Nasemekejilwe mu muzhi wa Saxony, uno muzhi watendekele kutelwa’mba German Democratic Republic (GDR). Twaikalanga bingi bulongo pa nzubo, kabiji bansemi bami bamfunjishe byubilo byawama. Kyalo kya GDR kyatangijilwanga na kipamo kya bumulwila ntanda. Onkao mambo, bantu bavula mu Saxony kechi banemekele bya bupopweshi ne. Ne amiwa kechi naitabijile mwi Lesa ne. Byo najinga na myaka 18, kwajinga bintu bibiji byalengejile kubula kwitabila mwi Lesa. Kitanshi, kwitabila kuba’mba Lesa ufwako. Kya bubiji, kipamo kya bumulwila ntanda.

Natemenwe bingi kipamo kya bumulwila ntanda. Mambo kino kipamo kyaambanga’mba bantu bonse bajitu pamo. Kabiji kikwabo, naitabijile’mba kafwako muntu wakonsha kujiila mukwabo makusu pa mutwe ne. Kuba bino kwalengelanga kupwisha buyanji ne kulengela bantu bonse kwikala bulongo. Napayankene bingi mu kino kipamo. Byo nafikizhe myaka ya kusemwa 14, naingilanga nkito ya kutola bipepala ne kwibilenga jikwabo. Bantu baikalanga mu taunyi wa Aue, batemenwe bingi byo naingilanga, kino kyalengejile bakulumpe ba mukafulumende kumpa kilambu. Nangwa kya kuba nakijingatu mwanyike, natendekele kuyuka bakulumpe ba bya bumulwila ntanda ba mu kyalo kyaGerman Democratic Republic. Natendekele kulanguluka’mba byo naubilenga byajingatu bulongo kabiji naketekejile’mba kulutwe na lwendo nkekalanga bingi bulongo.

Byo nalangulukilenga kechi byo byo kyajinga ne. Mu 1989, nsakwa yo batelanga’mba Berlin Wall beyonawine kabiji byalo bya ku musela wa Europe byatendekele kwingijila pamo. Bino bintu byatamijilengakotu. Kino kyandengejile kuyuka kuba’mba mu German Democratic Republic mwajinga bingi nshiji. Bantu babulanga kutundaika bipamo bya bumulwila ntanda kechi bebatele muchima ne. Mambo ka o kyaikejile bino? Atweba twajinga mu kipamo kya bumulwila ntanda twayukile’mba kafwako muntu wanema kukila mukwabo ne. Nanchi bajinga mu kipamo kya bumulwila baitabijile bya bubela nyi? Kino kyandengejile kwikala bingi na bijikila.

Nafumine mu kipamo kya bumulwila ntanda ne kutendeka kunemba nyimbo. Byo nafunjilenga bya nyimbo pa Sukulu umo, nakebelenga kuya na kufunjilapo bikwabo ne pa sukulu mukatampe. Kino kyandengejile kwikala na byubilo byatama mambo natendekele kwikala na basambe bavula bingi. Kwikala shenyenye mu nyimbo ne kwikala bwikalo bwa bwana bwa bene kechi kwandengejile kupwisha bijikila ne. Nangwatu bipikichala  byo nalenganga byamwesheshenga’mba najinga bingi na moyo. Natendekele kwishikisha’mba, nanchi bwikalo bwami bukekala byepi kulutwe? Kabiji Lesa wakebelenga’mba twikalenga byepi?

Nakuminye bingi byo nataine mikumbu ya ano mepuzho. Juba jimo mabanga pa sukulu, twisambilenga pa bintu bikamweka kulutwe na bakwetu baana ba sukulu. Mandy * wajinga Kamonyi wa kwa Yehoba, wamfunjishe bintu byanema bingi. Waambile’mba: “Andreas inge ukeba kuyuka mepuzho aamba pa bintu bikamweka kulutwe, wafwainwa kutendeka kufunda Baibolo.”

