Lesa walayile ngauzhi Abalahama kuba’mba umo wa mu kisemi kyanji ukalengela “bisaka byonse bya bantu biji pano pa ntanda” kutambula mapesho. (Ntendekelo 22:18) Ñanyi wa mu kisemi kya kwa Abalahama ukalengela bantu bonse kutambula mapesho?

Myaka nobe 2000 yapitapo, Lesa wapeele Yesu wa mu kisemi kya kwa Abalahama bulume bwa kuba byakukumya. Bino byakukumya bimwesha kuba’mba Lesa ukengijisha Yesu kufikizha byo alayile Abalahama.—Ngalatiya 3:14.

Byakukumya byaubilenga Yesu byakwashishe bantu kuyuka’mba Lesa yeye asala kukwasha bantu kutambula mapesho, kabiji bimwesha Lesa byo akamwingijisha kukwasha bantu kutambula mapesho a myaka ne myaka. Pano twayai tumone byakukumya byaubilenga Yesu byo bimwesha byubilo byanji byawama.

Kifyele—Yesu wabukilenga bakolwa.

Yesu byo bamusanshijile ku muntu wajinga na mbumba kuba’mba amubuke, wamukwachile ne kumwambila’mba “Naswa! Bukwa.” Ponkapotu wabukilwe ne mbumba yapwile.—Mako 1:40-42.

Mpanyi—Yesu wajishishe bantu bavula.

Yesu kechi wakebanga bantu kwikala na nzala ne. Pa bimye byavula, wajishishe mabumba a bantu mu jishinda jakukumya na bashinkwa bacheche ne masabi achechetu. (Mateo 14:17-21; 15:32-38) Byo bajile, bonse baikuchile kabiji pashajile kajo kavula bingi.

Lusa—Yesu wasangwile bafwa.

Mwanamukazhi wafwilwa byo afwishishe mwana wa mulume yenka umotu, Yesu “wamubijile lusa” ne kusangula uno mwana.—Luka 7:12-15.