BUPE BWANEMA bwakonsha kwitulengela kusanta. Yesu waambile pa buneme bwa kusanta byo abukile banabalume jikumi bajinga na kikola kyatama. Umo pa bano banabalume “wabwelele saka atumbijika Lesa na jiwi ja peulu.” Kepo Yesu ashikishe’mba: “Nanchi kechi bantu jikumi baji kubukwa nenyi? Pano nga bakwabo batanu na bana baji pi?” (Luka 17:12-17) Twakonsha kufunjilako ka ku kino? Kyapeela bingi kulubako bintu byawama bitubila bakwetu.

Bupe bwa bukuzhi bwanema bingi. Kabiji kafwako bupe bwakonsha kwesakana nabuno ne. Mwakonsha kuba byepi pa bintu byonse bimubila Lesa?

• Yukai wapaine buno bupe. Bukuzhi kechi bufikenatu kuleta bumi bwa myaka ne myaka ku bantu ne. Yesu walombele kwi Lesa amba: “Pa kuba’mba bakekale na bumi bwa myaka ne myaka, bafwainwa kwimuyuka anweba Lesa yenka wa kine, ne Yesu Kilishitu ye mwatumine.”  (Yoano 17:3) Inge bemubula kuba’mba kuji muntu wapulwishe bumi bwenu byo mwajinga banyike, nanchi kechi mwakonsha kukeba kuyuka byavula pa uno muntu ne kyalengejile kwimukwasha nenyi? Yehoba Lesa wapaine bukuzhi ukeba’mba mumuyuke ne kwikala balunda nanji. Baibolo waamba’mba: “Fwenyai kwipi ne Lesa, ne aye ukafwenya kwipi ne anweba.”—Yakoba 4:8.

• Ikalai na Lwitabilo mu bukuzhi. Baibolo waamba’mba: “Awa wamwitabila Mwana ukekala na bumi bwa myaka ne myaka.” (Yoano 3:36) Kwikala na lwitabilo mu bukuzhi kulumbulula ka? Kulumbulula kumwesha lwitabilo mu mingilo yo tuba kechi kwambatu pa kanwa ne. (Yakoba 2:17) Ñanyi mingilo yo twakonsha kumwesha? Bupe bwakonshatu kwikala bwenu inge mwaswa kwibutambula. Onkao mambo, mwafwainwa kwibikako pa kuba’mba mutambule bukuzhi. Mwakonsha kuba byepi bino? Kupichila mu kwikala bwikalo busangajika Lesa ne kuba byo akeba. * Lombainga kwi Lesa pa kuba’mba emulekelengako mambo ne kwikala na jiwi ja mu muchima jatoka. Lombainga kwi Lesa saka muji na luketekelo lwa kuba’mba bukuzhi bukemupa bumi bwa myaka ne myaka ne kwikala bulongo kulutwe.—Bahebelu 11:1.

• Mukatanweko ku Kivuluko kya Lufu lwa kwa Yesu. Yesu watendekele kijiilo kya pa mwaka pa mwaka kituvululamo lunengezho lwa bukuzhi. Pa kuvuluka kino kivuluko, Yesu waambile’mba: “Saka muba kino mu kumvuluka.” (Luka 22:19) Bakamonyi ba kwa Yehoba bakavulukanga lufu lwa kwa Yesu pa Kibiji pa 11 April, 2017 inge juba jazhika. Kukekala jashi jikambanga pa buneme bwa lufu lwa kwa Yesu, ne pa bintu byawama byo abena kwitubila luno ne byo aketubila kulutwe. Abino byonse bikapwa mu jiola jimo. Mwaka wapwa bantu 20 milyonyi bo batainwe ku kivuluko mwaya ntanda yonse. Mwane tubena kwimwita kwiya tukavulukile pamo lufu lwa kwa Yesu.