Temwainga Bakwenu
Byo tuji baana ba kwa Adama, ko kuba’mba twi kisemi kimo. Bantu bonse pano pa ntanda bafwainwa kutemwa bakwabo. Nangwa byonkabyo, ano moba kyakatazha bingi bantu kutemwa bakwabo. Bino Lesa wa butemwe aye ukeba’mba tutemwenga bakwetu.
BINEMBELO BYAAMBAPO AMBA KA PA BUTEMWE?
“Wafwainwa kutemwa mukwenu byonka byo witemwa obe mwine.”—BENA LEVI 19:18.
“Temwainga balwanyi benu.” —MATEO 5:44.
KILUMBULULA KA KUTEMWA BAKWETU?
Lesa walumbulula butemwe byo buji pa 1 Kolinda 13:4-7:
“Butemwe butekanya ne kuba lusa.”
Langulukai pa kino: Mwakonsha kumvwa byepi kwikala na bantu batekenya, baji na lusa kabiji babula kuzhingila inge mwibatamisha?
“Butemwe kechi buba kichima ne.”
Langulukai pa kino: Mwakonsha kumvwa byepi kwikala na bantu bemulangulukila kuba bintu byo mubula kuba kabiji bemubila kichima?
Butemwe “kechi bukeba bintu bibuwamina abo bwine ne.”
Langulukai pa kino: Mwakonsha kumvwa byepi kwikala na bantu banemeka milanguluko yenu ne kubula kuminatu pa milanguluko yabo?
Butemwe “kechi buvuluka kintu kyatama ne.”
Langulukai pa kino: Lesa waswila jimo kulekelako mambo bantu balapila. Mambo a Lesa aamba’mba: “Aye kechi ukakebakebanga mambo, nangwa kuzhingila kikupu ne.” (Salamo 103:9) Tumvwa bingi bulongo inge kya kuba muntu ye twalubankenye witulekelako mambo. Ne atweba twafwainwa kulekelangako bakwetu mambo inge betulubankanya.—Salamo 86:5.
Butemwe “kechi busekela pa bintu byabula koloka ne.”
Langulukai pa kino: Nanchi twakonsha kumvwa bulongo inge bantu ke betuseke pa byatama bitumwekela nyi? Kuba twaumvwa bulongo ne. Onkao mambo, kechi tumvwa bulongo kumona bakwetu na kuyanda ne, nangwatu kya kuba kimye kimo betubilepo bintu byatama.
Pa kuba’mba Lesa etukwashe, twafwainwa kutemwa bakwetu, nangwa kya kuba banyike, bafuma ku kyalo kingi nangwa baya mu bupopweshi bungi. Jishinda jimo ja kubilamo bino ke kukwasha bakajilwa.
Mwakonsha Kutemwa
LABAINGA!
Byakonsha Kwimuletela Lusekelo—Butemwe
Kupana ne kutambwila bintu kwakonsha kulengela muntu kwikala na lusekelo.
