Kyo kimotu, bonse tubena kwikala mu moba akeshilamo “kinkunkwila kikatampe,” Yesu kyo atelele’mba “malwa akatampe.” (Mateo 24:21) Kechi twakonsha kwianyema ano malwa ne. Pano bino kuji byo twafwainwa kuba pa kuba’mba tukazhikijilwe. Twafwainwa kuba ka?

Mu Jashi ja pa Mutumba, Yesu Kilishitu waambile pa byo twafwainwa kuba amba: “Twajijilai na kukeba Bufumu [bwa Lesa] patanshi ne bololoke bwanji.” (Mateo 6:33) Twakonsha kuba byepi bino?

Kebainga patanshi Bufumu bwa Lesa. Kino kibena kulumbulula kwibunemeka kukila bintu byonse mu bwikalo bwetu. (Mateo 6:25, 32, 33) Mambo ka o twafwainwa kwibunemekela bino? Mambo bantu bakankalwa kupwisha makatazho abena kupitamo bantu. Bufumu bwa Lesa bo bonkatu bwakonsha kuba bino.

Kebainga bololoke bwanji. Twafwainwa kwibikako kulondela mizhilo ne mafunde a Lesa. Mambo ka? Mambo inge ke twisajile kyawama ne kyatama atweba bene, mukafuma kalulu kuvimba meso. (Byambo bya Maana 16:25) Pa kuba inge ke tukookele mizhilo ya Lesa, tumutokesha ku muchima kabiji tumwenamo byawama ne atweba bene.—Isaya 48:17, 18.

Twajijilai na kukeba patanshi Bufumu bwa Lesa ne bololoke bwanji. Yesu witujimwineko kuba’mba twafwainwa kujimuka kuchiina’mba twakalabikwa ne kutendeka kulanguluka’mba twakonsha kuzhikijilwa  inge twaikala na mali avula. Bakwabo nabo bijikila bya mu bwikalo bibalengela kubula kuta muchima pa kukeba Bufumu bwa Lesa.—Mateo 6:19-21, 25-32.

Pano bino, Yesu walayile kuba’mba bonse batundaika Bufumu bwa Lesa bebapa byo bakajilwa luno, kabiji bakeyowa mapesho a myaka ne myaka kulutwe.—Mateo 6:33.

Nangwa kya kuba baana ba bwanga batanshi ba kwa Yesu batangizheko Bufumu bwa Lesa ne bololoke bwanji patanshi mu bwikalo bwabo, bino makatazho ne buyanji kechi byapwile mu oa moba ne. Bino bazhikijilwe. Mu ñanyi jishinda?

Kulondela mafunde a Lesa kwibazhikijilanga ku makatazho eletelelanga bantu balengululanga byamba Lesa. Lwitabilo lwabo lwakosa lwa kuba’mba katatakatu Bufumu bwa Lesa bwiye lwibalengelanga kuchinchika bya malwa byapusana pusana. Kabiji Lesa wibapele “bulume bwakila bwa bantu” bwa kwibakwasha kuchinchika.—2 Kolinda 4:7-9.

Bena Kilishitu batanshi bakookejile mukambizho wa kwa Yesu wa kukeba Bufumu patanshi. Basapwijile mambo awama a Bufumu mu mapunzha avula. (Kolose 1:23) Nanchi mu ano moba kujipo babena kuba bino nyi?

Ee ko baji! Bakamonyi ba kwa Yehoba bashiinwa’mba katatakatu Bufumu bwa Lesa bulete mpelo ya buno bwikalo. Onkao mambo, bebikako na muchima yense kulondela byambo byaambile Yesu bya kuba’mba: “Ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.”—Mateo 24:14.

Mwafwainwa kuba byepi pa mambo awama o babena kusapwila? Tubena kwimutundaika kuba byonka byaubile bantu baikalanga mu muzhi wa Beliya wajinga mu Makedonya. Byo baumvwine mambo awama asapwijilenga mutumwa Paulo, beatambwijile “na muchima yense ne kubalaula bulongo Binembelo” pa kuba’mba bayuke inge bintu byo baumvwine byajinga bya kine nangwa ne. Byo bashiinwe batendekele kulondela byo bafunjilenga.—Byubilo 17:11, 12.

Ne anweba mwafwainwa kuba byo baubile. Inge mwatendeka kukeba Bufumu bwa Lesa ne bololoke bwanji patanshi, mukazhikijilwa mu ano moba kabiji kulutwe mukekalanga mutende kwa kubula wa kwimulengesha moyo.