• Kusalwa na Lesa. ‘Amiwa naikajika mfumu wami . . . Nkamupa bisaka bya bantu kwikala buswanyi bwanji ne ntanda yonse kwikala bunonshi bwanji.’—Salamo 2:6, 8.

• Kwikala wa mu kisemi kya Mfumu Davida. “Kwasemwa mwana, betupa mwana wa mulume . . . Bukalama bwanji bukabayilangakotu, ne mutende ye akaleta kechi ukapwa ne, aye ukekala pa jitanda ja kwa Davida ne ja bufumu bwanji pa kuba’mba akebwikajike.”—Isaya 9:6, 7.

• Kusemenwa mu Betelema. “Betelema . . . , mwi obewa mo mukafuma ukekala kalama . . . Bukata bwanji bukafika kwapela ntanda.”—Mika 5:2, 4.

• Kwikala muntu ye bakaine ku bantu ne kumwipaya. “Bamulengulwile, kabiji twamumonanga nobe watutu. . . . Bino aye bamwashile na mambo a mambo etu; bamumanyikile na mambo a bubi bwetu.”—Isaya 53:3, 5.

• Kwikala muntu ye basangwile ne kumutumbijika. “Anweba kechi mukandekela mu Kilende ne. Kechi mukaswisha kalume wenu wa kishinka kumona kimbo ne. . . . Mu kuboko kwenu kwa kilujo muji lusekelo lwa myaka ne myaka.”—Salamo 16:10, 11.

Kufumatu kala kufika ne lelo jino, kujitu muntu umo wafikilamo kwikala Kalama wawama kwesakana na bino bishinka byo twaambapo. Uno muntu ke Yesu Kilishitu. O ene mambo, malaika o abuujijile Maliya inanji Yesu amba: “Lesa ukamupa jitanda ja kwa Davida shanji, . . . ne Bufumu bwanji kechi bukapwa ne.”—Luka 1:31-33.

Yesu kechi waikelepo kalama byo ajinga pano pa ntanda ne. Bino ukalamanga bantu saka aji Mfumu mwiulu mu Bufumu bwa Lesa. Ki ka kyalengela Yesu kufikilamo kwikala Kalama? Akilangulukai pa bintu byo aubile byo ajinga pano pa ntanda.

•   Yesu watele bingi bantu muchima. Yesu wakwashanga bantu bonsetu bafumanga mu mapunzha apusana pusana, banabalume, banabakazhi, banyike, bakulumpe, bayanji ne banonshi. (Mateo 9:36; Mako 10:16) Muntu umo wa mbumba byo amusashijile’mba: “Umvwe mwaswa, mbukai,” Yesu wamumvwijile lusa ne kumubuka.—Mako 1:40-42.

• Yesu witufunjishe bya kutokesha Lesa ku muchima. Waambile’mba: “Kechi mwakonsha kwingijila Lesa ne Nsabo pa kimye kimo ne.” Yesu waambile ne kuba’mba bintu byonse byo tukeba bantu kwitubila, ne atweba twafwainwa kwibobilabyo. Jino jifunde jitelwa’mba Jifunde Jikatampe. Kabiji waambile ne kuba’mba bintu byo tulangulukapo byakonsha kufichisha Lesa ku muchima. Onkao mambo, pa kuba’mba tutokeshe Lesa ku muchima, twafwainwa kuchinuzhukanga kulanguluka pa bintu byo ashikwa. (Mateo 5:28; 6:24; 7:12) Kabiji Yesu waambishetu kuba’mba inge tukeba kwikala na lusekelo, twafwainwa kufunda bikeba Lesa ne kwibyubanga.—Luka 11:28.

• Yesu witufunjishe kutemwa bakwetu byo kulumbulula. Byambo ne byubilo bya kwa Yesu byatundaikanga bingi bantu. “Jibumba jakuminye bingi mo afunjishishenga, mambo wibafunjishenga na luusa.” (Mateo 7:28, 29) Wibafunjishe’mba: “Temwainga balwanyi benu.” Kabiji walombejileko ne bantu bamwipayilenga amba: “Tata, balekelaiko mambo, mambo kechi bayuka kyo babena kuba ne.”—Mateo 5:44; Luka 23:34.

Yesu ye Kalama wafikilamo kulama bantu pano pa ntanda ponse mambo uji na lusa ne kifyele. Pano ñanyi kimye Yesu kyo akatendeka kulama?