Mu mutwe wafumako, twaji kwamba pa byaambilepo Yesu bya kuyukilako’mba Bufumu bwa Lesa bwafwenya pepi. Bino bintu bitulengela kushiinwa kuba’mba Bufumu bwa Lesa bwaikajikwa mwiulu kabiji Yesu Kilishitu ye watongolwa kwikala Mfumu.

Baibolo waamba’mba Yesu byo aikeletu Mfumu, Satana ne bandemona banji wibapangilemo mwiulu. Luno Satana ne bandemona banji bengijilatu pano pa ntanda. O ene mambo bintu o byatamina bingi pano pa ntanda kutendekatu mu mwaka wa 1914.—Lumwekesho 12:7, 9.

Nangwa kya kuba bintu bibena kutaminakotu mu ntanda, bino Yesu, aye Mfumu wa Bufumu bwa Lesa ubena kuba bintu bibena kukwasha bantu pano pa ntanda ponse. Mubena kufuma bintu byawama bingi mu uno mwingilo Yesu ye aambijile jimo wa kufunjisha bantu Baibolo. Bantu bavula babena kufunda ne kwingijisha mafunde a mu Baibolo mu bwikalo bwabo. (Isaya 2:2-4) Kabiji bavula bafunda bya kwikala na lusekelo mu kisemi, ne kubula kukizhamo kunemeka nkito nangwa kunemeka bya bunonshi kukila bintu byonse mu bwikalo bwabo. Bintu bibena kufunda bano bantu bibena kwibakwasha abo bene lonka luno ne  kwibalengela kwikala bantu Lesa bo akaswisha kwikala mu Bufumu bwanji.

Nangwa kya kuba Yesu ubena kulama mwiulu, bino makafulumende a bantu po akiji pano pa ntanda. Lesa wakambizha Yesu amba: “Yanga na kushinda balwanyi bobe.” (Salamo 110:2) Katatakatu Yesu akazhiye balwanyi banji bonse ne kupokolola bantu bakookela Lesa.

Katatakatu Bufumu bwa Lesa

• Buzhiye bupopweshi bwa bubela bonse. Katatakatu bupopweshi bonse bufunjisha bya bubela pe Lesa ne kuyanjisha bantu bebuzhiye. Baibolo utela bupopweshi bwa bubela bonse amba pite. Bantu bavula bakakumya bingi bupopweshi bwa bubela byo bakebonauna.—Lumwekesho 17:15, 16.

• Bufumyepo bukalama bwa bantu. Bufumu bwa Lesa bukeya ne kupwisha bukalama bwa bantu bonsetu.—Lumwekesho 19:15, 17, 18.

• Buzhiye bantu babi. Ki ka kikamwekela bantu babula kukeba kuleka byubilo byabo byatama bakaana kukookela Lesa? “Pakuba bantu babi bakebonauna ne kwibafumyapo pano pa ntanda.”—Byambo bya Maana 2:22.

• Bufumyepo Satana ne bandemona banji. Satana ne bandemona banji bakebazhiya pa kuba’mba bakabule “kujimbaika jibiji bisaka bya bantu.”—Lumwekesho 20:3, 10.

Pano kikekala byepi ku basalapo kutundaika Bufumu bwa Lesa?

Yesu byo aji Mfumu mwiulu, ukoba bintu bikabula kubapo bantangi ba bantu. Yesu ukalamanga pamo na ba 144, 000, bo basala kufuma mu bisaka bya bantu. (Lumwekesho 5:9, 10; 14:1, 3) Yesu ukafikizha kyaswa muchima wa Lesa pano pa ntanda. Pano ñanyi bintu Bufumu bwa Lesa byo bukobila bantu kulutwe?

• Bukafumyapo bikola ne lufu. “Kafwako muntu nangwa umo . . . ukamba’mba: ‘Nakolwa’ ne,’” kabiji ‘lufu kechi lukekalako jibiji ne.’—Isaya 33:24; Lumwekesho 21:4.

• Bukaleta mutende wa kine ne luzhikijilo. “Mutende wa baana bobe ukavula bingi,” kabiji “muntu yense ukekala munshi ya muñanzañanza wanji ne munshi ya kichi kyanji kya mukuyu, kabiji kafwako nangwa umo ukebalengesha moyo ne.”—Isaya 54:13; Mika 4:4.

• Bukapa bantu mingilo yawama. ‘Bantu bami basalwa bakamwenamo lusekelo mu mingilo yo bakengilanga. Kechi bakengilanga kyatutu ne.’—Isaya 65:22, 23.

• Bukawamisha ntanda. “Bisanzangala ne ntanda yauma bikasangalala, ne kiselebwa kikasekela ne kwikala na maluba avula.”—Isaya 35:1.

• Bukafunjisha bantu byo bafwainwa kuba pa kuba’mba bakekalenga myaka ne myaka. “Pa kuba’mba bakekale na bumi bwa myaka ne myaka, bafwainwa kwimuyuka anweba Lesa yenka wa kine, ne Yesu Kilishitu ye mwatumine.”—Yoano 17:3.

Lesa ukeba’mba ne anweba mukeyowe ano mapesho. (Isaya 48:18) Mutwe walondelapo walumbulula byo mwafwainwa kuba pa kuba’mba mukekale buno bwikalo bwawama.