BA Alexandra bakanjijile mu sakya, kabiji byo yatendekele kwenda baumvwine kuba’mba, “nsongwalume wa ku China kechi wakanjila ne.” Baumvwine bino byambo byo bajinga pa mupaka wa byalo bibiji bya mu America. Byo baumvwine bino, bayile na kumona byamwekelenga. Bataaine nsongwalume wa ku China ubena kukabakana kwamba Kisipanishi. Uno nsongwalume walumbulwijilenga kapokola kyalengejile kubula kumuswisha kutwela mu kyalo kingi. Na mambo a kuba’mba ba Alexandra bapwilanga mu kipwilo kya Bakamonyi ba kwa Yehoba mu mulaka wa Kichainizi, bayile na kumutuntulwilako byo ambilenga uno nsongwalume.

Uno mwanamulume wabuujile kapokola amba waikalanga mu kino kyalo pano bino bamwibilatu mapepala akutwelelapo ne mali. Kimye kitanshi kapokola byo bamubujile, kechi waswile ne kabiji walangulukile’mba kampe ba Alexandra nabo bapotesha bizhima. Kyapeleleko uno kapokola waumvwine byalumbulwilenga uno nsongwalume wa ku China, bino nangwa bamwibijile mali, wapaine mali akwabo mambo kechi wajinga na mapepala ne. Na mambo a kuba’mba kechi wajinga na mali ne, ba Alexandra bepaine kumukongwesha mali a kina America, $20. Ba Alexandra bamubuujile kuba’mba kechi wafwainwa kwibobilapo kintu ne, baumvwine bingi bulongo pa kumukwasha mambo bayukile kuba’mba byobyo bafwainwe kuba. Uno nsongwalume bamupele mabuku alumbulula Baibolo ne kumutundaika kufunda Baibolo na Bakamonyi ba kwa Yehoba.

Kileta bingi lusekelo inge mwakwasha muntu ye mwabula kuyuka. Kwakubula nangwa kuzhinaukatu ne, bantu bapopwela Lesa ne babuula kumupopwela, nabo boba byonka bino. Inge yenu mwajinga ba Alexandra, nanchi inge mwaubile byo baubile nyi? Buno bwipuzho bwanema bingi mambo Yesu waambile’mba: “Mu kupana mufuma lusekelo lukatampe kukila mu kutambula.” (Byubilo 20:35) Kupana kwanema bingi, mambo nangwatu bashayuka bataana kuba’mba, kupana kulengela muntu kwikala na lusekelo. Twayai twisambe kupana byo kuleta lusekelo.

Kyatanwa kuba’mba kupana ne lusekelo byendela pamo. Mutumwa Paulo wanembele’mba, “Lesa watemwa muntu upana na lusekelo.” Waambilenga pa bena Kilishitu bapaine bya bupe kimye kyo bakwashishe bakwabo ba mu lwitabilo. (2 Kolinda 8:4; 9:7) Paulo kechi waambilenga’mba bapaine na mambo a kuba’mba bajinga na lusekelo ne. Bino kibalengejile kwikala na lusekelo ke bumpanyi bwabo.

Bashayuka bataana kuba’mba kupana “kulengela bongo bwa muntu kukasuluka, kwisamba na bantu bulongo ne kwibalengela kwikala na lusekelo.” Kabiji bataana ne kuba’mba, “kupa muntu mali kuletela lusekelo muntu wiapana, kukila lusekelo lo ekala nalo inge mwine wiengijisha.”

Nanchi bimye bimo mulanguluka amba kafwako kyo mwakonsha kuba na mambo a bintu byo mubena kupitamo nyi?  Kishinka ke kya kuba’mba bantu bakonsha kwikala na lusekelo inge ke bapane “na lusekelo.” Kuvula kwa bintu byo mubena kupana kechi kyo kintu kyanema ne, bino kyanema ke kupana na muchima yense. Kamonyi wa kwa Yehoba umo watumine bupe ku banemba uno magazine. Waambile’mba: “Pa myaka yavula nkyangye kupanapo bupe ku Nzubo ya Bufumu ne, bino Yehoba Lesa wampa bintu byavula bingi kukila ne bintu byo namupa. . . . Nasanta bingi pa kundengela kupanako bupe. Kuba bino kuntundaika bingi.”

Mali kechi o onkatu o twafwainwa kupa bantu ne, kuji bintu byavula byo twafwainwa kwibapa.

Baibolo waamba’mba: “Muntu wa lusa umwenamo byawama, pakuba muntu washinta wiletela makatazho.” (Byambo bya Maana 11:17) Bantu baji na lusa bapana bingi, bapana kimye kyabo, bulume bwabo, bata bantu muchima ne bintutu bikwabo. Kuba bino kwibakwasha bingi, kabiji bekala ne na bumi bwawama inge ke bapane.

Kabiji bashayuka baamba ne kuba’mba, bantu bakwasha bakwabo javula kechi bekala na bijikila, misongo nangwa makatazho akwabo ekalapo na boba babula kupana ne. Kyakila pa byonse beyowa bumi bwawama. Bumpanyi bulengela muntu ukolwa kikola nabiji kya HIV ne kikola kya kubongo kwikala na bumi bwawama. Kabiji kyatanwa ne kuba’mba, kuleka kutoma malwa kukwasha bingi kukepeshako bijikila kabiji kulengela muntu kubuula kutendeka kutoma malwa jikwabo.

