Mambo awama a Bufumu bwa Lesa abena kusapwilwa pano pa ntanda ponse kwesekana na byaambijile jimo Yesu. (Mateo 24:14) Buku wa Danyela waamba’mba, buno Bufumu ke kafulumende wa Lesa. Kitango kya bubiji kya uno buku muji bungauzhi bwaamba pa makafulumende a bantu kutendekela ku bufumu bwajinga mu Babilona kufikatu ne mu ano moba. Kyepelo 44 kyaamba pa bintu bikamweka kulutwe’mba:

“Lesa wa mwiulu ukaleta bufumu bo bakabula konauna. Kabiji buno bufumu kechi bakebupana ku bantu bangi ne. Bukavingakanya ne kupwisha buno bufumu bonse kabiji abo bukekala myaka ne myaka.”

Buno bungauzhi ne bukwabo buji mu Baibolo bwaambila jimo kuba’mba Bufumu bwa Lesa bukafumyapo makafulumende a bantu bonse. Bufumu bwa Lesa bukatendeka kulama pano pa ntanda. Bwikalo bukekala byepi mu buno Bufumu? Monai milaye imo ikafika katataka.

• KECHI KUKEKALA NKONDO NE

  Salamo 46:9: ‘[Lesa] ukapwisha nkondo pa ntanda ponse. Ukachimauna buta bwa mukanda ne jifumo; ukasoka makalaki a nkondo mu mujilo.’

  Fwanyikizhai ino ntanda byo yakonsha kwikala inge kya kuba mali o bengijisha kupanga bilwilo bya nkondo beengijisha kukwashishamo bantu kukila kupanga bilwilo bya nkondo. Uno mulaye ukafika mu Bufumu bwa Lesa.

• KECHI KUKEKALA KUKOLWA NE

  Isaya 33:24: “Kafwako muntu nangwa umo ukekala mu kyalo ukamba’mba: ‘Nakolwa’ ne.”

  Fwanyikizhai mu ntanda mwabula bantu babena kukolwa kikola kya muchima, kansa, kikola kya mashika ne bikolatu bikwabo. Pa kyokya kimye kechi kukekala bipatela ne michi ne. Kabiji bantu bakekala na bumi bwawama.

• KAJO KAKAVULA BINGI

  Salamo 72:16: “Kajo kakavula bingi pano pa ntanda; kakekala ne peulu ya mitumba.”

  Pano pa ntanda pakekala kajo kavula ka kuja bantu bonse. Kechi kukekala bikola biya na mambo a nzala ne.

• KECHI KUKEKALA MISONGO, KUJILA NE LUFU NE

  Lumwekesho 21:4: “[Lesa] ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.”

   Kino kibena kulumbulula’mba bantu bakekala na bumi bwalumbuluka mu paladisa pano pa ntanda. Abino byo byalaya Mulenga wetu wa butemwe aye Yehoba Lesa.

Byo twaambapo kechi mashimikilatu ne. Nangwa kya kuba bantu baswa’mba Lesa witulaya bumi bwawama, bino bantu bavula kibakatazha bingi kuswa’mba bwikalo kulutwe bukawama. Akino kechi kyakonsha kwitukumisha ne, mambo kafwako muntu wakikalapo bwikalo bwa uno mutundu wakonsha kwitubula byo buji ne.

Bantu bonsetu lelo jino bafwa mambo bandengamambo. Bengila mingilo yakosa, bayanda kabiji bapita ne mu bintu bikwabo byatama. Kino kilengela bantu kwamba’mba bakatwajijilatu na kuyanda. Bino kishinka ke kya kuba’mba, Yehoba Lesa kechi walengele bantu kuba’mba bayandenga ne.

Twafwainwa kushiinwa’mba ino milaye ikafika mambo Lesa mwine waamba’mba: “Kechi bikabwela kwi amiwa kyatutu ne, poso bikobe byonka byo nkeba, kabiji kine bikoba kintu kyonka kyo nebitumijile.”—Isaya 55:11.

Mu Baibolo Yehoba bamulumbulula’mba ye Lesa “ubula kubepa.” (Titusa 1:2) Byo kiji kuba’mba witulaya milaye yawama, kyanema bingi kwiipuzha’mba: Nanchi kine bantu bakekalanga mu Paladisa pano pa ntanda myaka ne myaka nyi? Twafwainwa kuba byepi pa kuba’mba tukamwenemo mu uno mulaye wa Lesa? Mitwe yalondelapo ya kumbula ano mepuzho.