Nanchi Baibolo Waambapo’mba Ka?
Diabola ye ñanyi?
NANCHI MWAKONSHA KWAMBA’MBA Diabola . . .
Kilengwa kya mupashi nyi?
Nanchi bubi buji mukachi ka muntu nyi?
Kintu kifwanyikizhatu bantu nyi?
BYAMBA BAIBOLO
Diabola wisambilenga ne Yesu ne “kumweseka.” (Mateo 4:1-4) Onkao mambo, Diabola kechi kintu kifwanyikizhatu bantu nangwa bubi buji mukachi ka muntu ne. Ke kilengwa kya mupashi kyatama.
ÑANYI BINTU BIKWABO BYO TWAKONSHA KUFUNDA MU BAIBOLO?
Diabola wajinga malaika wazhila wa Lesa, bino “kechi watwajijile kwikala mu bukine ne.” (Yoano 8:44) Waikele wa bubela kabiji wasatukijile Lesa.
Bamalaika bakwabo balondejile bunsatuki bwa kwa Satana.—Lumwekesho 12:9.
Diabola upofula michima ya bantu pa kuba’mba babule kuyuka’mba ko aji.—2 Kolinda 4:4.
Nanchi Diabola wakonsha kutangijila bantu nyi?
BANTU BAMO BAMBA’MBA Diabola kechi wakonsha kutangijila bantu ne, pakuba bakwabo bachina kwibatangijila ku mipashi yatama. Nga anweba mulangulukapo amba ka?
BYAMBA BAIBOLO
“Pano pa ntanda ponse paji mu bulume bwa kwa aye mubi.” (1 Yoano 5:19) Diabola utangijila bantu, pano bino, kechi utangijila bonse ne.
ÑANYI BINTU BIKWABO BYO TWAKONSHA KUFUNDA MU BAIBOLO?
Diabola wingijisha bubela pa kujimbaika bantu.—2 Kolinda 11:14.
Mipashi yatama yakonsha kutangijila bantu.—Mateo 12:22.
Lesa wakonsha kwimukwasha ‘kukana Diabola.’—Yakoba 4:7.
Mwakonsha Kutemwa
MEPUZHO A MU BAIBOLO A KUMBULWA
Nanchi Diabola Kine Muntu Nyi?
Nanchi Diabola bubi buji mu bantu nyi, inyi muntu?
