NANCHI MULANGULUKAPO PA BYO MUKEKALANGA KULUTWE NYI? Bantu bamo bamba’mba kuji bitangijila bwikalo bwa bantu, kechi bintu byo bafuukula ne. Inge bakankalwa kuba kyo babena kukeba, kechi bebikako kwikyuba jikwabo ne. Bamba’mba “kyanembejilwe jimo amba byobyo kikekala.”

Bakwabo balefulwa bingi inge bamona bubi ne nshiji saka ibena kuyatu na kuvujilako mu ntanda. Kimye kimo bebikako bingi kuba’mba bawamisheko bwikalo bwabo, bino bakankalwa na mambo a nkondo, bumbanzhi, bya malwa ne bikola. Bino bintu byo bibalengela kukankalwa kuba byo bakeba mu bwikalo bwabo. Beipuzha’mba, ‘pano mambo ka a kwikatezha na kulanguluka pa bwikalo bwa kulutwe?’

Ibyo kuba’mba bintu byo tupitamo mu bwikalo byakonsha kwitulengela kubula kuba byo tukeba. (Musapwishi 9:11) Nangwa byonkabyo, inge ketulanguluke pa byo tukekalanga kulutwe, twakonsha kufuukulapo bulongo. Baibolo waamba’mba, bwikalo bwetu bwa kulutwe bwaimena pa bintu byo tufuukulapo kuba. Umvwai Byaambapo Baibolo.

Mosesa wajinga ntangi wa bena Isalela, wabuujile bantu saka bakyangye kutwela mu Ntanda ya Mulaye amba: “Nabika bumi ne lufu kwi anweba, mapesho ne mafingo; musale bumi pa kuba’mba mukekale na bumi anweba ne baana benu, kupichila mu kutemwa Yehoba Lesa wenu, kumvwina jiwi janji ne kukakachila kwi aye.”—Mpitulukilo ya mu Mizhilo 30:15, 19, 20.

“Nabika bumi ne lufu kwi anweba, mapesho ne mafingo; musale bumi pa kuba’mba mukekale na bumi anweba ne baana benu.”—Mpitulukilo ya mu Mizhilo 30:19.

Lesa wapokolwele bena Isalela mu buzha mu Ijipita kabiji wibalayile kuba’mba bakekalanga bulongo mu Ntanda ya Mulaye. Kuji byo bafwainwe kuba pa kuba’mba bakatwele mu ntanda ya mulaye. Bafwainwe kuba byepi pa kuba’mba bekale na ano mapesho? Bafwainwe ‘kusala bumi,’ kutwajijila kutemwa Lesa, kumvwina jiwi janji ne kukakachila kwi aye.’

Ne ano moba, kuji bintu byo mwafwainwa kuba pa kuba’mba mukekale na bumi bwa myaka. Bintu byo musala byakonsha kwimulengela kukekala na bumi kulutwe nangwa ne. Inge mwasalapo kutemwa Lesa, kumvwina jiwi janji ne kukakachila kwi aye, ko kuba’mba mukekala na bumi bwa myaka ne myaka mu paladisa pano pa ntanda. Pano ñanyi bintu byo twafwainwa kuba pa kuba’mba tukekale na bumi bwa myaka ne myaka?

Butemwe kyo kyubilo kya Lesa kyanema bingi. Mutumwa Yoano bamutangijile ku mupashi wazhila kunemba’mba, “Lesa butemwe.” (1 Yoano 4:8) Byo bamwipwizhe mukambizho mukatampe wa mu mizhilo, Yesu waambile’mba: “Wafwainwa kutemwa Yehoba Lesa wobe na muchima wobe yense, ne na mweo wobe yense ne na maana obe onse.” (Mateo 22:37) Bulunda bwetu ne Yehoba bwafwainwa kwimena pa butemwe kechi pa lukokelo lwa kubula kuyuka kyo mubena kukokela ne. Pano mambo ka o twafwainwa kusajilapo kumutemwa Lesa?