Kechi naswile byo aambilenga ne, pano bino nafuukwilepo kukeba mikumbu ya mu Baibolo. Mandy wañambijile kutanga Danyela kitango 2, kabiji byo natangile byamfikile bingi pa muchima. Buno bungauzhi bwalumbulula bufumu bwa pano pa ntanda bwapusana pusana, ko kuba’mba makafulumende akekala bingi na bulume mu ano moba. Mandy wammwesheshe bungauzhi bukwabo bwa mu Baibolo bwaamba pa bintu bikamweka kulutwe. Kyapeleleko, natendekele kutaana mikumbu ya mepuzho o najinga nao. Pano ñanyi wanembele buno bungauzhi, kabiji ñanyi wakonsha kwambila jimo bintu bikamweka kulutwe? Nanchi Lesa kine koaji nyi?

Mandy wankebejile ba Horst ne ba Angelika kuba’mba bamfunjishenga Baibolo. Bankwashishe kumvwisha byaamba Baibolo. Byo bamfunjishenga byandengejile kuyuka’mba Bakamonyi ba kwa Yehoba bo bapopweshitu bengijisha jizhina ja Lesa ja kuba’mba Yehoba. (Salamo 83:18; Mateo 6:9) Nafunjile kuba’mba Yehoba Lesa ukeba bantu kwikala myaka ne myaka mu paladisa pano pa ntanda. Pa Salamo 37:9 paamba’mba: “Aba baketekela mwi Yehoba bakaswana ntanda.” Natemenwe bingi bino byambo, kabiji uno mulaye umwesha kuba’mba bantu bonse balondela mikambizho ya Lesa bakamwenamo mu uno mulaye.

Nangwa byonkabyo, kyankatezhe bingi pa kuba’mba ndeke byo naubanga ne kutendeka kulondela byaamba Baibolo. Na mambo a kuba’mba nayile bingi nkuwa mu bya nyimbo, kyandengejile kwitota bingi. Onkao mambo, natendekele kwibikako kwikala na kyubilo kya kwipelula. Kwambatu kine, kechi kyampelejile kuleka byubilo byatama byo naubanga ne. Namusanchila bingi Yehoba byo amwesha lusa ne kutekenya bantu bebikako kulondela byaamba Baibolo.

Pa myaka 18, najinga mu kipamo kya bumulwila ntanda kabiji kechi naitabijile mwi Lesa ne. Bino kufumatu kimye kyo natendekele kufunda Baibolo, bwikalo bwami bwapimpwilwe. Byo nafunjile byandengejile kuleka kwakamwa bintu bya kulutwe kabiji byandengejile kuyuka bintu byo nafwainwe kubanga mu bwikalo. Nabatizhiwe mu 1993 ne kwikala Kamonyi wa kwa Yehoba. Mu 2000, nasongwele ba Tabitha, mukwetu mwina Kilishitu watemwa bingi Lesa. Twingila kimye kyabaya bingi kukwasha bantu kuyuka bukine bwa mu Baibolo. Bantu bavula bo tutaana mu mwingilo bajitu byonka byo najinga kala, baji mu kipamo kya bumulwila ntanda kabiji kechi baitabila’mba Lesa koaji ne. Kindetela bingi lusekelo inge nakwasha bantu kuyuka Yehoba.

Byo natendekele kupwila na Bakamonyi ba kwa Yehoba, bansemi bami kechi batemenwe ne. Bino batendekele kumona byubilo byawama byo nji nabyo na mambo a kupwanañana na Bakamonyi. Luno nji bingi na lusekelo, mambo nabo batendeka kutanga Baibolo kabiji baya na kupwila na Bakamonyi ba kwa Yehoba.

Amiwa ne ba Tabitha tuji bingi na lusekelo mu masongola etu, mambo a kuba’mba twibikako bingi kulondela byaamba Baibolo pa baji mu masongola. Kwikala ba kishinka mu masongola kwakosesha bingi masongola etu.—Bahebelu 13:4.

Luno kechi nji na bijikila pa bintu bikamweka ku lutwe ne. Nji mu kisemi kya ntanda yonse kya bapopweshi ba Lesa. Mu kino kisemi muji mutende wa kine kabiji twakwatankana bingi. Kabiji twanemeka bantu bonsetu. Abino byo byo naitabijile kabiji byo byo nakebeshanga kuba mu bwikalo bwami.