Ee, ko baji. Pano bafumine pi? Vulukai kuba’mba Lesa wapeele bamalaika luusa lwa kwifuukwila bintu. Adama ne Evwa byo bebalengele, kilengwa kimo kya mupashi kyajinga kyalumbuluka kyaingijishe kutama luusa lwa kwifuukwila bintu kabiji kino kilengwa kyo kyatatwile bunsatuki pano pa ntanda. Kyajimbaikile Adama ne Evwa ne kwibalengela kusatukila Lesa. (Ntendekelo 3:1-7; Lumwekesho 12:9) Baibolo kechi witubuula jizhina ja kino kilengwa kya mupashi ne, nangwa mwingilo waingilanga kino kilengwa mwiulu saka kikyangye kusatuka ne. Bino byo kyasatukile, Baibolo wikitelele amba Satana, kilumbulula’mba “wa milengulwila,” ne kuba’mba Diabola, kulumbulula amba “waluntepentepe.”—Mateo 4:8-11.

Kyataminekotu ke kya kuba’mba buno bunsatuki bwatwajijile. Mu moba a kwa Nowa, bamalaika bo babula kutongola kibelengelo ‘bashile mapunzha abo a kwikalamo awama’ mwiulu. Baishile pano pa ntanda byo bealwile mibiji ne kulenga mambo. Bashile mwingilo wibapeele Lesa.—Yuda 6; Ntendekelo 6:1-4; 1 Petelo 3:19, 20.

Ki ka kyamwekejile bano bamalaika batama? Lesa byo aletele muyulo pa kuba’mba afumyepo baubilenga bintu byatama, babwele jibiji mwiulu. Nangwa byonkabyo, Lesa kechi waswishishe bano bamalaika batama kubwela pa “bifulo byabo” ne. Wibabikile mu “mfishi ine ikatampe [ya ku mupashi]” yo batela’mba Tatalusa. (Yuda 6; 2 Petelo 2:4) Bano bandemona babena kwibatangijila kwi Satana Diabola, “mukulumpe wa bandemona,” kabiji “watwajijila na kwialula kwikala nobe malaika wa kyeya.”—Mateo 12:24; 2 Kolinda 11:14.

Baibolo ufunjisha kuba’mba Bufumu bwa Lesa bwa Bumesiasa, ko kuba’mba kafulumende wa mwiulu, bwatendekele kulama mu 1914. * Panyuma ya bino, Satana ne bandemona banji bebapangile mwiulu ne kwibataya pano pa ntanda. Bubi ne bulalelale byasampukila ne pa katele bibena kumwesha kuba’mba bazhingila bingi kabiji bo babena kutundaika bino byubilo byatama.—Lumwekesho 12:9-12.

Bintu byatama bibena kumweka pano pa ntanda bimwesha kuba’mba katatakatu bafumyepo bukalama bwabo bwatama. Katatakatu bano bamalaika bashiinta bakebazhiye. Inge Bufumu bwa Lesa bukalame myaka 1,000 pano pa ntanda, bamalaika batama bakebaswisha kweseka bantu pa kakimye kacheche. Panyuma ya bino, bakebonauna myaka ne myaka.—Mateo 25:41; Lumwekesho 20:1-3, 7-10.