Mwana aku usemwatu, kyanema bingi kumupana kwi inanji pa kuba’mba amulele ne kumwamusha. Mambo ka? Mambo inge bainanji baikala batanshi kulela mwana, kikwasha mwana kwibayuka bukiji ne kwibatemwa, kabiji kimulengela kukoma bulongo. *

Ñanyi kintu kilengela mwanamukazhi kutemwa mwananji wasemwa katataka? Shayuka aye Jeannette Crenshaw wanembele mu magazini utelwa’mba The Journal of Perinatal Education, amba inge mwanamukazhi wapaapa, tumaselo twa mema tupana bulume ku mubiji tuvula bingi kabiji tulengela mwanamukazhi kukeba bingi kulelezha mwananji, kumwamusha, ne kumvwa bulongo pa kumutajisha.” Tumaselo tukwabo tulenga mubiji, “tukwasha inanji kuyuka bya kwisamba na mwananji” ne kumuta muchima. Mambo ka kino kishinka o kyanemena?

Mambo Mulenga wetu aye Yehoba * Lesa ye wabikile butemwe pakachi ka mwana ne inanji. Mfumu Davida wasanchijile Lesa mambo ye ‘wamulupwile munda’ mwa inanji ne kumuzhikijila mu maboko a bainanji. Davida walombele kwi Lesa amba: “Bampaine kwi anweba kuba’mba mundamenga kufumatu pa kusemwa kwami; yenu Lesa wami kufumatu munda mwa bamama.”—Salamo 22:9, 10.

LANGULUKAI PA KINO: Umvwe Lesa walengele mwanamukazhi mu jino jishinda ja kukumya pa kuba’mba atenga mwananji muchima ne kumulama bulongo, nanchi kechi kimwesha’mba ne atweba bonse wituta muchima byo tuji “baana ba Lesa” nenyi?—Byubilo 17:29.

Yesu Kilishitu, yenka wayukisha Mulenga wetu kukila byo twamuyuka atweba bonse, waambile’mba: “Nanchi tubwalula tubiji kechi tupotwa na kajali kamo ka muwayawaya nenyi? Pakuba kafwako nangwa kamo kaponena panshi kwa kubula Shenu kuyuka ne. Nangwatu nsuki ya ku mitwe yenu beibala yonse. Onkao mambo, kuchina ne; mambo mwanema kukila bisamba bya bwalula.”—Mateo 10:29-31.

Bantu bavula kechi batako maana ku bañonyi ne, nangwatu kumona inge kañonyi ‘kamo kaponena panshi.’ Bino Shetu wa mwiulu witumona tonsetu. Pano bino, bañonyi nangwa bavulepotu byepi, kechi banema kukila muntu ne. Kino kitufunjisha kuba’mba: Kechi twafwainwa “kuchina” nangwa kwakamwa’mba Lesa kechi witumona ne. Wituta bingi muchima.

Byaamba Binembelo

• “Meso a Yehoba atala konse konse, ne kumona babi ne bawama.”—BYAMBO BYA MAANA 15:3.

• “Meso a Yehoba aji pa baoloka, ne matwi anji omvwa kujila kwabo kwa kukeba bukwasho.”—SALAMO 34:15.

• “Nkasekela bingi mu butemwe bwenu bubula kwaluka, mambo mwamona kumanama kwami; mwayuka bya malwa byami bikatampe.”—SALAMO 31:7.

Nanchi kuyuka’mba Lesa wituta muchima kabiji umona byonse bitumwekela kwakonsha kwitukwasha nyi? Ee kwakonsha. Akimonai byaambile ba Hannah, * ba ku England.

“Bimye byavula bingi, namonanga nobe Yehoba kechi wantemwa ne kabiji kechi ukumbula milombelo yami ne. Nalangulukanga’mba kampe ke na mambo a kuba’mba lwitabilo lwami lwakepa. Naumvwangatu nobe Lesa ubena kunkambula nangwa wandengulula, kabiji kechi wanta muchima ne.”

Bino lelo jino, ba Hannah kechi bazhinauka’mba Lesa wibatemwa ne kwibata muchima ne. Bapimpwile byepi ndangulukilo yabo? Bashimikizha’mba: “Papichile myaka yavula. Mvuluka jashi ja Baibolo jimo jo natelekeleko kala, jaambilenga pa bukuzhi bwa kwa Yesu. Jino jashi jamfikile bingi pa muchima, ne kunkwasha kushiinwa’mba Yehoba wantemwa. Kimye kyonse Lesa kyo akumbula milombelo yami, ntendeka kujila, mambo nemwena kuba’mba Yehoba kine wantemwa Kabiji kutanga Baibolo ne kuya na kupwila. kwamfunjisha bintu byavula pe Yehoba, byubilo byanji ne byo etuta muchima. Luno nemwena Yehoba byo etukwasha ne byo etutemwa ne byo akebesha bingi kwitulama.”

Byambo bya ba Hannah bitutekenesha bingi. Bino mwakonsha kushiinwa byepi amba Lesa wayuka byo mupitamo kabiji wimuta muchima? Mutwe walondelapo ukakumbula buno bwipuzho.