Muntu uji na lusa ulangulukilako bakwabo babena kupita mu makatazho, ne kumvwatu nobe ye ubena kupita mu oo makatazho. Dokotala wafunda bingila bongo bwa bantu, aye Dr. Rick Hanson waambile’mba: “Bantu bonse tusemwa na kyubilo kya lusa.”

LANGULUKAI PA KINO: Mambo ka atweba bantu o betulengejile na kino kyubilo kya lusa kyabulapo banyama? Baibolo walumbulula’mba Lesa walengele bantu mu kipasha kyanji. (Ntendekelo 1:26) Twalengelwe mu kipasha kya Lesa, ko kuba’mba twakonsha kwikala na byubilo byo ajipo nabyo. Onkao mambo, inge bantu baumvwa lusa ne kukwasha bakwabo, bamwesha lusa ne kifyele byubilo bijipo na Mulenga wetu aye Yehoba Lesa.—Byambo bya Maana 14:31.

Lesa witubila bingi lusa kabiji umvwa bulanda inge tubena kuyanda. Baibolo waamba byaumvwine Lesa byo amwene bena Isalela na kuyanda mu buzha mu Ijipita, kubikapotu ne myaka 40 yo baendele mu kiselebwa. Waamba’mba: “Kimye kyonse kyo bapichilenga mu makatazho, kyamukolelenga bingi ku muchima.” (Isaya 63:9) Kino kimwesha’mba Lesa kechi wapelejiletu pa kumona buyanji bwabo ne, bino kyamukolele bingi ku muchima. Waambile’mba: “Nayukishatu bulongo makatazho o babena kupitamo.” (Kulupuka 3:7) Lesa waamba’mba: “Yense ukwata pe anweba ukwata pa kantu ka pa jiso jami.” (Zekaliya 2:8) Umvwa bingi bulanda inge witumona na kuyanda.

Kabiji inge muchima ubena kwituzhachisha ne kwitulengela kumvwa nobe Lesa kechi wakonsha kwitubila lusa ne, Baibolo witutundaika’mba “Lesa wakila michima yetu kabiji wayuka bintu byonse.” (1 Yoano 3:19, 20) Lesa wituyuka kukila ne byo twiyuka atweba bene. Wayuka bintu byonse byo tupitamo, milanguluko yetu, ne byo tumvwa ku muchima. Witubila bingi lusa.

Byaamba Baibolo

• “Kabiji byo muketa, Yehoba ukakumbula; mukakeba bukwasho, ne aye ukemwambila’mba, ‘Amiwa bano!’”—ISAYA 58:9.

• “‘Mambo amiwa nayuka bintu byo mbena kulanguluka kwimubila, mbena kulanguluka kwimuletela mutende kechi bya malwa ne, kwimulengela kwikala na luketekelo ne bwikalo bwawama bwa kulutwe,’ byo byaamba Yehoba. ‘Anweba mukangita ne kwiya kwi amiwa ne kulomba kwi amiwa, kabiji amiwa nkemumvwa.’”—YELEMIYA 29:11, 12.

• “Longai mipolo yami mu fukuta wa kiseba. Nanchi kechi yanembwa mu buku wenu nenyi?”—SALAMO 56:8.

Nanchi kuyuka’mba Lesa witubila lusa kwitukwasha kuchinchika bya malwa nyi? Akimonai byashimikizha ba Maria.

Ba Maria bashimikizha’mba: “Najinga bingi na bulanda kimye mwanami wamulume kyo afwile saka ajitu na myaka 18. Wafwile na kikola kya kansa kyo akolelwe pa myaka ibiji. Namuzhingijile bingi Yehoba mambo kechi wabukile mwanami ne.

“Byo papichile myaka itanu na umo, nyenga umo mu kipwilo wajinga bingi na lusa watelekele na muchima yense byo na mubujile byo nalangulukilenga’mba Yehoba kechi wantemwa ne. Wantelekele pa kimye kyabaya bingi kwa kubula kunchibikizha, kepo antangijile kinembelo kimo kyamfikile bingi pa muchima kya 1 Yoano 3:19, 20, kyaamba’mba: ‘Lesa wakila michima yetu kabiji wayuka bintu byonse.’ Wandumbulwijile’mba Yehoba wayuka bulanda bonse bo tumvwa.

“Nangwa byonkabyo, kyankatezhe bingi kushinda bukaji bwajinga mu muchima wami. Kepo natangile pa Salamo 94:19 paamba’mba: ‘Bijikila byamvujiile, anweba mwantekeneshe ne kunsangajika.’ Naumvwinetu nobe yami banembejile bino byepelo. Pa kupitamo kimye, natendekele kumvwa bulongo inge nabuula Yehoba bulanda bo nji nabo, mambo nayukile’mba aye uteleka ne kuba lusa.”

Kitutekenesha bingi kuyuka’mba Lesa wayuka bintu byo tupitamo kabiji witubila lusa. Pano mambo ka buyanji o bwavujila bibye? Nanchi kilumbulula’mba Lesa ubena kwitukabisha pa bundengamambo bwetu nyi? Ñanchi Lesa ukobapo bimo kuba’mba akapwishe buyanji nyi? Ano mepuzho akumbulwa mu mitwe yalondelapo.