Kabiji bashayuka bataana ne kuba’mba, “kifyele, bumpanyi ne lusa bilengela muntu kubula kwikala na milanguluko yatama.” Kupana kwakonsha ne kukepeshako bijikila ne kikola kya BP. Bantu bafwishapo kala bena kwabo, inge bepana kukwasha bakwabo, bijikila byo bekala nabyo bikepako.

Kwambatu kine, kukwasha bantu mufuma bintu byawama bingi.

Yesu watundaikile baana banji ba bwanga amba: “Saka mupana, ne anweba bantu bakemupa. Baketulwila pa kivwalo kyenu kipimo kyawama kyo bashindaika bulongo ne kusunkenya kabiji kyayulatu tee. Mambo kyonka kipimo kyo mupiminako bakwenu, ne anweba kyo kyo bakemupiminako.” (Luka 6:38) Inge mwapa muntu kintu, bantu basanta bingi pa bumpanyi bwenu kabiji nabo bekekala na muchima wa bumpanyi. Kupana kulengela bantu kukwatankana ne kwikala na balunda bavula.

Bashayuka bafunda pa bulunda bwa bantu bataana kuba’mba, “bantu bata bakwabo muchima balengela bakwabo nabo kuta bantu muchima.” Kabiji nangwatu “bantu babula kupana inge ke batange mashimikila a bantu bapana, kibalengela kwikala bampanyi.” Kabiji bashayuka baamba ne kuba’mba, “inge muntu mu kimasamasa ke akwashe bantu bavula bo abula kuyuka nabo bakonsha kwikala bampanyi.” Ko kuba’mba inge mwaubila muntu kintu kyawama mu kimasamasa, kyakonsha kulengela bantu bonse bekalamo mu yoyo mpunzha kwikala bampanyi. Nanchi kechi mwakonsha  kutemwa kwikala mu yoyo mpunzha nenyi? Mwakonsha kutemwa, mambo bantu inge baikala bampanyi mufuma byawama bingi.

Kyamwekele mu Florida mu U.S.A. kyamwesha bintu byawama bifuma mu bumpanyi. Jibumba ja Bakamonyi ba kwa Yehoba janengezhe kuya na kukwasha bantu baponejilwe na kinkunkwila. Byo bapembejilenga bya kwingijisha pa nzubo yaonaikile, bamwene nsakwa yakundukile ya muntu yajinga kwipi nako bajinga. Bano Bakamonyi bafukwilepo kwiiwamisha. Byo papichileko kimye, uno mwina nsakwa wanembele nkalata ku ofweshi mukatampe wa Bakamonyi ba kwa Yehoba. Wanembele’mba, “Nkasantangatu kimye kyonse. Bano bantu bawamisha nsakwa yami ke bantu bawama bo nkyangye kumonapo mu bwikalo bwami ne.” Pa kuba’mba amweshe byo asanchile watumine bupe ku mwingilo wa Bakamonyi wa ntanda yonse.

Bashayuka bataana kuba’mba, “kuji kintu kimo kilengela bantu kukwasha bakwabo.” Kabiji banungapo ne kuba’mba banyike “bamwesha bino byubilo saka bakyangye ne kutendeka kwamba.” Mambo ka? Baibolo waamba’mba, kilengela bino ke na mambo a kuba’mba bantu balengelwe ‘mu kipasha kya Lesa,’ o ene mambo o baikela na byubilo bya Lesa.—Ntendekelo 1:27.

Bumpanyi ke kyubilo kimo kijipo na Mulenga wetu aye Yehoba Lesa. Bwitupa bumi ne bintu bitulengela kwikala na lusekelo. (Byubilo 14:17; 17:26-28) Twakonsha kuyuka byavula pe Shetu wa mwiulu ne byo etulaya kulutwe inge ketufunde Mambo anji, Baibolo. Kabiji uno buku walumbulula ne kuba’mba tukekala na bumi bwawama kupichila mu bukuzhi bwa mwananji. * (1 Yoano 4:9, 10) Yehoba Lesa wetu mpanyi kabiji twalengwa mu kipasha kyanji, onkao mambo, kechi twafwainwa kukumya ne inge twaikala bampanyi byonka biji Lesa. Inge ke tube bino, tukamutokesha bingi ku muchima.—Bahebelu 13:16.

Mwavuluka ba Alexandra bo twakwambapo kuntendekelo ya kino kibaba nyi? Ñanyi bintu byawama byafumine mu byo baubile? Nangwa kya kuba ye bakanjijile nanji motoka umo wibabuujile’mba waela mali, byo afikile mu taunyi, watumijile bakwabo foni kuba’mba bamupepo mali $20 apane ko akongwele. Panyuma ya bino, wabwezhezhe nkongole yo akongwele. Walondejile byamubuujile ba Alexandra ne kutendeka kufunda Baibolo. Byo papichile bañondo basatu, basambakene pa kushonkena kwa Kijiiji kwa Bakamonyi ba kwa Yehoba mu Peru. Kuno kushonkena kwajinga mu Kichainizi. Pa kumwesha byo asanchile pa byamubijile ba Alexandra, uno mwanamulume wibechile ba Alexandra ne bonse bo baishile nabo ku kushonkena ku kishimikwa kyanji mwakujila kajo.

Kupana ne kukwasha bakwetu kuleta bingi lusekelo. Kabiji inge mwakwasha bantu kuyuka Mpanyi witupa bintu byonse byawama aye Yehoba Lesa kileta bingi lusekelo. (Yakoba 1:17) Nanchi kupana kwimuletela lusekelo nyi?