Bashayuka Batubangabanga ne Baponga—Nanchi Bakonsha Kwamba Bikamweka Kulutwe nyi?
BASHAYUKA BATUBANGABANGA
Bashayuka batubangabanga baamba’mba tubangabanga, ñondo ne mapulaneti bitangijila bantu pano pa ntanda. Kabiji bamba ne kuba’mba, biji tubangabanga, ñondo ne mapulaneti mwiulu pa juba jasemwa mwana byo bimwesha bikekala bwikalo bwa uno mwana kulutwe.
Bantu bajinga mu Babilona bo batendekele kuponga kwingijisha tubangabanga, nangwatu luno bantu bakyuba byonka bino. Kwesakana na byo bapesele pesele mu 2012, mu kyalo kya United States, bantu bamo baambile’mba byuba bashayuka batubangabanga “kyamweka byakwatankanako na sayansi” bakwabo baambiletu kipasu kuba’mba “byo boba byo byaamba sayansi.” Nanchi byo baambile bya kine nyi? Ine. Kishinka kine ke kino.
-
Mapulaneti ne tubangabanga kechi tujipo na bulume bwa kupimpula bwikalo bwa bantu byonka byamba bashayuka batubangabanga ne.
-
Byo bamba’mba bikamweka kulutwe byakonsha kumwekela muntu uji yense.
-
Bano bashayuka balondela mashinda aingijishanga bantu kala kabiji bamba’mba mapulaneti azhokoloka ntanda. Bino kishinka ke kya kuba’mba mapulaneti kechi azhokoloka ntanda ne, azhokoloka juba.
-
Bashayuka inge baamba pa bikamweka, byo bamba kechi biswañana na byamba bashayuka bakwabo ne.
-
Kabiji bano bashayuka batubangabanga bamba byapusana pusana pa bantu, kikatakata pa juba jasemenwapo muntu. Byo baambanga byakwatankananga kwesakana na byazhokolokanga pulaneti itelwa’mba earth, bino luno kechi bikwatankana ne.
Bashayuka batubangabanga bengijisha bintu bibakwasha kuyuka biji muntu. Bino kishinka ke kya kuba’mba, bantu basemenwe juba jimo kechi bekala na byubilo bipasha ne. Juba jasemwa muntu kechi jakonsha kumulengela kwikala na byubilo byo aji nabyo ne. Bashayuka batubangabanga kechi bayuka bantu byo baji ne, bino bamona byubilo byabo pa kuba’mba bayuke byo baji. Nanchi kuba bino kechi ke kuzhachisha bantu kwakubula bishinka nenyi?
KWAMBILA JIMO BIKAMWEKA KULUTWE
Kutendekatu ne kala bantu bepuzha bashayuka batubangabanga pa bikamweka kulutwe. Bantu bamba bikamweka kulutwe, javula bamona byuba banyama, bantu ne byuba bashikombwe pa kuja. Bakwabo nabo bengijisha bijimwa pa kuba’mba bayuke bikamweka kulutwe. Ano moba bengijisha kimbonyi ne bintutu bikwabo pa kuba’mba bayuke bikekala bwikalo bwa muntu kulutwe. Nanchi twakonsha kuketekela byamba bantu bambila jimo bikamweka kulutwe nyi? Ine, kechi twafwainwa kuba bino ne. Twayai twambe ene mambo o twaambila bino.
Nanchi byamba bano bashayuka batubangabanga biswañana nyi? Bengijisha mashinda apusana pusana pa kwamba pa bikamweka kulutwe. Nangwa kya kuba baingijisha jishinda jimo, byo bamba bipusana. Inge muntu waipuzha bantu babiji bamba bikamweka kulutwe, bafwainwa kwamba bintutu bimo. Pano bino javula byo bamba bipusana.
Bantu bavula bazhinauka mashinda engijisha bantu bambila jimo bikamweka kulutwe. Bashayuka bamo baamba’mba, abino bintu byo bengijisha kechi bibakwasha ne. Kabiji bantu bambila jimo bikamweka kulutwe javula bamba bintu kwesakana na byubilo bya muntu. Bano bantu bepuzha mepuzho kabiji bateleka bingi inge muntu ubena kwamba pa kuba’mba bayuke byo bakonsha kubula uno muntu. Javula byo bamba bano bantu bimena pa bya kwibabulanga muntu wa kwibepuzha. Bantu bambila jimo bikamweka kulutwe, bebaketekela bingi ku bantu. Kabiji kino kilengela bantu bamba bintu bikamweka kulutwe kwikala bingi na mali.
BYAMBAPO BAIBOLO
Byamba bashayuka batubangabanga ne bambila jimo bikamweka kulutwe, bimwesha’mba bayuka bintu biketumwekela kulutwe. Nanchi byo ibyo nyi? Baibolo witubula’mba tuji na bulume bwa kusalapo byo twakonsha kwitabilamo nangwa byo twakonsha kuba. Kabiji byo tufuukulapo kuba byakonsha kutamisha bwikalo bwetu bwa kulutwe nangwa ne.—Yoshua 24:15.
Bapopweshi ba Lesa baji na bishinka byavula bibalengela kukana byamba bashayuka batubangabanga ne bambila jimo bikamweka kulutwe. Mambo bayuka’mba Lesa washikwa bantu bonse baponga. Mu Baibolo muji byambo bya kuba’mba: “Mwi anweba kechi mukatanwe muntu nangwa umo . . . uponga, nangwa ñanga wa bisoko nangwa muntu yense uba bya lubuko nangwa mulozhi ne. Kabiji kechi mukatanwe muntu uta bakwabo bwanga nangwa wipuzha muntu wisamba na mipashi nangwa wamba bikamweka kulutwe nangwa wisamba na bafu ne. Mambo muntu yense uba bino bintu ye wa bunya kwi Yehoba.” *—Mpitulukilo ya mu Mizhilo 18:10-12.
^ jifu. 17 Yehoba jo jizhina ja “Mwine Wakila pano pa ntanda ponse.”—Salamo 83:18.
Mwakonsha Kutemwa
LABAINGA!
Baibolo Waambapo’mba ka pa Kupopwela Mipashi?
Nangwa kya kuba bantu balanguluka’mba bingelekezha ne bulozhi bijitu bulongo, bino Baibolo waamba’mba byatama bingi. Nanchi Binembelo byaambapo’mba ka pa bino bintu kabiji mambo ka?
