Baibolo watwajijila kwikalako. Onkao mambo, mwakonsha kwikala nanji ne kumutanga. Kabiji inge mwaikala na Baibolo watuntululwa bulongo, mwakonsha kuketekela’mba mubena kutanga Baibolo muji byambo biine bitanshi. * Pano mambo ka Baibolo o abujila kuzhiya nangwa kya kuba kwajinga bizumba bya kubola, balwanyi ne kukeba kupimpula byambo bijimo? Kabiji ki ka kyalengela kupuluka bino bizumba?

Bantu bavula batanga Baibolo baswa byaambile mutumwa Paulo byo anembele’mba: “Binembelo byonse byanembelwe na lutangijilo lwa mupashi wa Lesa.” (2 Timoti 3:16) Baketekela’mba Baibolo watwajijila kwikalako mambo ke Mambo a Lesa kabiji Lesa wamuzhikijile kufika ne lelo jino. Faizal ye twaambapo mu kibaaba kitanshi kya bino bibaaba byalondankana wafuukwilepo kwimwena mwine bino bishinka kupichila mu kufunda Baibolo. Wakuminye bingi pa bishinka byo ataaine. Wafunjile’mba mu Baibolo kechi mujipo mafunjisho avula aji mu Kilishitendomu ne. Kabiji waumvwine bingi bulongo pa kufunda mu Baibolo ene mambo Lesa o alengejile ntanda.

Faizal waambile’mba: “Luno nashiinwa kuba’mba Baibolo ye nji nanji ke bupe bwafuma kwi Lesa. Inge Lesa wakonsha kulenga bilengwa byonse, nanchi wakonsha kukankalwa kuzhijikila buku wanji nyi? Inge ke tuzhinauke byaamba Baibolo, ko kuba’mba tubena kuzhinauka bulume bwa Lesa. Yami ñanyi wa kuzhinauka bulume bwa Lesa?”—Isaya 40:8.