Nanchi Kuji Wafwainwa Kwitukwasha bya Kukekala Bulongo Kulutwe Nyi?
Byonkatu byo baamba mu mitwe yafumako, bantu baeseka kuba bintu bya kuba’mba bibakwashe kukekala bulongo kulutwe. Baketekela mu bintu nabiji amba Lesa wibanengezhezha jimo kala bikekala bwikalo bwabo, kufunda, kwikala na bunonshi ne kwikala na byubilo byawama. Kulanguluka bino kujitu pamo na kuya ku mpunzha ko mwabula kuyuka saka babena kwimutangijila ku muntu wabula kuyukako. Nanchi kino kibena kulumbulula’mba kafwako wakonsha kwitukwasha kuyuka bya kukekala bulongo kulutwe nyi? Ine mwane ne!
BAIBOLO YE WAFWAINWATU KWITUKWASHA
Pa kufuukulapo bya kuba mu bwikalo twipuzha muntu wakoma kabiji uji na maana kwitubuulako bya kuba. Byo byo kiji ne kwi atweba pa kuba’mba tuyuke bikekala bwikalo bwa kulutwe. Muntu wakoma kwitukila kabiji uji bingi na maana ye wafwainwa kwitukwasha kuyuka bwikalo bwa kulutwe. Walumbulula bwikalo bwa kulutwe byo bukekala mu buku wanembelwe kala kene myaka 3,500 yapitapo. Uno buku ke Baibolo.
Pano mambo ka o twafwainwa kuketekela Baibolo? Mambo Baibolo wafuma ku muntu uji bingi na maana kukila muntu yense pano pa ntanda. Uno muntu bamulumbulu’mba “wa Kala Kene” wajingako “kufumatu kala kene kufika ne myaka ne myaka.” (Danyela 7:9; Salamo 90:2) Ye “Mulenga walengele bya mwiulu, Lesa wa kine, yenka walengele ntanda.” (Isaya 45:18) Witubuula mwine jizhina janji amba Yehoba.—Salamo 83:18.
Baibolo kechi waamba’mba bantu bamo banema kukila bantu bakwabo ne. Mambo yenka wanembele Baibolo ye walengele bantu bonse. Kabiji bintu byo aamba bikwasha bantu bonse pano pa ntanda. Bamunemba mu milaka yavula bingi kukila mabuku akwabo kabiji bantu bavula baji nanji. * Onkao maambo, bantu bavula kufuma mu mapunzha apusana pusana batanga Baibolo ne kulondela byo aamba. Abino bishinka byakwatankana bingi na byaamba Baibolo mwine amba:
“Lesa kechi uji na misalululo ne, bino mu bisaka byonse muntu umwakamwa ne kuba byaoloka ye witabilwa kwi aye.” —BYUBILO 10:34, 35.
Byonkatu biji bansemi batemwa baana babo ne kwibakwasha, ne Yehoba Lesa naye byo aji Shetu wa butemwe wingijisha Baibolo kwitubuula bya kuba. (2 Timoti 3:16) Mwafwainwa kuketekela byaamba Mambo anji. Yehoba ye witulengele kabiji ye wayuka bintu byafwainwa kwitukwasha kwikala na lusekelo.
Mwafwainwa kuba byepi pa kuba’mba mukekale bulongo kulutwe? Tangai mutwe walondelapo.
^ Pa kuba’mba muyuke bishinka byaamba pa kutuntulula ne kusampanya Baibolo, yai pa keyala wa www.pr418.com po banemba’mba BIFUNJISHA BAIBOLO > BAIBOLO NE BYA MPITO.
^ Pa kuba’mba muyukilepo bishinka bikwabo, monai kitango 9 mu buku wa The Bible—God’s Word or Man’s? wanemba Bakamonyi ba kwa Yehoba. Mwafwainwa kumutaana pa keyala wetu wa www.pr418.com. Yai po banemba’mba MABUKU > MABUKU NE MABULOSHUWA.
Mwakonsha Kutemwa
KYAMBA KYA USOPA
Bukine Bwaamba pa Bintu Bikamweka Kulutwe
Ketekelai mu byaamba Lesa pa bikekala ino ntanda ne pa bantu bakekalanga mu ntanda.
KYAMBA KYA USOPA
Nanchi Baibolo ne ano Moba Wingila Nyi?
Bantu bamo balanguluka’mba Baibolo waleka kwingila. Balanguluka bino na mambo a kuba’mba ano moba kuji mabuku avula bingi, bamba’mba mambo ka a kutangila buku wakala waikala myaka 2000?
KYAMBA KYA USOPA
Nanchi Kujipo Wayuka Biji Kulutwe Nyi?
Kuji wambila jimo bya kulutwe ye twafwainwa kuketekela.
KYAMBA KYA USOPA
Baibolo Ukemukwasha Kwikala na Luketekelo mu Bintu Biji Kulutwe
Byambo bya Lesa bitukwasha kuyuka bya kuba na bintu byo tupitamo?—pa juba pa juba mu ino ntanda. Bino Baibolo waamba pa bintu byavula bingi. Kabiji waamba ne pa bintu byo bikekala kulutwe na lwendo.
