Mambo ka o Tukebela Bufumu bwa Lesa?
Bantu batanshi byo balengelwe, Mulenga wetu, Lesa yenka wa jizhina ja Yehoba, ye wibatangijilangatu kwapwa. Yehoba wibalamanga na butemwe. Wibalengejile bujimi bwa Edena bwawamine bingi mo baikalanga. Kabiji wibapele kajo kavula bingi. Kikwabo, wibapele ne mingilo yawama. (Ntendekelo 1:28, 29; 2:8, 15) Ne luno bantu inge bekala bulongo, inge baji batwajijile kukookela Lesa wibalamanga na kifyele.
Adama ne Evwa bakaine bukalama bwa Lesa
Baibolo waambapo pa malaika umo wasatukile utelwa’mba Satana Diabola. Uno malaika walengulwile bukalama bwa Lesa. Satana walengulwilenga’mba bantu bakonsha kwikala bingi bulongo inge Lesa waleka kwibatangijila. Kyataminekotu, bansemi yetu batanshi baumvwijile Satana ne kusatukila Lesa.—Ntendekelo 3:1-6; Lumwekesho 12:9.
Adama ne Evwa byo bakaine bukalama bwa Lesa, bebapangile mu Paladisa mo baikalanga. Kabiji kechi batwajijile kwikala myaka ne myaka ne. (Ntendekelo 3:17-19) Kyo baubile kyaletelejile bantu bonsetu. Baibolo waamba’mba Adama byo asatukile, “ne lufu nalo lwaishijile mu bundengamambo.” (Loma 5:12) Bundengamambo bwaletele lukatazho lukwabo. Bantu batendekele kulama “bantu bakwabo na kwibayanjisha.” (Musapwishi 8:9) Kino kibena kulumbulula’mba bantu kechi bakonsha kulama bakwabo kwa kubula makatazho ne.
BUKALAMA BWA BANTU BYO BWATENDEKELE
Nimalode wasatukijile Yehoba
Muntu mutanshi kulama bantu ye baambapo mu Baibolo ke Nimalode. Nimalode wakaine bukalama bwa Yehoba. Kufumatu mu moba a kwa Nimalode, bantu bekala pa bifulo bayanjisha bingi bantu bo balama. Papita ne myaka kukila pa 3,000, kufuma Mfumu Solomone po anembejile’mba: “Namwene byajijilenga bantu bo bamanyikilenga, kabiji kechi kwajinga wa kwibatekenesha ne. Kabiji bantu bebamanyikilenga, bebakijile bulume.”—Musapwishi 4:1.
Bukalama bwa bantu ne lunotu byo buji. Mu 2009, kipamo kya United Nations kyaambile’mba bukalama bwatama bo bubena “kuleta bingi bufinda mu bwikalo bwa bantu.”
KATATAKATU LESA OBEPO KIMO!
Ntanda yonse ibena kukebewa bantangi bawama ne kafulumende ulama bantu bulongo. Abino byo byalaya kuba Mulenga wetu katatakatu!
Nangwatu makafulumende a bantu awama akankalwa kupwisha makatazho a bantu
Lesa walenga kafulumende, nangwa’mba Bufumu bukafumyapo bukalama bwa bantu bonse, kabiji “abo bukekala myaka ne myaka.” (Danyela 2:44) Buno bo Bufumu bulombapo bantu bavula kuba’mba bufike. (Mateo 6:9, 10) Bino Lesa kechi ukalamanga aye mwine ne. Lesa watongola Kalama waishile ne kwikala muntu pano pa ntanda. Ñanyi yenkao Lesa ye atongola kwikala kalama?
Mwakonsha Kutemwa
MEPUZHO A MU BAIBOLO A KUMBULWA
Nanchi Bufumu bwa Lesa Buji mu Muchima Wenu Nyi?
Byambo biji mu Baibolo bya kuba’mba “bufumu bwa Lesa buji mukachi kenu” byalumbulula ka?
