Nanchi kyakonsheka kwikala kwakubula juba nyi? Ine. Ku juba ko kufuma bulume bulengela bichi kwikala na mabuula, maluba, ne kupanga bipangwa. Kabiji buno bulume bulengela bijimwa kwikala na ntetele ne kajo nabiji nyimu, katoyo ne bikwabotu. Kyeya kifuma ku juba kilengela bichi kukoka mema mu mushiji kupichila mu mizhazhi kuya ku mabuula. Kabiji mute inge wasamina ku mabuula mema afumako ne kuya mu mwela.

Lesa witupa mvula ilengela kuba’mba twikalenga na kajo ko tuja. Witupa mvula ne kimye kipilamo kajo ne kulengela michima yetu kusangalala.

Bansemi bavula bakamwa bingi pa kajo ne bya kuvwala bya bisemi byabo. Akimonai bino Binembelo byo byakonsha kwibakwasha: “Talai bañonyi; kechi babyala nkunwa, kunowa nangwa kulonga mu matala ne, pano bino, Shenu wa mwiulu wibajiisha. Nanchi anweba kechi mwanema kwibakila nenyi?”—Mateo 6:25, 26.

“Langulukai pa maluba a mungye byo akoma. . . ; pakuba nemubuula namba, nangwatu [Mfumu] Solomone mu lukumo lwanji lonse kechi wavwajile pamo nobe maluba ne. Pano inge Lesa wiivwika byonkabye nsono ya mungye . . . , nanchi kechi wafwainwa kwimuvwika anweba . . . nenyi?”—Mateo 6:28-30.

Lesa byo etupa kajo ne bya kuvwala ko kuba’mba kechi wakonsha kukankalwa kwitukwasha kutaana bintu byo tukeba mu bwikalo ne. Inge ke tube kyaswa muchima wanji, uketukwasha kwikala na bulume bwa kujima kajo nangwa kwitukwasha kutwela nkito pa kuba’mba twikalenga na mali a kupotamo byo tukeba.—Mateo 6:32, 33.

Kwambatu kine, kulanguluka pa bintu nabiji juba, mvula, bañonyi ne maluba kwakonsha kwitulengela kufwenya kwipi ne Lesa. Mutwe walondelapo walumbulula Lesa byo esambanga na bantu ba kala.