Lombainga kwi Lesa pa Kuba’mba Emukwashe
Lesa wapeele bantu bupe bwanema bingi bwa kwisamba nanji ne kumubuula byonse byo bakajilwa mu lulombelo. Davida walombele’mba: “Anweba Mumvwa milombelo, bantu ba mitundu yonse bakeya kwi anweba.” (Salamo 65:2) Pano twakonsha kulomba byepi pa kuba’mba Lesa akumbule milombelo yetu?
TWAFWAINWA KULOMBA KUFUMA PANSHI YA MUCHIMA
Kulomba pa bunke kwitukwasha kubuula Lesa biji ku muchima wetu. (Salamo 62:8) Lesa umvwa bingi bulongo inge saka tulomba kufuma panshi ya muchima.
INGIJISHAINGA JIZHINA JA LESA PA KULOMBA
Lesa uji na mazhina a mushingi avula bingi. Nangwa byonkabyo, ujitu na jizhina jimo ja kyanji kyanji. Witubuula’mba, “Amiwa yami Yehoba. Jino jo jizhina jami.” (Isaya 42:8) Jizhina ja kuba’mba Yehoba jitanwamo 7,000 mu Binembelo Byazhila. Bangauzhi bavula baingijishanga jizhina ja Lesa pa kulomba kwi aye. Abalahama waambile’mba: “Mwane anweba Yehoba, . . . nswishai ñambe [ne anweba].” (Ntendekelo 18:30) Ne atweba twafwainwa kwingijishanga jizhina ja Yehoba pa kulomba.
LOMBAINGA MU MULAKA WENU
Inge twalomba mu mulaka uji yense, Lesa umvwa byo twalomba. Mambo anji etubuula’mba: “Lesa kechi uji na misalululo ne, bino mu bisaka byonse muntu umwakamwa ne kuba byaoloka ye witabilwa kwi aye.”—Byubilo 10:34, 35.
Nangwa byonkabyo, pa kuba’mba Lesa akumbule milombelo yetu twafwainwa kuba ne bintu bikwabo. Mutwe walondelapo waamba pa byo twafwainwa kuba pa kulomba.
Mwakonsha Kutemwa
BANYIKE BEPUZHA’MBA
Mambo ka o nafwainwa kulombela?
Nanchi kulomba kwaikalatu nobe muchi utontololako misongo nyi, inyi kuji bintu bikwabo byavwangiwamo?
