FWANYIKIZHAI’MBA mubena kutamba filimu pa TV ubena kumwesha mwapita bwikalo bwa nyimbi waya nkuwa ye mwatemwa bingi. Patanshi bamwesha uno nyimbi byo akijinga mwanyike, byo afunjilenga kwimba ne byo ebikangako kuwamishako busendwe bwanji. Babwela bamwesha byo aimbanga nyimbo mu mapunzha apusana pusana ne byo ayanga mu byalo na kwimba nyimbo. Kepo bamwesha ne byo akotele ne kufwa.

Abino byo twaamba peulupo byo byamwekejile nyimbi umo. Nangwatu inge wajinga shayuka wa bya sayansi, muntu unyema kapela, nangwa muntutu mukwabo waya nkuwa, naye kino inge kyo kyamumwekejile. Nanchi mwakilangulukapo pa bintu byo akonsheshe kuba inge kya kuba kechi wafwile bukiji nenyi?

Kishinka ke kya kuba’mba lufu lwitunyeñamina. (Musapwishi 9:5) Kechi twakonsha kuchinuzhuka bukote ne lufu ne. Kunungapo, kimo kimye twakonsha kutaanwa mu mapuso nangwa kukolwa ne kufwa mu kakimye kachechetu. Byonka byaamba Baibolo, bumi bwetu bujitu nobe kamfwa “umweka pa kakimye kacheche kabiji wazhimañana.”—Yakoba 4:14.

Na mambo a kuba’mba bantu bafwa kwa kubula kuketekela, bamo bamba’mba, “twayai tujenga ne kutoma mambo kesha tukafwa.” (1 Kolinda 15:32) Ino ndangulukilo imweshatu kuba’mba bano bantu bayuka’mba juba jimo bakafwa, kabiji kechi bajipo na luketekelo lwa kwikala na bumi jibiji ne. Pa kimye kimo mu bwikalo bwetu, kikatakata inge twapita mu bya malwa, twakonsha kwiipuzha’mba: “Nanchi buno bo bwikalo bonka bujikotu nyi?” Kwepi ko twakosha kutaana mukumbu?

Bantu bavula luno baketekela bingi mu byamba ba shayuka ba sayansi. Bashayuka ba sayansi ne badokotala bataana michi ibena kukwasha bantu kwikalako myaka yavula. Kabiji bashayuka bamo babena kweseka kutaana mashinda akonsha kukwasha bantu kwikala myaka yavula bingi. Nangwa inge kya kuba bakeatana ano mashinda, bwipuzho bwanema ke bwa kuba’mba: Mambo ka o tukotela ne kufwa? Nanchi kukekalapo kimye kyo tukabulanga kufwa nyi? Mitwe yalondelapo isakukumbula ano mepuzho, ne bwipuzho bwa kuba’mba: Nanchi buno bo bwikalo bonka bujikotu nyi?