Bumi Bwanema Bingi
MITWE yafumako, yaamba pa makatazho apusana pusana akonsha kwimulengela kukankalwa kuc hinchika. Inge ke mupite mu makatazho, mwakonsha kutendeka kulanguluka’mba bumi kechi bwanema ne kabiji kafwako wimuta muchima ne. Pano bino yukai kuba’mba Lesa wimuta bingi muchima kabiji umona byonse byo mupitamo.
Nembi wa Salamo 86 waketekejile bingi mwi Lesa. Wanembele’mba: “Nemwita mu juba ja bya malwa byami, mambo mungitaba.” (Salamo 86:7) Mwakonsha kwiipuzha’mba, ‘Lesa wakonsha kunkumbula byepi inge namwita “mu juba ja bya malwa byami”?’
Nangwa kya kuba Lesa kechi wakonsha kupwisha makatazho enu ponkapotu ne, bino Baibolo waamba’mba wakonsha kwimukwasha kupichila mu kwimupa mutende wa mu milanguluko. Kabiji waamba ne kuba’mba: “Kange mubambishenga michima yenu na mambo a kintu nangwa kimo ne, bino mu bintu byonse mu lulombelo ne milombelo ya misashijilo pamo na kusanta, saka musolola kwi Lesa bintu byo mukeba; kabiji mutende wa Lesa wakila milanguluko ya bantu ukalama michima ne milanguluko yenu.” (Filipai 4:6, 7) Binembelo byalondelapo byamwesha’mba Lesa wimuta bingi muchima.
Lesa Wimuta Bingi Muchima
“Kafwako [kabwalula] nangwa kamo kabula kuyukanyikwa kwi Lesa ne. . . . Anweba mwanema kukila bisamba bya bwalula.”—Luka 12:6, 7.
LANGULUKAI PA KINO: Tubwalula ke tuñonyi twakepa bingi ku meso a bantu, pano bino Lesa wituta muchima. Kafwako kabwalula nangwa kamo kabula kuyukanyikwa kwi Lesa ne, mambo tonse twanema kwi aye. Bino bantu banema bingi kwi Lesa kukila bwalula. Mambo balengwa mu “kipasha” kyanji, kabiji bo bonkatu bakonsha kwikala na byubilo bijipo ne Lesa.—Ntendekelo 1:26, 27. Masalamo 139:1, 23
“Anweba Yehoba, mwantalatala kabiji mwangyuka. . . . Ne milanguluko yami mwiiyukilatu kwalepa . . . Mpimapimai ne kuyuka milanguluko yami yankatazha.”—Salamo 139:1, 2, 23.
LANGULUKAI PA KINO: Lesa wimuyuka bonse pa muntu pa muntu. Wayuka byo mumvwa ku muchima ne byo mukeba mu bwikalo bwenu. Bino bantu kechi bakonsha kuyuka bijikila byo muji nabyo ne, Lesa wimuta muchima kabiji ukebesha bingi kwimukwasha. Kuyuka bino kwimulengela kuyuka’mba bumi bwanema bingi.
Bumi Bwenu Bwanema Bingi
“Anweba Yehoba, umvwai lulombelo lwami; kujila kwami kwa kukeba bukwasho kufike kwi anweba. . . . Ntelekai; inge nemwita, munkumbule bukiji. . . . Ukata muchima ku milombelo ya bantu bo bapelula.”—Salamo 102:1, 2, 17.
LANGULUKAI PA KINO: Kufumatu kimye kyatendekele buyanji, Lesa ulonga mipolo ya bantu bonse mu fukuta. (Salamo 56:8) Kino kyavwangamo ne mipolo yenu. Lesa umona meseko onse o mupitamo ne mipolo yenu yonse, mambo mwanema bingi kwi aye.
“Kange wakamwe ne, mambo amiwa yami Lesa wobe. Amiwa nkakukosesha ne kukukwasha . . . Mambo amiwa Yehoba Lesa wobe . . . yami mbena kukwambila namba, ‘Kuchina ne, amiwa nkakukwasha.’”—Isaya 41:10, 13.
LANGULUKAI PA KINO: Lesa winengezha kwimukwasha. Inge mwapona, ukemwimanya.
Tuji na Luketekelo lwa Bwikalo Bwawama bwa Kulutwe
“Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.”—Yoano 3:16.
LANGULUKAI PA KINO: Lesa wimutemwa bingi kya kuba wapaine Mwananji aye Yesu kwimufwila. Kitapisho kya kwa Yesu kimupa luketekelo lwa kwikala na bumi bwa lusekelo myaka ne myaka. *
Umvwe mubena kupita mu makatazho abena kwimulengela kubula kwikala na lusekelo, twimutundaika kutanga Mambo a Lesa kimye kyonse pa kuba’mba mukoseshe lwitabilo lwenu mu milaye yanji. Kuba bino kukemulengela kwikala ba lusekelo kabiji mukashiinwa kuba’mba bumi bwanema bingi.
^ jifu. 19 Inge mukeba kufunjilapo byavula pa kitapisho kya kwa Yesu, tambai vidyo wa kuba’mba Kuvuluka Lufu lwa kwa Yesu pa www.pr418.com/kqn. Chintai po banemba’mba MABUKU > MAVIDYO > BYO TUPWILA NE MWINGILO > BYA KWINGIJISHA MU MWINGILO.
Mwakonsha Kutemwa
BAKAMONYI BA KWA YEHOBA
Mambo ka a Kufunjila Baibolo?—Vidyo Yense
Bantu bavula mwaya ntanda babena kutana mikumbu ya mu Baibolo. Nanchi nenuwa mubena kukeba kufunda nyi?
KYAMBA KYA USOPA
Lulombelo—Byo Lwakonsha Kwimukwasha
Mukamwenamo ka inge saka mulomba kimye kyonse mu bwikalo bwenu?
KYAMBA KYA USOPA
Kuyuka’mba Lesa Wimutemwa Kwimukwasha
Binembelo bitukwasha kwikala na lwitabilo mu milaye ya Lesa iji kulutwe.
KYAMBA KYA USOPA
Mambo ka Bupe bwa Lesa o Bwanemena?
Ñanyi bintu bimo bilengela bupe bumo kunema bukwabo ne? Kulanguluka pa kino kwitukwasha kunemeka bingi bukuzhi.
