KAKUSONGELAKO mapezulu ko bapele Jordan kaji nobe bwato, kamwekelenga nobe kechi kanema ne. Bino nangwa byonkabyo, buno bupe bwanemene bingi. Jordan waambile’mba: “Ba Russell bajinga balunda nami bo bampele buno bupe saka nkijitu mwanyike.” Byo bafwile, Jordan popo ayukile mwingilo wanema waingijile ba Russell pa kukwasha bankambo yanji ne bansemi banji kimye bintu kyo byakatezhe. Jordan waambile’mba: “Luno nayuka buneme bwa bupe bwampele ba Russell. Nangwa bwamwekelenga nobe kechi bwanema ne, bino bwanemene bingi kukila bupe bonse.”

Byonka byaambile Jordan, bantu bamo kechi bayuka buneme bwa bupe ne. Bino muntu usanta, unemeka bingi bupe bo bamupa. Baibolo waambapo pa bupe bwakilamo kunema amba: “Mambo Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.”—Yoano 3:16.

Buno bupe bwakonsha kulengela muntu wibutambula kwikala na bumi bwa myaka ne myaka. Nanchi kujipo bupe bwanema kukila buno nyi? Bamo kechi bakonsha kumona buneme bwa buno bupe ne. Bino bena Kilishitu bakine banemeka bingi buno bupe mambo bwa “mutengo.” (Salamo 49:8; 1 Petelo 1:18, 19) Mambo ka Lesa o apainyijile Mwananji kuba’mba afwile bantu bonse?

Mutumwa Paulo walumbulwile kyalengejile’mba: “Byonkatu bundengamambo byo bwatwelele pano pa ntanda mu muntu umo, ne lufu nalo lwaishijile mu bundengamambo, byonkabyo lufu lwakumbene ku bantu bonse.” (Loma 5:12) Mwanamulume mutanshi aye Adama wafwile mambo waubijilemotu mambo kyanshiji byo afuukwilepo kubuula kukookela  Lesa. Lufu lwaishile ku bantu bonse bekala pano pa ntanda mambo Adama wasatukijile Lesa.

“Mfweto ya bundengamambo lo lufu, pa kuba bupe bo apana Lesa ke bumi bwa myaka ne myaka kupichila mwi Kilishitu Yesu Nkambo yetu.” (Loma 6:23) Lesa watumine Mwananji aye Yesu Kilishitu pano pa ntanda na kupana kitapisho kya bumi bwanji bwalumbuluka pa kuba’mba bantu bakaleke kufwa. Na mambo a kino kitapisho kya “bukuzhi,” bonse baitabila mwi Yesu bakekala na bumi bwa myaka ne myaka.—Loma 3:24.

Paulo waambile pa mapesho Lesa o akapa bapopweshi banji kupichila mwi Yesu Kilishitu amba: “Tusanchila Lesa na mambo a kya bupe kyanji kya kukankalwa ne mwa kwikilumbulwila.” (2 Kolinda 9:15) Bukuzhi ke bupe bwanema bingi bo twakonsha kukankalwa kulumbulula. Mambo ka bukuzhi o bwanemena pa bya bupe byonse Lesa byo apa bantu? Buno bupe bwapusana byepi na bintu bikwabo bitupa Lesa? * Kabiji twakonsha kumonanga byepi buno bupe? Twimutundaika kutanga mikumbu ya ano mepuzho mu bibaba bibiji byalondelapo.