Langulukai pa lukwatankano lwikala pa mapasa. Bekala balunda ba kine kine. Ba Nancy Segal batangijila kipamo kya Twin Studies Center, basemenwe mapasa baambile’mba: “Mapasa bomvwañana bingi mambo yense wayuka mukwabo byo aji.” Mwanamukazhi umo kapya walumbulwile kilengela’mba bomvwañanenga bingi na mbuyu. Waambile’mba: “Amiwa ne mbuyu twiyuka bingi bulongo.”

Ñanyi kintu kilengela mapasa kukwatankana? Bashayuka bamba’mba nangwa kya kuba bansemi banungako ku luno lumvwañano, kubikapotu ne nkomeno, bino kine kintu kilengela ke na mambo a kuba’mba mapasa basemwa na maselo epasha bingi.

LANGULUKAI PA KINO: Pa kuba’mba Mulenga wa bintu byonse alenge mapasa mu jino jishinda, kimweshatu kuba’mba wituyuka bingi bulongo. O ene mambo nyimbi wa masalamo o aambijile’mba: “Byo najinga munda mwa bamama, mwangabenye nobe na kipembe. Bikupa byami kechi byafyamine kwi anweba byo nalengelwe mwafyamika [ne]. . . . Meso enu ammwene saka nji munda; binungwa bya mubiji wami byonse byanembelwe mu buku wenu.” (Salamo 139:13, 15, 16) Lesa ye yenkatu wayuka bulongo byo twalengwa, kabiji wayuka ne bintu byo twapitamo mu bwikalo bitulengela kuba bintu bimo. Onkao mambo, twashiinwa kuba’mba Lesa wituyuka bingi bulongo.

Davida walombele’mba: “Anweba Yehoba, mwantalatala kabiji mwangyuka. Muyuka byo ngikala ne byo ñimana. Ne milanguluko yami mwiiyukilatu kwalepa. Saka nkyangye kwamba kyambo na kanwa kami, anweba Yehoba mwikiyukila jimo.” (Salamo 139:1, 2, 4) Kunungapo, Yehoba wayuka bintu byonse byo tulanguluka mu muchima, “kabiji umona milanguluko yonse.” (1 Byambo bya Moba 28:9; 1 Samwela 16:6, 7) Bino byonse bitufunjishapo ka pe Lesa?

Nangwa inge twakankalwa kubuula Mulenga wetu bintu byonse mu lulombelo, aye umona byonse byo tubena kuba kabiji uyuka ne kyalengela’mba tube byobyo bintu. Wayuka ne bintu byawama byo tukebesha kuba, bino tukankalwa mambo twi bambulwa kulumbuluka. Lesa wayuka bintu byawama byo tulanguluka ne byo tukeba kuba mambo witulengele na kyubilo kya butemwe.—1 Yoano 4:7-10.

Byaamba Binembelo

• “Meso a Yehoba aji pa baoloka, ne matwi anji omvwa milombelo yabo ya misashijilo.”—1 PETELO 3:12.

• Lesa walaya’mba: “Nkakupa milangwe ne kukufunjisha jishinda jo wafwainwa kuyamo. Nkakubuula bya kuba saka nkutala.”—SALAMO 32:8.

Kuyuka’mba Lesa wayuka byonse byo tupitamo ne byo tumvwa kwitulengela kuchinchika makatazho a mu bwikalo. Akimonai byamwekejile ba Anna, ba ku Nigeria. Bashimikizha’mba: “Na mambo a kuvula kwa makatazho o napichilengamo, natendekele kulanguluka’mba kyawamatu ne kufwa. Bamwatawami bafwile, kabiji nalaminenga mwanami wa mukazhi wajinga mu kipatela wakolelwe kikola kilengela mema kuvula mu bongo. Pa kyonkakya kimye, badokotala bantaine na kikola kya kansa wa ku mabele, kabiji bantwajile na kuntumbula bimye bibiji, ne kumpa michi iji bingi na bulume. Kyankatezhe bingi kuyuka bya kulama mwanami wajinga mu kipatela, ne amiwa mwine saka nji mu kipatela.”

Ki ka kyakwashishe ba Anna kuchinchika? Baambile’mba: “Nalangulukanga bingi pa binembelo nabiji Filipai 4:6 ne 7, kyaamba’mba ‘mutende wa Lesa wakila milanguluko ya bantu ukalama michima ne milanguluko yenu.’ Kimye kyonse inge navuluka kino kinembelo, kyakoseshanga bingi bulunda bwami ne Yehoba, kabiji kyantekeneshanga bingi kuyuka’mba wangyuka kukila ne byo neyuka ami mwine. Kabiji balongo ne banyenga mu kipwilo kyetu kya bwina Kilishitu bantekeneshanga bingi.

“Nangwa kya kuba kechi nakosatu bulongo ne, bino luno amiwa ne mwanami tubena kumvwako bulongo. Yehoba ubena kwitukwasha, onkao mambo, twafunda kushinda milanguluko yabula kufwainwa inge tubena kupita mu makatazho. Pa Yakoba 5:11 paamba’mba: ‘Tutela aba bachinchika amba bo ba lusekelo. Anweba mwaumvwine kuchinchika kwa kwa Yoba kabiji mwayuka ne kintu Yehoba kyo amubijile, mwayuka’mba Yehoba ye wa kifyele ne lusa.’” Yehoba wayukile byonse byapichilengamo Yoba, kabiji twaketekela kuba’mba wayuka bintu byonse byo tupitamo lelo jino.