Inge muntu ye banemeka bingi ku bantu nangwa ye twatemwa witupa bupe, twibunemeka bingi. Bupe bukwabo bunema inge bwafuma ku wa mu kisemi nangwa mulunda netu ye twatemwa bingi. Buno bupe bunema nangwa kechi batayilepo mali avula ne. Byo byajinga ne bupe ba Russell bo bapele Jordan bo twaambapo ku ntendekelo. Pano buno bupe bwakwatankana byepi na bupe bwa Lesa bwa bukuzhi?

Kitanshi, Baibolo waamba’mba, “Lesa watumine Mwananji yenkawa umotu pano pa ntanda pa kuba’mba tukekale na bumi kupichila mwi aye.” (1 Yoano 4:9) Kino kyo kyalengela buno bupe bwa bukuzhi kunema bingi. Kafwako muntu uji na bulume nobe Lesa ne. Nyimbi wa masalamo waambile pe Lesa amba: “Anweba, yenka wa jizhina ja Yehoba, yenu bunketu Mwine Wakila pano pa ntanda ponse.” (Salamo 83:18) Kafwako muntu mukwabo wakonsha kupana buno bupe ne.

Kya bubiji, Lesa ye “Shetu.” (Isaya 63:16) Mu ñanyi jishinda? Mambo ye witupa bumi. Kabiji byonkatu nsemi byo alama baana banji, Lesa naye byobyo etulama. Lesa waambijile bena Efelaimu amba: “Nanchi Efelaimu kechi mwanami ye natemwisha nenyi? . . . Kechi namuvulama ne. O ene mambo muchima wami o alukuchila munda na mambo a aye.” (Yelemiya 31:20) Ne ano moba, Lesa kechi uvulama bapopweshi banji ne. Lesa ye Mulenga Wetu bwa bulume bonse, Shetu wakishinka kabiji Mulunda netu. Kuyuka bino kwitulengela kuyuka’mba bupe bwanji bwanema bingi.

Kupana na muchima yense, kulengela bupe kunema. Mpanyi kechi uketekela kumubila byawama pa byo auba ne.

Butemwe bwalengejile Lesa kwitupa mwananji. Baibolo waamba’mba: “Monka muno mo mwamwekela butemwe bwa Lesa kwi atweba, kuba’mba Lesa watumine Mwananji yenkawa umotu.” Mambo ka o aubijile bino? Kino kinembelo kyanungapo “kuba’mba tukekale na bumi kupichila mwi aye.” (1 Yoano 4:9) Nanchi Lesa wafwainwetu kupana buno bupe nyi? Ine. Baibolo waamba’mba: “Bukuzhi bwapaine Kilishitu Yesu,” bumwesha butemwe bwa Lesa ne “lusa lwanji lukatampe.”—Loma 3:24.

Mambo ka buno bupe o bwaikela ‘lusa lukatampe’ lwa Lesa? Baibolo waamba’mba: “Bino Lesa witumwesha butemwe bwanji, mambo byo twakijinga bandengamambo, Kilishitu witufwijile.” (Loma 5:8) Butemwe bo bwalengejile Lesa kukwasha bantu bandengamambo. Buno butemwe kechi bwitufwainyijilwe ne, kabiji kafwako kyo twakonsha kumubila pa butemwe bwanji ne. Bupe bo apaine bumweshe byo atemwa bantu.

Bupe bumo bunema bingi inge twalanguluka byaubile muntu pa kuba’mba etupe buno bupe. Inge muntu wipana mwine na muchima yense kwitupa kintu kyo anemeka, kino kitulengela kunemeka bupe bo etupa na mambo a bintu byo aubile.

Lesa “wapaine Mwananji yenkawa umotu.” (Yoano 3:16) Kafwako kilengwa kikwabo kyo afwainwe kwitupa kyakila pa mwananji ne. Pa myaka yavula, Lesa waingijilenga pamo ne Yesu byo alengelenga jiulu ne bintu byonse bijimo, kino kyamulengejile ku ‘mutemenwangakotu pa juba pa juba.’ (Byambo bya Maana 8:30) Yesu ye “Mwananji ye atemwa” kabiji ye “kipasha kya Lesa ubula kumweka.” (Kolose 1:13-15) Buno butemwe bwajinga pe Lesa ne Yesu kafwako wakonsha kwibulumbulula ne.

Nangwa kya kuba Lesa watemwa bingi Yesu, bino “kechi wakaine kupana Mwananji” ne. (Loma 8:32) Yehoba witupele kintu kyawamisha bingi. Pa bupe bonse Lesa bo etupa buno bo bupe bwakilamo kunema.

Bupe bumo bwanema bingi mambo bwitukwasha mu byo twakajilwa pa kimye kyafwainwa. Nanchi kechi mwakonsha kusanchila muntu wimupa mali o mwaji kukebanga pa kuba’mba bemubuke ku kipatela nenyi? Buno bupe mwakonsha kwibunemeka bingi.

Baibolo waamba’mba: “Byonkatu bantu bonse byo bafwa na mambo a kwa Adama, byonkabyo bonse bakasangulwa na mambo a Kilishitu.” (1 Kolinda 15:22) Byo tuji baana ba kwa Adama, bonse tufwa mambo kechi tuji na bulume bwa kushinda misongo ne lufu ne. Kabiji kechi twakonsha kupwana na Lesa ne kwikala babula mambo ne. Byo tuji bambulwa kulumbuluka, kechi twakonsha kwikala na bumi nangwa kukwasha muntu kwikala na bumi ne. Baibolo waamba’mba: “Kafwako nangwa umo mwi abo wakonsha kukuula mulongo wanji nangwa kupa Lesa bukuzhi bwa kumukuujilamo . . . Kya kuba kechi bakonsha ne kwibupota ne.” (Salamo 49:7, 8) Tukebesha bingi buno bukwasho mambo kechi twafwainwa kwikuula atweba bene ne. Kafwako kyo twafwainwa kuba pa bunke bwetu ne.

Na mambo a butemwe bwanji, Yehoba wituzhikijila ku “bintu byatama bileta lufu.” Kabiji na mambo a kwa Yesu “bonse bakasangulwa.” Bukuzhi bwaubile  byepi kino? Baibolo waamba’mba, ‘mashi a Mwananji aye Yesu etutokesha ku bundengamambo bonse.’ Inge twaikala na lwitabilo mu mashi a kwa Yesu kikalengela mambo etu kulekelwa ne kwikala na bumi bwa myaka ne myaka. (1 Yoano 1:7; 5:13) Ñanyi kintu bukuzhi kyo bukobila batemwe betu bafwa? Baibolo waamba’mba, “Mambo lufu byo lwaishile kupichila mu muntu umo, ne lusanguko lwa bafu nalo lwiya kupichila mu muntu umo.”—1 Kolinda 15:21. *

Kafwako bupe bupana muntu uji pa kifulo kikatampe bwaesakana na kitapisho kya kwa Yesu ne. Pano pa ntanda kafwapo muntu wipana byonka bipaine Yehoba Lesa ne. Kafwako bupe bwakonsha kwitukasulula ku bundengamambo ne lufu byonka byaubile kitapisho kya kwa Yesu ne. Kabiji kafwako bupe bwa kunkankalwa kulumbulula bwaesakana na bukuzhi ne.