Lesa walengele mibiji yetu mu jishinda jawama. Kipatela kya Johns Hopkins Medicine kyalumbulula’mba inge muntu wikozha nangwa waikala na kilonda kikatampe nangwa kicheche, mubiji wanji “utendeka kwingila kuba’mba abuke kyokyo kilonda.” Aku muntu wikozhatu, tumaselo mu mubiji tutendeka kushinka pa kilonda pa kuba’mba mashi aleke kufuma, kabiji tulengela kilonda kuuma, ne kutendeka kubwezhapo kikoba.

LANGULUKAI PA KINO: Inge Mulenga wetu walengele mubiji wetu kuba’mba ebukenga mwine, nanchi kechi twakonsha kuketekela’mba uketukosesha ne kupwisha bulanda bwetu bonse nenyi? Nyimbi wa masalamo waambile’mba: “[Lesa] ubuka balajika michima; ne kukasa pa bilonda byabo.” (Salamo 147:3) Bino umvwe muji na bulanda pa bintu bimumwekela, mwakonsha kushiinwa byepi amba Yehoba ukapwisha bulanda bwenu pa kino kimye ne kulutwe?

Lesa walaya’mba: “Kange uchine ne, mambo amiwa nji ne obewa. Kange wakamwe ne, mambo amiwa yami Lesa wobe. Amiwa nkakukosesha ne kukukwasha.” (Isaya 41:10) Muntu inge wayuka’mba Yehoba wamuta muchima, ukasuluka mu milanguluko ne kwikala na bulume bwa kuchinchika bya malwa. Mutumwa Paulo watelele kuno kukasuluka mu milanguluko amba ke “mutende wa Lesa wakila milanguluko ya bantu.” Paulo wanungilepo amba: “Bintu byonse nji na ngovu ya kwibyuba na mambo a yewa umpa bulume.”—Filipai 4:4-7, 9, 13.

Binembelo bitukwasha kwikala na lwitabilo mu bintu Yehoba byo alaya kubila bantu. Kinembelo kimo ke Lumwekesho 21:4, 5 (kyo bamwesha pa jipa jalondelapo), kitubuula bintu Lesa byo akoba ne ene mambo o twaketekela’mba ukebyuba:

• “Ukashimuna mipolo yonse” ku meso a bantu. Yehoba ukafumyapo buyanji ne bijikila byonse, nangwatu bimweke kukepa byepi mu meso a bantu.

• Mfumu wa Bulume Bonse, ‘awa waikala pa jitanda’ ja lukumo mwiulu, ukengijisha bulume bwanji kupwisha buyanji ne kwitukwasha mu byonse byo tukajilwa.

• Yehoba witubuula kuba’mba byonse byo alaya “bya kishinka kabiji bya kine.” Twashiinwa bino mambo aye ye Lesa wa kine kabiji ufikizha bintu byonse byo alaya.

“‘Kabiji ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.’ Kabiji awa waikele pa jitanda waambile’mba: ‘Tala! Mbena kulenga bintu byonse kwikala ke bipya.’ Kabiji waamba’mba: ‘Nemba, mambo bino byambo bya kishinka kabiji bya kine.’”—Lumwekesho 21:4, 5.

Bintu byonse byalenga Lesa ne byaamba Baibolo bitufunjisha bintu byavula pe Shetu wa mwiulu. Kumona bintu byalenga Lesa kwitulengela kukeba kumuyuka ne kwikala balunda nanji, kabiji Baibolo waamba’mba: “Fwenyai kwipi ne Lesa, ne aye ukafwenya kwipi ne anweba.” (Yakoba 4:8) Pa Byubilo 17:27 paamba’mba: “[Lesa] kechi uji kwalepa ne atweba bonse ne.”

Inge kemufunde pe Lesa, mukashiinwa’mba kine “wimuta muchima.” (1 Petelo 5:7) Ñanyi bintu byawama byo mukamwenamo inge mwaketekela mwi Yehoba?

Akimonai byamwekejile ba Toru bekala ku Japan. Nangwa kya kuba’mba bebakomeshe ku bainabo bena Kilishitu, bino batwelele mu jibumba ja tupondo jitelwa’mba yakuza, jaya bingi nkuwa mu Japan. Bashimikizha’mba: “Nalangulukanga’mba Lesa kechi wantemwa ne, kabiji namonanga nobe lufu lwa balongo bami, kikatakata bo natemenwe bingi lwajinga lukabisho kufuma kwi Lesa.” Ba Toru baamba’mba kwikala mu jino jibumba ne ndangulukilo yabo yatama bibalengejile “kushinta muchima ne kubula lusa.” Kabiji ba Toru baambile ne kuba’mba: “Nakebanga bingi kwipayapo muntu waya nkuwa pa kuba’mba nkayukanyikwe, bino apa ne amiwa nkafwe.”

Pano bino, byo batendekele kufunda Baibolo pamo na bakazhi babo ba Hannah, ba Toru bapimpwile byubilo byabo. Ba Hannah baamba’mba: “Namwene bamwatawami byo bapimpwile byubilo byabo nobe bisela.”  Lelo jino, ba Toru bamba na kushiinwa’mba: “Lesa kine ko aji kabiji wituta bingi muchima. Kechi ukeba muntu nangwa umo kufwa ne, kabiji winengezhezha jimo kulekelako mambo bonse balapila. Uteleka ku byonse byo twakonsha kumubuula, ne bintu byonse byakonsha kubula kumvwa bantu inge twibalumbulwila. Katatakatu, Yehoba ukafumyapo makatazho onse, buyanji, ne misongo. Ne lelo jino, witukwasha mu mashinda a kubula kuketekela. Witutemwa kabiji witukwasha inge tuji na matakazho.”—Salamo 136:23.

Byonka byo twamona ku byamwekejile ba Toru, kuyuka’mba Lesa katatakatu akafumyepo buyanji ne kushimuna mipolo ya bantu bonse kwitulengela kuketekela mu byo alaya kwitubila kulutwe ne kwitukwasha kwikala bwikalo bwawama lelo jino. Kine, nangwa kya kuba mu ntanda muji bingi buyanji, kuyuka’mba Lesa wimuta muchima kwakonsha kwimutekenesha bingi.