Yesu waambile’mba: “Kisaka kikalukuka kisaka kikwabo ne bufumu bukalukuka bufumu bukwabo. Kukekala bitentanshi bikatampe, ne bipowe bya nzala ne myalo kuku ne kuku.” (Luka 21:10, 11) Bintu bibena kumweka bimweshatu patoka amba, “Bufumu bwa Lesa buji pepi.” Nanchi bino bintu bibena kumweka pa kimye kimo mwaya ntanda nyi? Ee. Twayai twisambe pa bino bintu bimo.

1. MAKONDO

Mu 1914, kwabukile nkondo ikyangye kwikalako pano pa ntanda yaipayile bantu bavula bingi. Bashayuka ba bya mpito bamba’mba mwaka wa 1914 ye mwaka wapimpwile bwikalo bwa bantu mambo mo mwabukile nkondo itanshi ya ntanda yonse. Mu ino nkondo, momo baingijishe bilwilo byashinta byavula bingi nabiji myotoka ya nkondo, mabomba o baponesha na madeke, mata akatampe, mwela wa bulembe ne bilwilotu bikwabo bipayañana. Ino nkondo byo yapwile, kwabukile nkondo ikwabo ya ntanda yonse ya bubiji yalengejile bantu kutendeka kulenga mabomba a mwela wa bulembe ne kwiengijisha pa kimye kitanshi. Kufumatu mu mwaka wa 1914, bantu batwajijila kulwa makondo mu mapunzha apusana pusana abena kwipaya bantu bavula bingi.

2. BITENTANSHI

Buku umo waamba’mba pa mwaka pa mwaka kubena kwikala bitentanshi bikatampe kukila pa 100 bibena konauna bintu byavula bingi. (Britannica Academic) Kabiji kipamo kimo kyataaine kuba’mba “kufuma mu 1900, pa mwaka pa mwaka kwikala bitentanshi bikatampe kukila pa 16.” (United States Geological Survey) Bantu bamo bamba’mba bitentanshi kechi byavujilako ne. Amba kibena kulengela kumona nobe byavujilako ke biñambañamba byo babena kwingijisha pa kuyuka ne kubala bitentanshi.” Bino kishinka ke kya kuba’mba bitentanshi bikatampe bibena kumweka mwaya ntanda bibena kulengela bantu bavula kuyanda bingi kukila byo kyajinga kala.

 3. BIPOWE BYA NZALA

Makondo, mazhikakanwa, kukatazha kwa bwikalo, kubula kuyuka bunjimi nangwa bikekala mvula ko kubena kulengela bipowe bya nzala mu ntanda. Kipamo kimo kyaambile pa mwaka wa 2018 amba: “Bantu 821 milyonyi kechi baji na bya kuja byawaina ne. Kabiji bantu 124 milyonyi balalatu na nzala. (“World Food Programme’s ‘2018 Year in Review.’”) Kikola kiya na mambo a nzala kilengela baana kukila pa 3,100,000 kufwa pa mwaka pa mwaka. Mu mwaka wa 2011, kino kyo kikola kyaipayile pepi na kichika kya baana bonse bafwile mwaya ntanda yonse.

4. BIKOLA NE MYALO

Kipamo kya World Health Organization kyaambile’mba: “Mu myaka 20 yapitapo kwajinga myalo yavula bingi. Bikola bya kala nabiji kolela ne bikola bya mashika (plague ne yellow fever) byabwela. Kabiji kwaiya ne bikola bikwabo byakatataka nabiji SARS, kipeepe, MERS, Ebola ne Zika.” Nangwa kya kuba badokotala ne basayansi bafunda byavula bingi pa bikola, bino kechi bataana muchi wa bino bikola bimo ne.

5. MWINGILO WA KUSAPWILA

Yesu waambile pa kiyukilo kikwabo kya kuyukilako moba akupelako amba: “Ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.” (Mateo 24:14) Nangwa kya kuba bantu mwaya ntanda babena kupita mu makatazho avula bingi, bino kuji bantu kukila pa 8 milyonyi babena kusampanya mambo awama a Bufumu bwa Lesa mu byalo kukila pa 240, mu milaka kukila pa 1,000. Kino kikyangye kumwekapo kala pano pa ntanda.

Bintu byaambilepo Yesu bya kuyukilako moba a kupelako bibena kumweka mu ano moba. Mambo ka o twafwainwa kutelako muchima? Mambo Yesu waambile’mba: “Umvwe mwamona bino bintu na kumweka, yukai’mba Bufumu bwa Lesa buji pepi.”—Luka 21:31.

Abino bintu byaambilepo Yesu, kwesakana na byaamba Baibolo bitulengela kuyuka kuba’mba Lesa waikajikile Bufumu bwanji mwiulu mu 1914. * Mu yewa mwaka, Lesa wabikile Mwananji, aye Yesu Kilishitu pa Bufumu. (Salamo 2:2, 4, 6-9) Katatakatu Bufumu bwa Lesa butendeke kulama pano pa ntanda, kabiji bukafumyapo makafulumende onse ne kuleta Paladisa mukekalanga bantu myaka ne myaka.

Katatakatu byambo biji mu lulombelo Yesu lo afunjishe baana banji ba bwanga bikafike bya kuba’mba: “Bufumu bwenu bwiye. Kyaswa muchima wenu kyubiwe pano pa ntanda, byonka byo kibena kubiwa mwiulu.” (Mateo 6:10) Pano Bufumu bwa Lesa bubena kuba ka kufuma po bwatendekejile kulama mwiulu mu 1914? Kabiji ñanyi bintu byo twafwainwa kutengelanga inge bukatendeke kulama pano pa ntanda?