UMVWE mwakifwishapo kala mulunda nenu, ne anweba kyafwainwa kimukolele bingi ku muchima. Mwajinga na bulanda ne kumona nobe kechi mukekalapo na lusekelo jikwabo ne. Kampe ne anweba mwaumvwanga bingi bukaji, kwizhachisha, kwakamwa ne kutendeka kulanguluka’mba inge kyanema kwikala na bumi.

Kechi kyatama kwikala na bulanda pa kimye kyabaya ne. Kuba bino kumweshatu patoka kuba’mba muntu wafwa mwamutemenwe bingi. Nanchi kino kibena kulumbulula’mba kechi mukaleka kumvwa bulanda nenyi?

Kimye kimo mwakonsha kumona nobe bulanda bwenu kechi bukapwa ne, bino mashinda alondelapo akonsha kwimutekenesha bingi.

KECHI KYATAMA KUMVWA BULANDA NE

Bantu bamwesha bulanda mu mashinda apusana pusana. Bino yukai kuba’mba kujila kukepeshako bulanda. Ba Vanessa bo twakwambapo kala baambile’mba: “Bimye bimo najilanga pa kuba’mba nkepesheko bulanda.” Ba Sofía bafwishishe nkasabo wa mukazhi baambile’mba: “Kinkola bingi ku muchima inge nalanguluka kyalengejile nkasami kufwa, naumvwinengatu nobe muntu ye babika mukele pa kilonda. Nangwa kya kuba mukele ukola bingi pa kilonda, bino ulengela kilonda kupwa bukiji.”

BUULAIKO BAKWENU BYO MUBENA KUMVWA KU MUCHIMA

Ibyo kuba’mba kimye kimo mwakonsha kukebatu kwikala bunke bwenu. Bulanda buji nobe kisendwa  kyanema bingi kyo mwakonsha kubula kusenda bunke bwenu. Jared uji na myaka 17 wafwishishe bashanji waambile’mba: “Nabuulangako balunda nami byo naumvwanga ku muchima. Namonanga nobe kechi kyayilamo kuba bino ne. Pano bino kuba bino kwankwashishe bingi.” Ba Janice bo twaambapo mu mutwe mutanshi, nabo baambile pa ene mambo o kyanemena kubuulako balunda byo mubena kumvwa ku muchima. Baambile’mba: “Kubuulako balunda nami byo naumvwanga ku muchima kwantekeneshe bingi. Balunda nami bantele bingi muchima kabiji kechi namonanga’mba nji bunke ne.”

LONDELAINGA BYO BEMUBULA

Dokotala umo waambile’mba: “Bantu bafwisha balongo nangwa balunda nabo inge balondela bibabula balunda ne balongo babo kibakwasha kukepeshako bulanda bo baji nabo.” Bulainga balunda nenu byo mubena kukeba amba bemukwashe. Kyanema bingi kuba bino mambo kikebalengela kuyuka byo bakonsha kwimukwasha.—Byambo bya Maana 17:17.

FWENYAI KWIPI NE LESA

Ba Tina baambile’mba: “Bamwata bami byo bafwile na kikola kya kansa, kafwako muntu mukwabo ye nabuulangako makatazho ami ne, kanatu Lesa kwapwa. Pa kubuka, namubuulanga kuba’mba ankwashe kwingila mingilo yo nafwainwe kwingila pa jojo juba. Lesa wankwashishe mu mashinda apusana pusana kwakubula ne kuketekela. Ba Tarsha bajinga na myaka 22 kimye kyafwile bainabo, baambile’mba: “Kutanga Baibolo moba onse kwantekeneshanga bingi. Kuba bino kwandengelanga kwikala na bintu byawama bya kulangulukapo pa jojo juba.”

LANGULUKAINGA PA LUSANGUKO

Ba Tina baambile ne kuba’mba: “Nayukile’mba kukekala lusanguko, pano bino kino kechi kyantekeneshanga ne mambo nakebanga bingi kwikala na bamwata wami. Kabiji baana nabo bakebanga bingi kwikala na bashabo. Pano byo papichile myaka ina kufuma po bafwijile, popo natendekele kulanguluka pa luketekelo lwa lusanguko. Nafwanyikizhanga kwikala na bamwata wami jibiji, kabiji kino kyandengelanga bingi kwikala na lusekelo.”

Kechi mukekala na lusekelo ponkapotu ne. Nangwa byonkabyo, byapichilemo ba Vanessa byakonsha kwimutundaika bingi. Baambile’mba: “Mwakonsha kumona nobe bijikila kechi bikapwa ne, bino mu kuya kwa kimye byonse byo mubena kupitamo bikapwa.”

Vulukai kuba’mba nangwa kya kuba bintu byo mubena kupitamo kechi bikapwijijilatu ne, bino mu kuya kwa kimye bijikila byo muji nabyo bikakepako. Na bukwasho bwa Lesa, mwakonsha kwikala na lusekelo ne kuyuka ene mambo o mwaikela na bumi. Katatakatu Lesa akasangule bantu bafwa. Kabiji ukeba’mba mukamonañane na balongo benu ne balunda nenu bafwa. Inge kino kyaubiwa, ko kuba’mba kechi mukekalapo na bulanda jibiji ne.