Umvwe Lesa kechi ye uleta buyanji ne, ñanyi ye twafwainwa kupamo mambo pa bipowe bya nzala, buyanji, makondo, bikola, ne bya malwa bipulumukatu? Baibolo waambapo pa bintu bisatu byalengela’mba bantu bayandenga:

1. Kwitemwa, Lwiso, ne Lupato. “Bantu . . balama bantu bakwabo na kwibayanjisha.” (Musapwishi 8:9) Javula, bantu bayanda na mambo a kwibayanjisha ku bantu baji na lwiso kabiji bakanama.

2. Bimye ne Bintu bya Kubula Kuketekela. Bantu bayanda mambo ‘bimye ne bintu bya kubula kuketekela, bimwekela bantu bonse.’ (Musapwishi 9:11) Ko kuba’mba bimye bimo, bantu bakonsha kutaanwa pa mpunzha pa kimye kibena kumweka bya mapuso, nangwa bakonsha kulubankanya ne kuleta mapuso.

3. Mubi Ubena Kulama Ntanda. Baibolo wasolola patoka mwine ulengela’mba bantu bayandenga. Waamba’mba: “Pano pa ntanda ponse paji mu bulume bwa kwa aye mubi.” (1 Yoano 5:19) Uno “mubi” ke Satana Diabola, kabiji ke malaika watama uji bingi na bulume. Kala wajinga malaika wa Lesa, bino “kechi watwajijile kwikala mu bukine ne.” (Yoano 8:44) Bamalaika bakwabo batama bakebelenga bya kusakasaka byatama, basatukijile Lesa ne kutendeka kwingijila pamo ne Satana, onkao mambo baikele ke bandemona. (Ntendekelo 6:1-5) Kufumatu kyokya kimye, Satana ne bandemona banji baingijisha bulume bwabo ne bujimbijimbi kulama ino ntanda, kikatakata mu ano moba a kupelako. Luno, Diabola uji bingi na bukaji, kabiji “ubena kujimbaika bantu ba pano pa ntanda ponse” ne kuleta “malwa” pano pa ntanda. (Lumwekesho 12:9, 12) Kine Satana ke kalama wakanama. Umvwa bingi bulongo kumona bantu na kuyanda. Satana ye walengela’mba bantu bayandenga, kechi Lesa ne.

LANGULUKAI PA KINO: Muntu mubi, kabiji wabula lusa ne kifyele ye yenkatu wakonsha kumanyika bantu. Pano bino, Baibolo waamba’mba: “Lesa butemwe.” (1 Yoano 4:8) Na mambo a buno butemwe, “Lesa wa kine kechi uba bubi nangwa pachechetu ne, Wa Bulume Bonse kechi uba bintu byatama ne!”—Yoba 34:10.

Pano bino, mwakonsha kwiipuzha’mba, ‘Ñanyi kimye Lesa Wa Bulume Bonse kyo akafumyapo Satana?’ Byonka byo twamona, Lesa washikwa bubi, kabiji umvwa bulanda pa kumona byo tuyanda. Kunungapo, Baibolo waamba’mba: “Saka mutaya bijikila byenu pe aye, mambo wimuta muchima.” (1 Petelo 5:7) Lesa witutemwa kabiji uji bingi na bulume bwa kupwisha buyanji ne nshiji, byonka byo tusakumona mu mutwe walondelapo. *