KYAMBA KYA USOPA Na. 3 2018 | Nanchi Lesa Wimuta Muchima Nyi?
NANCHI LESA WIMUTA MUCHIMA NYI?
Inge kwamweka bya malwa nangwa inge bantu bamanama ne kufwa, twipuzha inge kya kuba Lesa umona bino bintu nangwa inge watako muchima. Baibolo waamba’mba:
“Mambo meso a Yehoba aji pa baoloka, ne matwi anji omvwa milombelo yabo ya misashijilo, pakuba Yehoba washikwa bantu boba byatama.”—1 Petelo 3:12.
Kino Kyamba kya Usopa kyalumbulula Lesa byo etukwasha ne byo abena kuba luno pa kuba’mba akafumyepo buyanji.
“Mambo ka Lesa o Aswishisha Kino Kumweka?”
Nanchi bya malwa bya kimulengelapo kwipuzha’mba, nanchi Lesa wanta muchima nyi?
Nanchi Lesa Wimuta Muchima Nyi?
Ñanyi bintu bimwesha’mba Lesa watako bingi muchima ku bintu byo tuba?
Nanchi Lesa Wimuyuka Bulongo Nyi?
Maana a Lesa ne jishinda jo etulengelamo jimweshatu patoka amba wituyuka bingi bulongo. Binembelo byaamba’mba Lesa umona bintu byonse byo tupitamo.
Nanchi Lesa Umvwina Bantu Lusa Nyi?
Baibolo waamba’mba Lesa umona bintu byonse byo tubena kupitamo kabiji witumvwina na lusa.
Buyanji—Nanchi ke Lukabisho Kufuma kwi Lesa Nyi?
Nanchi Lesa wingijisha bikola ne bya malwa kujimwinamo bantu pa bundengamambo bwabo nyi?
Ñanyi Ulengela Bantu Kuyanda?
Baibolo umwesha bintu bisatu bilengela bantu kuyanda.
Katatakatu Lesa Akafumyepo Buyanji Bonse
Twayuka byepi kuba’mba Lesa katatakatu afumyepo buyanji ne shinji?
Kuyuka’mba Lesa Wimutemwa Kwimukwasha
Binembelo bitukwasha kwikala na lwitabilo mu milaye ya Lesa iji kulutwe.
Lesa umvwa byepi inge mubena kuyanda?
Bino binembelo bya mu Baibolo bisa kwimukwasha kuyuka Lesa byo omvwa inge mubena kuyanda.
