yoo, uji na kikola kya kukizhamo kuja nangwa kwiikazha na nzala.

“Baibolo wankwasha kwikalanga na kimye kya kulaala kyabaya ne kubula kukizhamo kwingila mingilo ya ku mubiji. Maana ajimo ankwasha kuyuka bya kuba na makatazho o mpitamo.”—Timothy, uji na kikola kya kukizhamo kwakamwa kitelwa’mba obsessive-compulsive disorder.