“Bya bupe byonse byawama ne byalumbuluka bifuma mwiulu, saka biya panshi kufuma kwi Shetu wa byeya.” (Yakoba 1:17) Kino kinembelo kibena kwamba pa bumpanyi bwa Shetu wa mwiulu aye Yehoba Lesa. Lesa wapa bantu bya bupe byavula bingi, bino kuji bupe bumo bwanema kukila bonse. Ñanyi bupe? Byambo byayukanyikwa bingi bya kwa Yesu byanembwa mu Yoano 3:16 byaamba’mba: “Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.”

Bupe bwa Lesa bwa mwananji yenkawa umotu bo bupe bukatampe bo apa bantu, mambo bwakonsha kwitupokolola ku bundengamambo, ku bukote ne ku lufu. (Salamo 51:5; Yoano 8:34) Atweba bene kechi twakonsha kwifumya ku bundengamambo ne. Lesa witupokolwele ku bundengamambo na mambo a butemwe bwanji bukatampe. Byo apaine Mwananji yenkawa umotu Yesu Kilishitu kwikala bukuzhi, Yehoba Lesa wapeele bantu luketekelo lwa kwikala myaka ne myaka. Pano bukuzhi bo buka? Mambo ka o bwanemena? Kabiji twakonsha kumwenamo byepi?

Bukuzhi buji nobe mali o bapana pa kuba’mba bafumye muntu mu kaleya nangwa mu buzha. Baibolo wamba’mba bansemi betu batanshi ba Adama ne Evwa bajinga balumbuluka byo bebalengele, kino kibena kulumbulula amba bafwainwe kwikala myaka ne myaka mu paladisa pano pa ntanda kumvwangakotu ne baana bo basemene. (Ntendekelo 1:26-28) Kyatamakotu ke kya kuba’mba baelele bino byonse mambo basatukijile Lesa kabiji kuba bino kwibalengejile kwikala bandengamambo. Ñanyi bintu byafuminemo? Baibolo wakumbula’mba: “Bundengamambo byo bwatwelele pano pa ntanda mu muntu umo, ne lufu nalo lwaishijile mu bundengamambo, byonkabyo lufu lwakumbene ku bantu bonse mambo bonse balengele mambo.” (Loma 5:12) Adama byo asatukile walengejile baana banji kwikala bambulwakulumbuluka kabiji mwafumine lufu.

Bukuzhi bwakebewenga bwafwainwe kwesakana na kintu kyaelekele. Adama byo asatukijile Lesa kya nshiji, walengele mambo kabiji waelele bumi bwalumbuluka. Baibolo wamwesha kuba’mba kuba bino kwalengejile baana ba kwa Adama kwikala bazha ku bundengamambo ne lufu. Onkao mambo, kwakebewenga muntu mukwabo wajinga na bumi bwalumbuluka ko kuba’mba bumi bwa kwa Yesu kwikala kitapisho kya kupokolola bantu ku buzha. (Loma 5:19; Efisesa 1:7) Lesa byo apaine bukuzhi kyalengela bantu kwikala na kintu kyaelele Adama ne Evwa ko kuba’mba bumi bwa myaka ne myaka mu paladisa pano pa ntanda.—Lumwekesho 21:3-5.

Na mambo a bintu byauba bukuzhi, twakonsha kwamba’mba bo bupe bukatampe kukila bupe buji bonse mambo buketulengela kwikala na bumi bwa myaka ne myaka. Pa kuba’mba tusantenga pa buno “bupe bwalumbuluka,” twafwainwa kulangulukanga pa bintu bitulengela kupana bya bupe byawama byonka byo twaji kwisamba mu kibaaba kyafumako.

Kuba bikeba muchima wetu. Atweba bantu tukebesha kwikala myaka ne myaka mambo Lesa byo byo etulengele. (Musapwishi 3:11) Mu bulume bwetu, kechi twakonsha kwikala myaka ne myaka ne. Bino bukuzhi  bwakonsha kwitulengela kwikala myaka ne myaka. Baibolo waamba’mba: “Mambo mfweto ya bundengamambo lo lufu, pa kuba bupe bo apana Lesa ke bumi bwa myaka ne myaka kupichila mwi Kilishitu Yesu Nkambo yetu.”—Loma 6:23.

Kwitupa byo tukeba. Bantu kechi bakonsha kwitupa bukuzhi ne. Baibolo waamba’mba: “Bukuzhi bwa bumi bwabo, bwa mutengo mukatampe bingi kya kuba kechi bakonsha ne kwibupota ne.” (Salamo 49:8) Onkao mambo, twakebelenga Lesa kwitukwasha pa kuba’mba etupokolole ku bundengamambo ne lufu. Bino “kupichila mu bukuzhi bwapaine Kilishitu Yesu,” Lesa witunengezhejile kintu kyafwainwa kyo twakebelenga.—Loma 3:23, 24.

Kimye kyafwainwa. Baibolo witubuula’mba: “Mambo byo twakijinga bandengamambo, Kilishitu witufwijile.” (Loma 5:8) Na mambo a kuba’mba Lesa wapaine bukuzhi saka ‘tuji bandengamambo,’ kino kimwesha Lesa byo etutemwa nangwa kya kuba twi bandenga mambo. Nangwa kya kuba tupita mu makatazho na mambo a bundengamambo, bino tuji na luketekelo mu bintu byawama biji kulutwe.

Kintu kyalengejile kupana bupe. Baibolo witubuula kyalengejile Lesa kupana mwananji kwikala bukuzhi: “Monka muno mo mwamwekela butemwe bwa Lesa kwi atweba, kuba’mba Lesa watumine Mwananji yenkawa umotu pano pa ntanda pa kuba’mba tukekale na bumi kupichila mwi aye. Buno butemwe kechi bulumbulula’mba atweba yetu twamutemenwe Lesa ne, bino aye ye witutemenwe.”—1 Yoano 4:9, 10.

Mwakonsha kumwesha byepi amba mwanemeka bupe bukatampe bwa Lesa? Byambo byaambile Yesu pa Yoano 3:16 bimwesha’mba bantu “bamwitabila” bo bonkatu bakapuluka. Baibolo walumbulula’mba “lwitabilo ke kintu kimulengela kushiinwa’mba akya kyo mwaketekela kikamweka.” (Bahebelu 11:1) Pa kuba’mba twitabile mu milaye ya Lesa, twafwainwa kuyuka maana alumbuluka. Pa kuba’mba mube bino, twimutundaika kufunda pe Yehoba Lesa, Mpanyi wa “bupe bwalumbuluka” pa kuba’mba mukekale na bumi bwa myaka ne myaka. Kabiji kitapisho kya bukuzhi bwa kwa Yesu kyo kikalengela bino byonse kubiwa.

Mwakonsha kufunjilapo bishinka bikwabo bya mu Baibolo pa Keyala wetu wa www.pr418.com/kqn. Bakamonyi ba kwa Yehoba bakonsha kutemwa kwimukwasha. Twashiinwa kuba’mba inge ke mufunde pa buno bukuzhi bukatampe bwa Lesa mukamwenamo bingi kabiji mukamba amba: “Sanchila Lesa kupichila mwi Yesu Kilishitu Nkambo yetu!”—Loma 7:25.