Bantu bamo bazhinauka’mba kampe Mambo a Lesa beapimpula. Pa kuba ngauzhi Isaya waambile’mba Mambo a Lesa ‘ekala myaka ne myaka.’ (Isaya 40:8) Twayuka byepi kuba’mba Mambo a Lesa kechi apimpulwa ne?

Lesa uji na bulume bwa kuzhikijila mambo anji, kechi wakonsha kuswisha muntu nangwa umo kubikamo milanguluko ingi ne. Myaka ya kala pa kukopolola Binembelo babalanga byambo pa kuba’mba bamone’mba byaesakana na Binembelo byazhila, kechi babikangamo byambo bikwabo, kufumyamo nangwa kupimpulako bimo ne. Nangwa byonkabyo, na mambo a bumbulwakulumbuluka, bantu bamo babikangamo byambo bimo, kufumyamo ne kupimpulako bimo.

Kuji mivungilo yavula bingi ya kala mo banembele Binembelo Byazhila. Inge kya kuba mu muvungilo umo bamupimpulako byambo twakonsha kumona mu muvungilo mukwabo pa kuba’mba tuyuke pa lubankana. Pa kuba’mba muyukilepo byavula, monai kibaaba kiji pa jw.org. kya kuba’mba, “Nanchi Bantu Bapimpula Byambo Biji mu Baibolo Nyi?”(“Has the Bible Been Changed or Tampered With?”)

Pa kuba’mba tumvwishe kino kishinka, twayai tumona mivungilo imo ya kala ya kuba’mba Mivungilo ya mu Kalunga Kafwa yo bataaine kwipi na Kalunga Kafwa mu 1947. Mu ino mivungilo yaikala myaka kukila pa 2000, binembelo bimo byajinga mu Binembelo Byazhila. Bashayuka baesakenye ino mivungilo ya kala na Binembelo Byazhila byo tuji nabyo lelo jino. Ñanyi bishinka byo bataaine mu kuno kukebakeba?

Bashayuka bataine kuba’mba Mambo a Lesa o tuji nao lelo jino kechi apimpulwa ne. * Bishinka byataine bashayuka pa ino mivungilo ya kala bitukwasha kuyuka’mba byambo byo tutanga mu Binembelo Byazhila kine ke mambo a Lesa. Twashiinwa kuba’mba Lesa kechi waswishishepo muntu nangwa umo konaune Mambo anji ne.

Inge tubena kutanga Mambo a Lesa kechi twafwainwa kuzhinaukanga’mba bafumyamo nangwa kupimpulako bimo ne. Pano twayai tumone byo twakonsha kuyuka bulongo Lesa kupichila mu bangauzhi.