Juba jimo pa Mulungu, ba Kenneth ne ba Filomena bekala mu kyalo kya Curaçao, bayile na kufwakesha balume ne bakazhi bo bafunjishanga Baibolo.

Ba Kenneth baambile’mba: “Byo twafikile, twataine bashinka ku nzubo ne motoka kechi yajingapo ne. Natumijile bakazhi babo foni.”

Uno mwanamukazhi wakumbwile foni ne kwibabuula’mba bamwatawanji baji ku nkito. Bino byo ayukile’mba ba Kenneth ne ba Filomena baji pangye, waishile ku kibelo na kushinkulako ne kwibambila’mba batwele.

Byo batwelele, bamwene kuba’mba uno mwanamukazhi waji kujilanga. Ba Kenneth saka bakyangye kutendeka kufunda balombele, bino uno mwanamukazhi watendekele kujila jikwabo. Kino kyalengejile ba Kenneth ne ba Filomena kwipuzha uno mwanamukazhi kyamulengejilenga kujila.

Uno mwanamukazhi waambile’mba wakebelenga kwiipaya, kabiji wanembejilenga ne ba mwatawanji nkalata ya kwibayukisha. Foni yatumine ba Kenneth yamulengejile kwikileka. Wibabujile’mba wajinga bingi na bijikila. Onkao mambo, besambile nanji byambo biji mu Baibolo. Bino byambo bya lutundaiko byazhikijile bumi bwanji.

Ba Kenneth baambile’mba: “Twamusanchijile bingi Yehoba pa kwingijisha malaika ne Mupashi wanji wazhila kwitutangijila kutumina uno mwanamukazhi foni wajinga na bijikila ne kumukwasha.” *

Nanchi kyaijilemo ba Kenneth ne ba Filomena kwitabila kuba’mba Lesa ye wibatangijile na malaika nangwa na Mupashi wanji wazhila nyi? Nanchi kujipo kyalengejile ba Kenneth kutuma foni nyi?

Kechi twayuka ne. Kishinka ke kya kuba’mba Lesa wingijisha bamalaika kukwasha bantu kufunda bukine. Baibolo wamba’mba Lesa waingijishe malaika kutangijila mwina Kilishitu Filipa kuya na kukwasha mwina Etiopya wakebelenga bukwasho bwa Lesa.—Byubilo 8:26-31.

Bupopweshi bwavula butundaika kupopwela bilengwa bya mupashi, bilengwa bimo bya mupashi bebimwesha nobe bingijila Lesa pa kuba’mba bikwashe bantu ne kwibazhikijila. Bantu bavula baitabila’mba bamalaika ko baji kabiji bakwasha bantu. Nangwa byonkabyo, kuji bantu bavula babula kwitabila mu bamalaika.

Nanchi kine bamalaika ko baji nyi? Inge ko baji, bafumine pi? Kabiji baji byepi? Nanchi bakonsha kwimukwasha nyi? Twayai twisambe pa ano mepuzho.