LUZIA WALEMANA KULU KWA KU KIPIKO. Byo ajinga mwanyike, wakolelwe kikola kya kalepu, kyonauna mishipe ya mu mubiji. Luzia byo afikizhe myaka 16, mwanamukazhi umo wamutwezhezhe nkito wamwambijile’mba: “Lesa ye wakukambula na kino kikola kya kalepu, mambo kechi wakookelanga bainobe ne.” Ne lelo jino, Luzia uvuluka bulanda bukatampe bo aumvwine pa kumwambila bino byambo.

DAMARIS BYO BAMUBUUJILE’MBA UJI NA KIKOLA KYA KANSA WA KU BONGO, bashanji bamwipwizhe’mba: “Ñanyi mambo o walenga pa kuba’mba wikale na kino kikola? Wafwainwa walenga mambo akatampe. O ene mambo Lesa o akukambwila.” Byambo byaambile bashanji byamukozhezhe bingi ku muchima.

Kufumatu ne kala, bantu balanguluka’mba kukolwa ke lukabisho kufuma kwi Lesa. Buku wa kuba’mba Manners and Customs of Bible Lands waamba’mba mu moba ajingako Kilishitu pa ntanda, bantu baitabijile’mba “kilengela muntu kukolwa ke na mambo a kuba’mba aye nangwa umo mu kisemi kyanji walenga mambo, kabiji Lesa ubena kwibakabisha pa oo mambo.” Buku wa Medieval Medicine and the Plague waamba’mba nangwatu byo papichile myaka yavula bingi, “bantu baitabijile’mba Lesa ye uleta bya malwa pa bantu pa kuba’mba ebakambule pa bundengamambo bwabo.” Pano twakonsha kushikisha’mba: Kimye kyo kwajinga mwalo mukatampe waipayile bantu bavula mu Europe mu myaka ya mu ma 1300, nanchi Lesa ye wibakambwilenga pa bundengamambo bwabo nyi? Inyi uno mwalo waishile na mambo a tulongolo tuleta bikola, byonka byataine bashayuka ba bya michi? Bantu bamo bepuzha’mba, Nanchi Lesa wingijisha bikola pa kukambula bantu na mambo a bundengamambo bwabo nyi? *

LANGULUKAI PA KINO: Inge Lesa wingijisha bikola ne buyanji pa kukambula bantu, pano mambo ka Mwananji aye Yesu o abukilanga bantu bakolelwe? Nanchi kuba bino kechi kwakonsha kumwesha’mba ubena kulengulula bunchibamambo bwa Lesa bwaoloka nenyi? (Mateo 4:23, 24) Yesu kechi wakonsheshe kulengulula byafuukwile Lesa ne. Waambile’mba: “Nguba bintu bimutokesha ku muchima,” ne kuba’mba “Mbena kuba byonka byankambizhe Batata.”—Yoano 8:29; 14:31.

Baibolo waamba’mba Yehoba Lesa kechi ‘uba byatama’ ne. (Mpitulukilo ya mu Mizhilo 32:4) Lesa kechi wakonsha kulengela mapuso, nabiji ndeke kupona panshi ne bantu bavula bafwa na mambotu a kuba’mba ukeba kukambula muntu umotu pa boba baji mu ndeke ne. Na mambo a bololoke bwa Lesa, Abalahama kalume wanji wa kishinka waambile’mba Lesa ‘kechi ukonauna baoloka pamo na babi’ ne. Washiinwe’mba Lesa ‘kechi wakonsha kuba bino’ ne. (Ntendekelo 18:23, 25) Kabiji Baibolo waamba’mba “Lesa kechi uba bubi” nangwa kuba “byatama” ne.—Yoba 34:10-12.

Lesa kechi ye ubena kuleta buyanji pa kuba’mba etukambule pa mambo o twalenga ne. Yesu wafunjishe kino kishinka kimye aye ne baana banji ba bwanga kyo bamwene mwanamulume wasemekelwetu mpofu. “Baana banji ba bwanga bamwipwizhe’mba: ‘Labi, ñanyi walengele mambo, uno muntu nyi, inyi bansemi banji pa kuba’mba asemwetu mpofu?’ Yesu wakumbwile’mba: ‘Uno muntu nangwa bansemi banji kechi bo balengele mambo ne, bino kino kyamwekele pa kuba’mba mingilo ya Lesa imwekele mwi aye.’”—Yoano 9:1-3.

Na mambo a byalangulukanga bantu mu yoya myaka, baana ba bwanga bafwainwa bakuminye bingi Yesu byo  ebabujile’mba kafwako mambo alengele uno mwanamulume nangwa bansemi banji pa kuba’mba asemwe mpofu ne. Kununga pa kubuka uno mwanamulume, Yesu wafunjishe ne kuba’mba buyanji kechi lukabisho lufuma kwi Lesa ne. (Yoano 9:6, 7) Aba babena kukolwa lelo jino kibatekenesha bingi kuyuka’mba Lesa kechi ye walengela buyanji bwabo ne.

Byaamba Binembelo

• “Kafwako muntu nangwa umo wakonsha kweseka Lesa na bintu byatama ne, kabiji naye kechi weseka muntu nangwa umo ne.” (YAKOBA 1:13) Kwambatu kine, bantu bapita mu “bintu byatama” pa myaka yavula bingi, nabiji bikola, misongo ne lufu. Pano bino katatakatu bino bintu byonse bikapwe.

• Yesu Kilishitu “wabukile bonse bajinga na bikola.” (Mateo 8:16) Byo abukilenga bonse bajinga na bikola, Yesu Mwana Lesa wamwesheshe bufumu bwa Lesa byo bukobila bantu bonse.

• “[Lesa] ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.”—LUMWEKESHO 21:3-5.

Pano mambo ka bantu o bayanjila bingi ne kumanama? Buno ke bwipuzho bwaipuzha bantu pa myaka yavula bingi. Umvwe Lesa kechi ye uleta buyanji ne, pano ñanyi ulengela bantu kuyanda? Mutwe walondelapo wakumbula ano mepuzho.