Bikola bya ku Bongo Byakumbanatu Ntanda Yonse
“Ngikala na bijikila nangwatu inge nji bunke bwami mu kibamba.”
“Inge naikala na lusekelo lukatampe, ngakamwa. Mambo javula inge naikala na lusekelo lukatampe byo papitatu kakimye kacheche, ñumvwa kutama ku muchima.”
“Ngeseka kutatu muchima pa bintu bya jojo juba. Bino bimye bimo ngikala ne na bijikila pa bintutu bikwabo.”
Abino byo bintu byaamba bantu baji na bikola bya ku bongo. Nanchi mwakipitapo mu makatazho a uno mutundu nyi? Abya nanchi kujipo muntu ye mwayuka wapichilemo nyi?
Yukai’mba kechi muji bunke ne. Bantu bavula bakolwa bikola bya ku bongo nangwa kampe balunda nabo bo bakolwa.
Kwakubula nangwa kuzhinaukatu ne, tubena kwikala “mu moba a kupelako” mwavula makatazho. (2 Timoti 3:1) Bashayuka bamo bataana kuba’mba pa bantu 8 pafwainwa kwikala muntu umo uji na kikola kya ku bongo. Na mambo a mwalo wa COVID-19, mu 2020 bantu bajinga na bijikila bavujijileko na mapesenti 26 kukila byo bajinga mu 2019, kabiji bajinga na binyenge bavujijileko na mapesenti 28 mu 2020 kukila byo bajinga mu 2019.
Kyamena kuyuka kibelengelo kya bantu baji na bijikila ne binyenge. Bino kyakilamo kunema ke kuyuka butuntulu bwa mubiji wenu ne bwa batemwe benu.
Butuntulu bwa ku bongo bo buka?
Muntu uji na butuntulu bwa ku bongo ulanguluka bulongo ne kuba bintu bulongo. Uyuka bya kuba na makatazho, umwena lusekelo mu mingilo yanji kabiji utondwa na bintu byo aji nabyo.
Kikola kya ku bongo . . .
-
Kechi kiya na mambo bintu bikankalwa kuba muntu ne.
-
Ke kikola kilengela muntu kwikala na makatazho avula mu milanguluko ne kuleka kulanguluka nangwa kuba bintu bulongo.
-
Kilengela muntu kukankalwa kwikala na balunda ne kuba bintu bikebewa bya mu bwikalo.
-
Kyakonsha kufikila bantu bonse, bakulumpe, banyike, banonshi, bayanji, bafunda masukulu a ku mubiji, ba bisho, mitundu nangwa bikoba byapusana pusana.
Bya kuba na bikola bya ku bongo
Inge muntu watendeka kulaala kimye kyabaya nangwa kicheche, kuja bingi nangwa kujatu pacheche, kwikala na bijikila nangwa kupopomenwa bingi, wafwainwa kukeba bukwasho. Pano wakonsha kutaana kwepi bukwasho?
Mwanamulume wa milangwe aye Yesu Kilishitu waambile’mba: “Bantu batuntulu kechi bakeba shayuka wa michi ne, poso aba bakolwa.” (Mateo 9:12) Bantu baji na makatazho kabiji babena kutambula bukwasho ku ba dokotala ne kutoma muchi, bafwainwa kwibikako pa kuba’mba bakepesheko makatazho abo ne kwikala bwikalo bwawama kabiji bwa lusekelo. Kechi bafwainwa kukankazhama kukeba bukwasho inge makatazho abaya ne. a
Nangwa kya kuba Baibolo kechi buku wa bya michi ne, maana ajimo awama kabiji akwasha bantu. Tubena kwimutundaika kutanganga bibaaba byaamba pa Baibolo byo afwainwa kwimukwasha kuyuka bya kuba na bikola bya ku bongo.
a Kyamba kya Usopa kechi kyatongolapo bukwasho bo bafwainwa kutambula ne. Bino muntu mwine ye wafwainwa kulangulukapo bulongo saka akyangye kufuukulapo.
Mwakonsha Kutemwa
ESSENTIAL BIBLE TEACHINGS
Mambo ka Lesa o Aswishisha Buyanji?
Bantu bavula bepuzha’mba mambo ka buyanji ne lupato o byavujila bibye mu ntanda? Mu Baibolo muji mukumbu wawama bingi.
BANYIKE BEPUZHA’MBA
Nakonsha Kuba Byepi na Bijikila?
Bishinka bitanu byakonsha kukukwasha kuyuka byakuba na bijikila.
LABAINGA!
Byo Mwafwainwa Kuyuka pa Bikola bya ku Bongo
Bintu 9 byakonsha kwimukwasha bya kuba na bikola bya ku bongo.
BAKAMONYI BA KWA YEHOBA
Lombai Lufunjisho lwa Baibolo
Ikalai na lufunjisho lwa Baibolo lwatutu pa kimye ne mpunzha yo mukeba.