Yehoba watemwa bantu byonkatu bansemi baji na butemwe byo batemwa baana babo. Nangwa kya kuba kechi balumbuluka ne, bansemi baji na butemwe bafunjisha, kutundaika, kukwasha ne kujimunako baana babo pa kuba’mba bakekale na lusekelo kulutwe. Mambo ka bansemi o bafunjishisha baana babo? Bakeba baana babo kwibatemwa ne kwingijisha byo babena kwibafunjisha pa kuba’mba bakamwenemo. Ne Shetu wa mwiulu naye ukeba’mba tusantenga pa bintu byonse byo etubila.

Mu mulaka mwine ye banembejilemo Baibolo, kyambo kya “umvwinainga” mwavwangwa ne “kukookela.” Abino byobyo kilumbulula inge twaambila mwana amba ‘umvwinenga bansemi bobe.’ Onkao mambo kumvwina jiwi ja Lesa kulumbulula kufunda ne kukookela byo aamba. Nangwa kya kuba kechi twakonsha kumvwa jiwi janji ne, bino twakonsha kumvwa jiwi janji inge ke tutange Baibolo ne kwingijisha byo tubena kutanga.—1 Yoano 5:3.

Pa kumwesha buneme bwa kumvwina jiwi ja Lesa, kimye kimo Yesu waambile amba: “Muntu kechi ukamwena bumi mu kajo konkatu ne, poso ne mu byambo bifuma mu kanwa ka Yehoba.” (Mateo 4:4) Byonkatu byanema kajo ko tuja, kwikala na maana a kuyuka Lesa nako kwanema bingi. Mu ñanyi jishinda? Mfumu wa maana Solomone walumbulwile amba: “Maana akwashañana byonkatu mali byo akwashañana, bino buwame bwa kuyuka bintu ke bwa kuba’mba: Maana alengela muntu uji nao kwikala na bumi.” (Musapwishi 7:12) Maana afuma kwi Lesa etuzhikijila ne kwitukwasha kufuukula bulongo ano moba ne kwitulengela kwikala na bumi bwa myaka ne myaka kulutwe.

Vulukai kifwanyikizho kyaambile Yesu kyo twaambapo mu mutwe wafumako. Wambile’mba: “Kibelo kyakepa ne jishinda jakatazha kwendamo, jitwala ku bumi kabiji bejitaana bachechetu.” (Mateo 7:13, 14) Pa kuba’mba twende bulongo mu jino jishinda, twafwainwa kulondela mikambizho ya ubena kwitutangijila wayuka bya kwenda mu jino jishinda pa kuba’mba tufike ko tubena kuya ne kwikala na bumi bwa myaka ne myaka. Nanchi kukookela Lesa mufuma bintu byawama bingi. (Salamo 16:8) Pano twakonsha kuba byepi bino?

Pa juba pa juba kuji bintu byavula byo twafwainwa kuba ne byo tukeba kuba. Bintu byo tuba byakonsha kwitulengela kubula kwikala na kimye kya kuba bintu byanema bitubuula Lesa. O ene mambo Baibolo o ituvulwilamo’mba: “Monainga bulongo byo mwenda, kechi mwendenga nobe bantu babula maana ne, poso nobe bantu ba maana, saka mwingijisha kimye kyenu bulongo mambo ano moba atama.” (Efisesa 5:15, 16) Kukeba Bufumu patanshi, kwitulengela kufwenya kwipi ne Lesa ne kwikala na bulunda bwakosa ne aye.—Mateo 6:33.

Nangwa kechi mwakonsha kupimpula bintu byo mwaubile kala ne, bino kuji bintu byo mwafwainwa kuba pa kuba’mba mukekale na bumi bwawama kulutwe na batemwe benu. Baibolo umwesha’mba Shetu wa mwiulu Yehoba Lesa witutemwa bingi, kabiji witubuula ne bintu byo twafwainwa kubanga. Monai byambo byaambile ngauzhi Mika bya kuba’mba:

“Obewa muntu, wakubuula kintu kyawama. Kabiji ñanyi kintu Yehoba kyo abena kukeba’mba ube? “Kanatu kuba byaoloka, kwikala wa kishinka, ne kwenda na Lesa wobe saka wipelula!”—Mika 6:8.

Nanchi mukalondelanga bikeba Yehoba ne kwenda nanji pa kuba’mba mukekala na mapesho akekalapo na bantu bakishinka nyi? Muji na luusa lwa kusalapo!