Katatakatu, bufumu bwa Lesa bukatendeke kulama pano pa ntanda. Inge bwatendeka kulama pakawama bingi kabiji bantu bakakwatana ne kumwenamo mu mingilo yabo. Lesa watongola Yesu Kilishitu kutangijila mwingilo wa kulama ino ntanda. Lelo jino bakalama kechi bata muchima bantu ne. Bino Yesu aye wata muchima bantu kabiji ukebobila bintu byawama. Ukalama mu butemwe, kubila bantu lusa ne kifyele, kabiji ukekala mfumu wawama.—Isaya 11:4.

Bantu bakekalanga pano pa ntanda kechi bakekala na misalululo na mambo byalo nangwa milaka ne. Bantu bonse bakakwatakana. (Lumwekesho 7:9, 10) Bantu bonse bakekalanga mu ino ntanda bakatemwa Lesa ne kutemwa bakwabo, kabiji bakengijilanga pamo mu mutende pa kuba’mba kyaswa muchima wa Lesa kikobiwe pano pa ntanda.—Salamo 115:16.

Inge Bufumu bwa Lesa bwatendeka kulama pano pa ntanda, Mulenga wetu ukafumyapo bintu byonse bikatazha bantu. (Salamo 24:1, 2) Yesu byo ajinga pano pa ntanda, wamwesheshe bulume bwamupeele Lesa byo azhindamikile luvula pa kalunga ka mema. (Mako 4:39, 41) Mu bukalama bwa Kilishitu, kafwako muntu ukachinanga bya malwa ne. Kabiji Bufumu bwa Lesa bukabwezha mutende wajinga pa banyama ne bantu.—Hoseya 2:18.

Bantu bonse bakekala na butuntulu bwa mubiji bwawama. Kafwako ukakolwanga, kukota, nangwa kufwa ne. (Isaya 35:5, 6) Bantu bakekalanga mu ntanda yawama byonka byaikalanga bamulume ne mukazhi batanshi mu bujimi bwa Edena. Mu ntanda ipya, mushiji ukameneshanga kajo kavula kabiji bantu bonse bakekala na kajo byonkatu byo kyajinga mu Edena. (Ntendekelo 2:9) Byonkatu byaikalanga bena Isalela, mu paladisa namo bantu bonse ‘bakajanga kajo kabo ne kwikuta.’—Bena Levi 26:4, 5.

Mu bukalama bwa Lesa, bantu bonse bakekala mu mutende kabiji bakobilanga bakwabo byawama. Kechi mukekala makondo ne kwingijisha bulume kutama ne. Kabiji kafwako ukakajilwanga bya mu bwikalo ne. Baibolo waamba’mba: “Muntu yense ukekala munshi ya muñanzañanza wanji ne munshi ya kichi kyanji kya mukuyu, kabiji kafwako nangwa umo ukebalengesha moyo ne.”—Mika 4: 3, 4.

Bisemi byonse bikekala na mazubo kabiji kechi bakakamwanga kwibapangamo ne. Bonse tukamwenangamo mu mingilo yo tukengilanga. Byonkatu byaamba Baibolo, aba bakekalanga mu ntanda ya Lesa ‘kechi bakengilanga kyatutu ne.’—Isaya 65:21-23.

Baibolo waamba’mba: “Pano pa ntanda pakakumbana maana a kuyuka Yehoba.” (Isaya 11:9) Bantu bakekalanga mu ntanda ipya bakafunda maana aji na mulenga wabo, aye Yehoba, kabiji bakayuka ne bintu byawama byo alenga. Kabiji kechi bakengijishanga maana abo kulenga bilwilo nangwa kukozha bakwabo ne. (Isaya 2:4) Pakuba bakafundanga byo bafwainwa kwikala mu mutende na bakwabo ne bya kulama ino ntanda.—Salamo 37:11.

Lesa watelepo bingi muchima pa kulenga ino ntanda pa kuba’mba tukekalenga bulongo moba onse. Wakebelenga kuba’mba bantu bakekalenga pano pa ntanda myaka ne myaka. (Salamo 37:29; Isaya 45:18) Pa kuba’mba akafikizhe mulaye wanji Lesa “ukamina lufu myaka ne myaka.” (Isaya 25:8) “Lufu, mabingo, kujila ne misongo kechi bikekalako jibiji ne,” ino yo milaye iji mu Baibolo. (Lumwekesho 21:4) Lesa wanengezha kuba’mba bantu banji bonse, ko kuba’mba, bakapuluka pa malwa akatampe ne boakasangula bakekalenga myaka ne myaka mu ntanda ipya.—Yoano 5:28, 29; Byubilo bya Batumwa 24:15.

 Bantu bavula lelo jino babena kutengela kwikala mu bufumu bwa Lesa bwafwenya kala pepi. Nangwa kya kuba bambulwa kumbuluka pano bino babena kwibikako kwikala na byubilo byawama bikebalengela kutwela mu ntanda ipya. Babena kuba byepi bino? Babena kufunda pe Yehoba Lesa ne pa mwanaji yeatumine, aye Yesu Kilishitu.—Yoano 17:3.

Kebai binshinka muyuke byo mwakonsha kuba pa kuba’mba mukapuluke mpelo ya buno bwikalo ne kwikala mu ntanda ipya ibena kwiya. Swai kwimufunjishanga Baibolo ku Bakamonyi ba kwa Yehoba kwingijisha buku wa kubaʼmba Mukekala Myaka ne Myaka!