Byo Twafwainwa Kuba pa Kuba’mba Tukatwele mu Ntanda Ipya
Mutwe wafumako waamba’mba katatakatu Lesa akafumyepo makatazho onse pano pa ntanda. Twashiinwa kuba’mba ukekyuba. Ñanyi kintu kyalengela kushiinwa? Mambo byo byaamba Mambo a Lesa amba:
“Pano pa ntanda pabena kupita.”—1 YOANO 2:17.
Twashiinwa kuba’mba pano pa ntanda pakekalanga bantu bakapuluka, mambo kinembelo kya 1 Yoano 2:17 kyaamba ne kuba’mba:
“Awa uba kyaswa muchima wa Lesa ukekala myaka ne myaka.”
Onkao mambo, twafwainwa kubanga kyaswa muchima wa Lesa pa kuba’mba tukapuluke. Pa kuba’mba tuyuke kyaswa muchima wa Lesa, twafwainwa patanshi ku muyuka Lesa.
“BAFWAINWA KWIMUYUKA ANWEBA” LESA PA KUBA’MBA BAKAPULUKE
Yesu waambile’mba: “Pa kuba’mba bakekale na bumi bwa myaka ne myaka, bafwainwa kwimuyuka anweba Lesa yenka wa kine.” (Yoano 17:3) Onkao mambo, pa kuba’mba tukapuluke ne kutwela mu ntanda ipya, twafwainwa ‘kumuyuka’ Lesa. Kino kibena kulumbulula’mba kechi kupelelatu pa kuyukatu amba Lesa ko aji nangwa kuyukatu bishinka bicheche pe aye ne. Lesa wafwainwa kwikala mulunda netu. Inge mukeba bulunda pakachi kenu kukosa, mwafwainwa kwisambanga ne kutanwanga pamo. Byo byo twafwainwa kubanga inge tukeba bulunda bwetu ne Lesa kukosa. Tangai bukine bumo buji mu Baibolo muyuke byo bwafwainwa kwimukwasha kwikala na bulunda bwawama ne Lesa.
TANGAINGA BAIBOLO MOBA ONSE
Mwafwainwa kulombanga kwi Lesa ne kutwajijila kuba kyaswa muchima wanji pa kuba’mba mukatwele mu ntanda ipya
Tuja kajo moba onse pa kuba’mba twikale na bumi. Nangwa byonkabyo, Yesu waambile’mba “Muntu kechi ukamwena bumi mu kajo konkatu ne, poso ne mu byambo bifuma mu kanwa ka Yehoba.”—Mateo 4:4.
Lelo jino, mambo a Yehoba aji mu Baibolo. Onkao mambo, inge saka tutanga Mambo a Lesa, tukayuka bukine bwanema bwaamba pa bintu byaubile Lesa kala, byo abena kuba luno ne byo akoba kulutwe.
LOMBAINGA LESA KWIMUKWASHA
Mwafwainwa kuba byepi pa kuba’mba mulondele bimukambizha Lesa inge kya kuba kimukatazha kuchinuzhuka bintu byo ashikwa? Kuyuka Lesa bulongo kwafwainwa kwimukwasha.
Akimonai byaubile mwanamukazhi wa jizhina ja Sakura, waikelenga bwikalo buncha. Byo atendekele kufunda Baibolo, wafunjile mukambizho wa Lesa wa kuba’mba “Chinai bulalelale.” (1 Kolinda 6:18) Sakura walombele kwi Lesa kumukwasha kusankilapo byubilo byanji byatama. Ne luno kimukatazha kushinda uno muteeto. Waambile’mba, “Inge naikala na milanguluko yatama, mfikenatu kulomba kwi Yehoba, kumubula byonse biji ku muchima, mambo nayuka’mba bunke bwami kechi nafwainwa kushinda uno muteeto watama ne. Kulomba kwi Yehoba kwankwasha kufwenya kwipi ne aye.” Byonkatu byaubile Sakura, bantu bavula lelo jino bamuyuka Lesa. Kabiji ubena kwibapa bulume bubena kwibakwasha kupimpula byubilo byabo ne kumutokesha ku muchima.—Filipai 4:13.
Inge mwamuyuka Lesa byo aji, ‘mukayukanyikwa kwi aye’ ne kwikala balunda nanji. (Ngalatiya 4:9; Salamo 25:14) Kuba bino kukemulengela kupuluka ne kutwela mu ntanda ipya ya Lesa. Pano ñanyi bintu byawama bikekala mu ntanda ipya? Mutwe walondelapo wakumbula buno bwipuzho.
a Baibolo waamba’mba Lesa jizhina janji Yehoba.