UNO MALAYE WAWAMA BINGI. Mulenga wetu witulaya kwitupa bumi bwa myaka ne myaka pano pa ntanda. Pano bino bavula kechi baswa kino ne. Bamba’mba juba jimo atweba bantu ‘bonse tukafwa, mambo lufu lwitunyeñamina.’ Bakwabo balanguluka’mba kyapela kwikala myaka ne myaka mwiulu kechi pano pa ntanda ne. Baamba’mba muntu wakonsha kwikala na bumi bwa myaka ne myaka panyuma ya kufwa ne kuya mwiulu. Nga anweba mulangulukapo’mba ka?

Saka mukyangye kukumbula buno bwipuzho, patanshi mwafwainwa kulanguluka pa byaambapo Baibolo pa ano mepuzho asatu alondelapo: Jishinda jalengelwamo bantu, jimwesha byepi amba bebalengele kwikala myaka ne myaka? Lesa wakebelenga’mba bantu bakekalenga byepi pano pa ntanda? Nga bantu batendekele byepi kufwa?

Pa bilengwa byonse byalenga Lesa, muntu bamulenga mu jishinda japusanako bingi. Mu ñanyi jishinda? Baibolo waamba’mba bantu bebalenga mu “kipasha” kya Lesa. (Ntendekelo 1:26, 27) Kino kilumbulula ka? Kilumbulula’mba muntu bamulengele na byubilo bijipo ne Lesa. Bino byubilo ke butemwe ne bunchibamambo bwaoloka.

Kabiji Lesa witulengele ne na maana a kuyuka bintu byawama ne byatama kabiji ukeba ne kuba’mba twikale balunda nanji. O ene mambo o tusanchila inge twamona byo alenga jiulu, ntanda ne byonse bijimo, kabiji tumvwa bingi bulongo kuteleka ku nyimbo ne bintutu bikwabo. Bantu bo bonkatu bakonsha kwikala balunda na Mulenga. Kino kyo kyalengela bantu kupusanako na bilengwa byonse byalenga Lesa.

Langulukai pa kino: Inge Lesa wakebelenga’mba twikalengatu myaka icheche, nanchi inge witulengele na bino byubilo byawama byo tuji nabyo nyi? Lesa byo etulengele na bino byubilo, wakebelenga’mba twikalenga bulongo pano pa ntanda myaka ne myaka.

Bamo bamba’mba Lesa kechi wakebelenga bantu kwikala myaka ne myaka ne. Kabiji bamba ne kuba’mba walengele ino ntanda pa kuba’mba bantu bakekalengapotu myaka icheche ne kwibeseka pa kuba’mba amone bakonsha kuya na kwikala mwiulu na Lesa myaka ne myaka. Inge byobyo kiji, ko kuba’mba kyayilamo bingi kupamo Lesa mambo pa bintu byonse byatama biji pano pa ntanda. Byo bamba byapusana na bilanguluka Lesa. Baibolo waamba pe Lesa amba: “Mambo mashinda anji onse aoloka. Ye Lesa wa  kishinka ubula kuba byatama; aye waoloka kabiji uba byaoloka.”—Mpitulukilo ya mu Mizhilo 32:4.

Baibolo waamba Lesa byo akebelenga ino ntanda kwikala. Waamba’mba: “Jiulu jo ja kwa Yehoba, pakuba ntanda wiipana ku baana ba bantu.” (Salamo 115:16) Kya kine, Lesa wakebelenga kuba’mba bantu bakekalenga myaka ne myaka pano pa ntanda muji bintu byawama. Kabiji walengele ne bintu byakonsha kulengela bantu kwikala bulongo myaka ne myaka.—Ntendekelo 2:8, 9.

“Jiulu jo ja kwa Yehoba, pakuba ntanda wiipana ku baana ba bantu”—Salamo 115:16

Baibolo waamba Lesa byo akebelenga bantu kwikala pano pa ntanda. Kabiji waambijile bantu batanshi kuba’mba “muyuzhe ntanda ne kwiijima kabiji mwikale na bunkambo . . . pa bilengwa byumi byonse byenda pa ntanda.” (Ntendekelo 1:28) Uno wajinga mwingilo wawama bingi wa kuwamisha ino ntanda ne kwiijima ne kwikala Paladisa. Adama ne Evwa kubikapotu ne baana babo bafwainwe kwikala myaka ne myaka pano pa ntanda kechi mwiulu ne.

Pano mambo ka o tufwila? Baibolo waamba’mba kilengwa kimo kya mupashi kitelwa’mba Satana nangwa’mba Diabola kyasatukile ne kuzhinauka bukalama bwa Lesa mu bujimi bwa Edena. Mu ñanyi jishinda?

Satana wajimbaikile bansemi betu batanshi ba Adama ne Evwa ne kwibalengela kusatukila Lesa. Kabiji waambile’mba Lesa wibataine bintu byawama ko kuba’mba luusa lwa kwifuukwila bintu. Kuba bino kwibalengejile kusatukila Lesa ne kulondela byaambile Satana. Ñanyi bintu byafuminemo? Bafwile kwesakana na byaambijile jimo Lesa. Kabiji bebapangile mu Edena kino kibalengejile kubula kwikala na luketekelo lwa kwikala na bumi bwa myaka ne myaka mu Paladisa pano pa ntanda.—Ntendekelo 2:17; 3:1-6; 5:5.

Bunsatuki bwa kwa Adama ne Evwa bwalengela bantu kuyanda bingi. Mambo a Lesa aamba’mba: “Byonkatu bundengamambo byo bwatwelele pano pa ntanda mu muntu umo, ne lufu nalo lwaishijile mu bundengamambo.” (Loma 5:12) Tufwa mambo twaswaine bundengamambo bwa bansemi betu batanshi. Lesa kechi walengele bantu kuba’mba bakekalengatu myaka icheche ne.

Nangwa kya kuba Adama ne Evwa basatukile, bino byakebelenga Lesa kuba’mba bantu bakekalenga pano pa ntanda kechi byaalukile ne. Na mambo a butemwe ne bunchibamambo bwaoloka bwa Lesa, wanengezhe jishinda ja kwitupokolwelamo ku lufu ne bundengamambo bo twaswaine kufuma ku bansemi betu batanshi. Mutumwa Paulo waambile’mba: “Mfweto ya bundengamambo lo lufu, pa kuba bupe bo apana Lesa ke bumi bwa myaka ne myaka kupichila mwi Kilishitu Yesu Nkambo yetu.” (Loma 6:23) Lesa “wapaine Mwananji yenkawa umotu [Yesu Kilishitu], kuba’mba bonse bamwitabila kechi bakonaike ne, poso bakekale na bumi bwa myaka ne myaka.” (Yoano 3:16) Byo epaine mwine ne kwikala kitapisho kya bukuzhi, Yesu wapokolwele bonse baswana bundengamambo bwa kwa Adama. *

Katatakatu mulaye wa Lesa wa kwalula ino ntanda kwikala paladisa akafike. Pa kuba’mba mukekale mu Paladisa, mwafwainwa kulondelanga mukambizho wa kwa Yesu wa kuba’mba: “Twelai pa kibelo kyakepa, mambo kibelo kyabaya ne jishinda jabaya bitwala ku lonaiko, kabiji bayamo bo bavula; pakuba kibelo kyakepa ne jishinda jakatazha kwendamo, jitwala ku bumi kabiji bejitaana bachechetu.” (Mateo 7:13, 14) Lupulukilo lwenu lwaimena pa byo muba. Pano mwafwainwa kuba byepi pa kuba’mba mukapuluke?