BUPOPWESHI bwavula mwaya ntanda, nabiji bwa Bakatolika bwa Orthodox, Buddhism ne bukwabotu, butundaika bantangi babo kubula kusongola. Bino bantu bavula bamba kuba’mba, uno mulanguluko waishileko na mambo a byaubilenga bantangi ba mu bupopweshi bwavula.

Onkao mambo, kyayilamo bingi kwipuzha’mba, Nanchi Binembelo byaswisha bena Kilishitu kubula kusongola nangwa kusongolwa nyi? Pa kukumbula buno bwipuzho, patanshi twayai tuyuke byatendekele uno mulanguluko ne Lesa byo amona kino.

Buku wa Encyclopædia Britannica walumbulula kyambo kya celibacy amba, ke “muntu wikala kwa kubuula kusongola nangwa kusongolwa ne kubuula kwilaala na muntu, kikatakata bantangi baji pa bifulo bikatampe.” Mu 2006, Pope Benedict XVI, wanembejile bankwasho banji amba, “mulanguluko wa kubuula kusongola nangwa kusongolwa kechi wakatataka ne, byo byo kyajinga ne ku Batumwa kala.”

Nangwa byonkabyo, bena Kilishitu bakala kechi bakanyanga bakwabo kusongola nangwa kusongolwa ne. Mutumwa Paulo, wajingako kimye kyatendekele bwina Kilishitu, waambijile bakwabo banabalume ba mu lwitabilo kuchinuzhuka “byambo bya bubela bimweka nobe byafuma kwi Lesa” ne ‘kukanya bantu kubuula kusongola.’—1 Timoti 4:1-3.

Bino kimye kya batumwa byo kyapichile, bantu batendekele kuleta uno mulanguluko muchechi ya “Bena Kilishitu.” Kwesakana na buku wa Celibacy and Religious Traditions, waamba’mba, “Abino byaubanga bena Loma, bibalengelanga kubula kuba bulalelale.”

 Mu myaka yalondejilepo, bantangi ba mu bupopweshi ne bo baitanga amba ba Tata batundaikilenga bantu babo kuba bino. Balangulukanga kuba’mba, kuba bulalelale kwalengelanga mubiji kwikala na biko ne kubula kwingila bulongo mwingilo bwa bupulishiti. Pano bino buku wa Encyclopædia Britannica waamba’mba “bantangi ba bupopweshi bavula bajinga na bakazhi.”

Kusambakana kwajingako mu Roma kwa bantangi ba mu Katolika mu 1123 ne mu 1139, chechi ya Bakatolika yatundaikilenga bantangi babo kubula kusongola kufikatu ne luno. Na mambo a luno lunengezho lwalengejile kipwilo kubula kupanga bavula muchechi ne kubula konauna mali avula aingijishanga bantangi bajinga na bakazhi ne baana.

Bimona Lesa mulanguluko wa kubula kusongola byanembwa mu Mambo anji, Baibolo. Mu Baibolo muji byambo byaambile Yesu bilengela bamo kubula kusongola byonka byo ajinga. Waambile’mba kilengela bino ke “na mambo a Bufumu bwa mwiulu.” (Mateo 19:12) Mutumwa Paulo naye waambile pa bena Kilishitu bafuukulapo kwikala bakatanda “na mambo a mambo awama.”—1 Kolinda 7:37, 38; 9:23.

Nangwa byonkabyo, Yesu ne Paulo kechi bakanjikizhenga bena Kilishitu kubula kusongola ne. Yesu waambile’mba bukatanda ke “kya bupe” kyakonsha kubula kwikala na bapopweshi banji bavula. Paulo byo aambilenga pa “bisungu,” waswile kuba’mba “kechi njipo na mukambizho kufuma kwi Nkambo ne, bino naamba mo nalangulukila.”—Mateo 19:11; 1 Kolinda 7:25, tubyambo twa munshi.

Kunungapo, Baibolo waamba ne kuba’mba, bena Kilishitu ba mu moba a kala basongwele. Kabiji mutumwa Petelo naye wasongwele. (Mateo 8:14; Mako 1:29-31; 1 Kolinda 9:5) Na mambo a bulalelale bwajingako mu Loma pa kyo kya kimye, Paulo waambile’mba inge kalama wasongola, wafwainwa kwikala “mwanamulume uji na mukazhi umo” ne “baana bamunekenena.”—1 Timoti 3:2, 4.

Lesa kechi ukanya bantu kusongola ne, mambo Baibolo waamba’mba: “Mwanamulume [wafwainwa kupa] mukazhanji kyamufwainwa” ne kuba’mba bonse baji mu masongola kechi bafwainwa ‘kwitananga’ bya mu masongola ne. (1 Kolinda 7:3-5) Kino kyamweshatu patoka kuba’mba Lesa kechi ukanya bantu kusongola ne, kiji ku mwine mwina Kilishitu kusalapo.

Inge kya kuba bantu bafwainwa kusongola nangwa kusongolwa, pano mambo ka Yesu ne Paulo o baambijilenga pa buwame buji mu kubula kusongola nangwa kusongolwa? Mambo bantu babula mu masongola baji na kimye kyabaya kya kusapwila mambo awama ku bantu. Kabiji bantu babula mu masongola bepana bene, mambo kechi baji na bijikila bikalapo na bantu baji mu masongola ne.—1 Kolinda 7:32-35.

Monai byaubile ba David bekala ku Mexico bafuukwilepo kuleka nkito yo bafolanga muzema wa mali. Panyuma ya kuba bino, bayile ku Costa Rica na kufunjisha bantu Baibolo. Nanchi ba David bamona’mba bukatanda bwibakwashishe kuba bino nyi? Ee bwibakwashishe bingi. Baambile’mba, “kyankatezhe bingi kufuma mu kyalo mo nakomena ne kuya ku kyalo kikwabo. Pano na mambo a kuba’mba kechi nasongola ne, kechi kyankatezhe kuba bino ne.”

Ba Claudia bazhike baingijila ku mapunzha kwakepa basapwishi ba bufumu baambile’mba: “Neyowa bingi kwingijila Lesa. Lwitabilo lwami ne bulunda bwami na Lesa bwakosa bingi kikatakata inge namona byo ankwasha.”

Kechi bafwainwa kwimukanjikizha kwikala katanda nangwa kwikala muzhike ne. Ba Claudia baambile ne kuba’mba, “Kusongola nangwa kusongolwa kechi ko kulengela muntu kwikala na lusekelo ne. Bino kilengela kwikala na lusekelo ke kwingijila Yehoba Lesa na muchima yense.”—Salamo 119:1, 2.