BANTU

Baibolo Waamba’mba: Lesa “kechi wiilengele [ntanda] kwikala yatutu ne, bino wiilengele’mba mukekalenga bantu.”—ISAYA 45:18.

NTANDA

Baibolo Waamba’mba: “Kisemi kimo kipita kabiji kisemi kikwabo kiiya, pakuba ntanda yaikala myaka ne myaka.”—MUSAPWISHI 1:4.

BYO KILUMBULULA: Baibolo wamba’mba, ino ntanda kechi bakeyonauna ne, kabiji bantu bakatwajijila kwikalapo. Nanchi byambo bya kuba’mba konuana ntanda bilumbulula ka?

KISHINKA KYA KULANGULUKAPO: Baibolo waamba’mba byonka byo kyajinga mu moba a kwa Nowa byobyo kikekala ne ku ino ntanda. Pa kyo kya kimye pa ntanda ‘pakumbene bukapondo.’ (Ntendekelo 6:13) Nangwa byonkabyo, Nowa wajinga muntu waoloka. O ene mambo Lesa o amupulwishe pamo na kisemi kyanji, bino waonawine bantu babi na muyulo. Baibolo walumbulula bintu byamwekele pa kyo kya kimye amba: “Aya ntanda yaonaikile kimye kyo yalobele mu mema.” (2 Petelo 3:6) Byobyo baonawine ntanda yajingako pa kyo kya kimye. Pano bwipuzho ke bwa kuba’mba, ñanyi bintu byo baonawine? Kechi baonawine ntanda ne, pa kuba baonawine bantu babi bajinga pa ntanda. Onkao mambo, inge Baibolo waamba pa konauna ntanda, kechi ulumbulula konauna ino ntanda yo twikalapo ne. Pa kuba ulumbulula konauna bantu babi ne bintu byatama biji pano pa ntanda.

MAKATAZHO NE BUBI

Baibolo Waamba’mba: “Kwashalatu pacheche, babi kechi bakekalako ne; ukatajisha po baikalanga, kabiji kechi bakekalapo ne, pakuba bakimote bakaswana ntanda, kabiji bakasangalelanga mu kuvula kwa mutende.”—SALAMO 37:10, 11.

BYO KILUMBULULA: Kimye kya muyulo kechi baonawine babi bonse ne. Mambo muyulo byo apwile bantu babi babwelele jikwabo pa ntanda. Nangwa byonkabyo, katatakatu Lesa akafumyepo babi bonse. Byonka byaamba ñimbi wa Masalamo amba: “Babi kechi bakekalako” ne. Lesa ukafumyapo bubi bonse kwingijisha bufumu bwanji ko kuba’mba kafumulumende wa mwiulu ukalama bantu bonse pano pa ntanda.

KISHINKA KYA KULANGULUKAPO: Nanchi ba kalama babena kulama ino ntanda bakatundaikako Bufumu bwa Lesa nyi? Baibolo waamba’mba kechi bakatundaikako Bufumu bwa Lesa ne. Bakalengulula Bufumu bwa Lesa. (Salamo 2:2) Ñanyi kintu kikafumamo? Kafulumende wa Lesa ukafumyapo makafulunde a bantu ‘kabiji ukekala myaka ne myaka.’ (Danyela 2:44) Nanchi kijitu bulongo makafulumende a bantu kwiafumyapo nyi?

Baibolo Waamba’mba: “Muntu mwine kechi uji na luusa lwa kwitangijila mu jishinda jo afwainwa kuyamo ne.”—YELEMIYA 10:23.

BYO KILUMBULULA: Bantu kechi bebalengele kuba’mba bakatangijilenga bakwabo ne. Kechi bayuka kulama bantu bakwabo ne, kabiji bakankalwa kupwisha makatazho.

KISHINKA KYA KULANGULUKAPO: Buku wa Britannica Academic waamba’mba “makafulunde a bantu kyamweka akankalwa kufumyapo buyanji, nzala, bya malwa, ne nkondo nangwa bukapondo.” Kabiji watwajijila’mba: “Bantu bamo . . . baitabila kuba’mba kafulumende wa Lesa yeyenkatu wafwainwa kufumyapo ano makatazho ntanda yonse.” Nangwa kya kuba makafulumende onse akakwatankana pamo, kechi akonsha kupwisha ano makatazho ne, mambo babena kulama bambulwa kulumbuluka. Bufumu bwa Lesa bo bonkatu bwafwainwa kufumyapo makatazho onse pano pa ntanda.

Onkao mambo, Baibolo waamba’mba bantu kechi bafwainwa kwakamwa pa kumvwa’mba ntanda bakeyonauna ne. Mambo akino ke kintu kyawama kyo tubena kutengela kufumyapo ntanda muji bantu babi ne kupingizhapo ntanda yawama!

Ñanyi kimye kikamweka bino bintu byonse? Mutwe walondelapo wakumbula buno bwipuzho.