Tuyuka Bulongo Lesa Kupichila mu Bangauzhi
Kala Lesa watumanga bangauzhi kubuula bantu mikambizho yanji. Nanchi ino mikambizho yakonsha kwitukwasha kutambula mapesho a Lesa nyi? Ee yakonsha kwitukwasha. Twayai tufunjileko ku bangauzhi ba kishinka basatu.
ABALAHAMA
Lesa kechi uji na misalululo ne, kabiji ukeba kukwasha bantu bonse.
Lesa walayile ngauzhi Abalahama amba “bisemi byonse bya pano pa ntanda bikobilwa bibusa na mambo a obewa.”—Ntendekelo 12:3.
Ñanyi kintu kyo tufunjilako? Tufunjilako kuba’mba Lesa witutemwa bingi kabiji ukeba kukwasha bantu bonse bamukookela, banabalume, banabakazhi ne baana ba bacheche.
MOSESA
Lesa uji na lusa kabiji ukwasha boba bakeba kumuyuka.
Lesa Wabulume bonse wapeele Mosesa bulume bwa kuba bya kukumya. Kabiji Mosesa walombele’mba: “Mbuulai mashinda enu, pa kuba’mba nemuyuke ne kutwajijila kubilwa bibusa kwi anweba.” (Kulupuka 33:13) Mosesa byo alombele, Lesa wakumbwile lulombelo lwanji ne kumupa milangwe ne maana a kumukwasha kuyuka mashinda anji. Mosesa wafunjile kuba’mba Mulenga uji na “lusa ne kifyele.”—Kulupuka 34:6, 7.
Ñanyi kintu kyo tufunjilako? Twafunjilako kuba’mba inge twibikako kukeba kumuyuka Lesa uketukwasha, nangwa twi banabalume, banabakazhi nangwa baana ba bacheche. Witubuula mu Mambo anji byo twafwainwa kumupopwela ne kuba’mba ukebesha bingi kwitukwasha.
YESU
Yesu wajinga na lusa kabiji wabukile bantu bajinga na bikola byapusana pusana
Inge twafunjila kwi Yesu, byo aubanga bintu ne byo afunjishanga, tukamwenamo myaka ne myaka.
Baibolo wamba pa bintu byavula bingi byaubile Yesu ne byo afunjishenga. Lesa wapeele Yesu bulume bwa kuba bya kukumya byavula bingi nabiji, kulabisha meso a bampofu, kubuka bakamama ne bilema. Kabiji wasangwile ne bantu bafwile. Yesu byo ajinga pano pa ntanda wamwesheshe bintu byawama bikoba Lesa kulutwe. Walumbulwile byo twafwainwa kuba pa kuba’mba tukamwenamo kulutwe amba: “Pa kuba’mba bakekale na bumi bwa myaka ne myaka, bafwainwa kwimuyuka anweba Lesa yenka wa kine, ne Yesu Kilishitu ye mwatumine.”—Yoano 17:3.
Yesu waubilanga bantu kifyele, lusa kabiji wakokele muchima. Bantu bavula banabalume, banabakazhi, banyike ne bakote bonse bamukasulukijile na mambo a lwito lwanji lwa kuba’mba: ‘Fundai kwi amiwa, mambo nekimote kabiji nakooka muchima, ne anweba mukakokoloka.’ (Mateo 11:29) Bantu bamo bajingako mu moba akwa Yesu kechi banemekele banabakazhi ne. Bino Yesu wibanemekele, kwibobila lusa ne kwibapa mushingi.
Ñanyi kintu kyo tufunjilako? Tufunjilako kuba’mba Yesu watemenwe bantu, kabiji wamwesheshe byo twafwainwa kubanga na bakwetu.
YESU KECHI LESA NE
Mambo a Lesa aamba’mba “atweba tujitu na Lesa umo” kabiji amba Lesa waingijishanga Yesu Kilishitu kumwambilako. (1 Kolinda 8:6) Yesu waambile kipasu kuba’mba Lesa wamukila kabiji amba bamutumine kwi Lesa kwiya pano pa ntanda.—Yoano 11:41, 42; 14:28. *
^ jifu. 17 Pa kuba’mba muyukilepo ne bikwabo pe Yesu, monai kipungu 8 ne 9 mu buloshuwa wa kuba’mba Real Faith—Your Key to a Happy Life po aji pa www.pr418.com.
