“Onkao mambo, labainga ne kukenkenta, mambo kechi mwayuka juba nangwa kimye ne.”—MATEO 25:13.

“Jimukai, mukenkentenga, mambo kechi mwayuka kimye kyatongolwa ne.”—MAKO 13:33.

Onkao mambo, kafwako nangwa umo wayuka kimye kyo bakonauna ino ntanda ne. Nangwa byonkabyo, Lesa wayuka “kimye kyatongolwa,” “juba ne kimye” kyo bakeyonawinamo. (Mateo 24:36) Nanchi kino kilumbulula’mba kechi twafwainwa kuyuka’mba mpelo iji pepi ne nyi? Twafwainwa kuyuka. Yesu wabuujile baana banji babwanga biyukilo byavula bya kuyukilako’mba mpelo ijitu pepi.

Bino bintu byo biyukilo bya “mpelo ya buno bwikalo.” Yesu waambile’mba: “Mambo kisaka kikalukuka kisaka kikwabo ne bufumu bukalukuka bufumu bukwabo, kabiji kukekala bipowe bya nzala ne bitentanshi kuku ne kuku.” (Mateo 24:3, 7) Waambile ne kuba’mba kukekala “myalo.” (Luka 21:11) Nanchi bino bintu byaambilepo Yesu bibena kumweka nyi?

Ano moba makondo, bipowe bya nzala, bitentanshi, ne bikola bibula kupwa bya kumbana ntanda yonse. Mu 2004, kitentanshi kyapichile pa kalunga kakatampe ka Indian Ocean kabiji kyaipaile bantu 225,000. Mu myaka isatu, mwalo wa COVID-19 waipaya bantu bavula bingi ntanda yonse. Yesu waambile’mba inge bintu bya uno muntundu ke bimweke ko kuba’mba mpelo ya buno bwikalo ijitu pepi.

Baibolo watongola moba a kunangijila ku mpelo amba “moba a kupelako.” (2 Petelo 3:3, 4) Pa 2 Timoti 3:1-5, Baibolo walumbulula’mba mu moba a kupelako bantu bakekala na byubilo byatama. (Monai ka kitenguluzha ka kuba’mba “Bintu Bikamweka Mpelo Saka Ikyangye Kufika.”) Mu ntanda ano moba bantu betemwatu abo bene, bajina lwiso, bashinta, kechi batemwa bakwabo ne. Kino nakyo ke kiyukilo kya kuba’mba tubena kwikala mu moba a kupelako.

Ñanyi kimye kikapwa moba a kupelako? Baibolo wamba’mba kwashalatu “kakimye kacheche.” Kepo Lesa akonauna “boba babena konauna ntanda.”—Lumwekesho 11:15-18, tubyambo twa panshi; 12:12.

Lesa wasajila jimo juba ne kimye kyo akonawinamo bantu babi. (Mateo 24:36) Nangwa byonkabyo, Lesa “kechi usaka muntu nangwa umo amba akafwe ne.” (2 Petelo 3:9) Witupa kimye kya kuba kyaswa muchima wanji ne kukokela mikambizho yanji. Mambo ka? Mambo ukeba atweba kukapuluka pa malwa akatampe ne kutwela mu ntanda ipya kimye ino ntanda kyo ikekala paladisa.

Lesa ubena kufunjisha bantu mwaya ntanda pa kuba’mba bakekale bangikazhi mu ntanda ipya. Yesu waambile’mba mambo awama a Bufumu bwa Lesa bakeasapwila “pano pa ntanda ponse.” (Mateo 24:14) Bakamonyi ba kwa Yehoba bonse mwaya ntanda baingijile mabilyonyi a maola pa kusapwila ne kufunjisha bantu Mambo a Lesa. Yesu waambile’mba mwingilo wa kusapwila ukatwajijila kufika ne ku mpelo.

Kwashalatu pacheche kufumyapo bukalama bwa bantu. Nangwa byonkabyo, mwakonsha kupuluka ne kutwela mu ntanda ipya yalaya Lesa. Mutwe walondelapo waamba pa byo mwafwainwa kuba pa kuba’mba mukatwele mu ntanda ipya.