Kafwako muntu ujipo na kipikichala kya kwa Yesu ne. Kechi wakopelwepo kipikichala ne. Nangwa byonkabyo, mu mabuku avula a bantu mutanwa bipikichala bya kulenga bimwesha Yesu.

Kishinka ke kya kuba’mba, bantu balenga bipikichala kechi bayuka Yesu byo amwekanga ne. Bipikichala bya kwa Yesu bebingijisha bingi mu bisho byaya nkuwa ne mu bya bupopweshi. Bantu babujilenga bantu kwibalengela bipikichala bya kwa Yesu kwesakana na byo bakebelenga’mba amwekenga. Nangwa byonkabyo, kubuula bantu kwibalengela bipikichala byamwekanga Yesu kulengela bantu kumona Yesu mu jishinda japusanako ne byo afunjishanga.

Bantu bamo balenganga bipikichala, bamweshanga Yesu nobe muntu wabula bulume uji na nsuki yalepa ne myevu nangwa kumumwesha nobe muntu uji bingi na bulanda. Bipikichala bikwabo bimwesha Yesu nobe kilengwa kya mupashi kyo bazhokoloka ku kyeya nangwa kilengwa kyapusanako na bilengwa bikwabo. Nanchi kya kine bino bipikichala byo balenga bimwesha Yesu byo amwekanga nyi? Twakonsha kuyuka byepi byamwekanga Yesu? Jishinda jimo ke kulanguluka pa byaamba Baibolo byakonsha kwitukwasha kuyuka byamwekanga Yesu kabiji yakonsha kwitukwasha byo twafwainwa kumonanga Yesu.

Abino byo byambo byaambile Yesu mu lulombelo kimye kyo abatizhiwenga. (Bahebelu 10:5; Mateo 3:13-17) Uno mubiji waambilepo Yesu wamwekanga byepi? Saka papita ne myaka 30, malaika Ngabaliela wabujile Maliya amba: “Ukemita ne kusema mwana wa mulume, . . . Mwana Lesa.” (Luka 1:31, 35) Onkao mambo, Yesu wajinga walumbuluka byonkatu byajinga Adama patanshi byo bamulengele. (Luka 3:38; 1 Kolinda 15:45) Kyamweka Yesu wamwekanga bingi bulongo kabiji kyamweka wapashishe bingi inanji aye Maliya wajinga Muyudea.

Yesu walamanga myevu mambo kyajinga kisho kya Bayudea kupusanako na bena Loma. Kulama myevu kwalengelanga muntu kumunemeka. Kechi balamanga myevu kwakubula kwiitenda ne. Banazili nabiji Samisonyi kechi bebaswishishe kutenda nsuki ne.—Kubala 6:5; Mitonyi 13:5.

Pa myaka 30, Yesu waingilanga mwingilo wa bukalipentala kwakubula bingijisho bijiko ano moba. (Mako 6:3) Kino kibena kulumbulula’mba waingilanga bingi na ngovu. Byo atendekele mwingilo wanji, “wapangilemo aba bajinga na mikooko ne bañombe mu nzubo ya Lesa, ne kwichila mali a muwayawaya a boba beapimpwilenga ne kupinuna matebulu abo.” (Yoano 2:14-17) Muntu wachinchika kabiji uji na bulume ye wafwainwa kubatu bino. Yesu waingijishe mubiji wamunengezhejile Lesa kwingila mwingilo ye amupeele. Waambile’mba: “Nafwainwa kusapwila mambo awama a Bufumu bwa Lesa ne ku mizhi ikwabo, mambo kino kyo kyo bantumijile.” (Luka 4:43) Bulume bo bwakwashishe Yesu kusapwila monse mu Palesitina.

Yesu wakasulukile bingi, kabiji kino kyalengelanga bantu “bakooka ne kunemenwa” kwiya koaji. (Mateo 11:28-30) Kukasuluka ne kifyele ko kwalengelanga kwipana kukwasha bantu bo afunjishanga.  Nangwatu baana ba bacheche nabo bakebanga kwiya kwi Yesu. Baibolo waamba’mba: “Wabukachile baana ba bacheche mu maboko.”—Mako 10:13-16.

Nangwa kya kuba Yesu wamanamine bingi saka akyangye kufwa, bino kechi wamwesheshepo bulanda ne. Kimye kimo wanengezhe binyu pa kijiilo kya masongola mu Kena byo aalwile mema ke binyu. (Yoano 2:1-11) Pa kijiilo kikwabo wafunjishe lufunjisho lwanema bingi.—Mateo 9:9-13; Yoano 12:1-8.

Mwingilo wa kusapwila ye mwingilo wanema waingijile Yesu. Uno mwingilo ukalengela bantu bomvwina ano mambo kwikala na bumi bwa myaka ne myaka. (Yoano 11:25, 26; 17:3) Baana banji ba bwanga 70 baletele sawakya wa byo baingijile mu mwingilo, kino kyamulengejile ‘kusekela bingi’ kabiji waambile amba: “Sekelai mambo mazhina enu anembwa mwiulu.”—Luka 10:20, 21.

Bantangi ba bupopweshi bajingako mu moba a kwa Yesu bakebelenga bantu kwibanemeka bingi. (Kubala 15:38-40; Mateo 23:5-7) Kupusanako na byajinga bano bantangi, Yesu wabuujile batumwa banji kubula kubila “bunkambo bantu.” (Luka 22:25, 26) O ene mambo Yesu o ebajimwijileko amba: “Jimukai na banembeshi batemwa kupitañana saka bavwala minkukumba ne kukeba kwibemuna mu bisankanyi.”—Mako 12:38.

Bino Yesu kechi wakebelenga bantu kumupa munema wakijishamo ne. (Yoano 7:10, 11) Nangwatu byo ajinga na batumwa banji bakishinka 11, kechi wamweshanga’mba wanemene kwibakila ne. Jibumba ja bantu byo jakebelenga kukwata Yesu, Yudasa “wibabuujile kiyukilo” byo amufyompele.—Mako 14:44, 45.

Nangwa kya kuba kechi twayuka bishinka byonse ne, bino Yesu kechi wamwekanga byonka byo bamumwesha pa bipikichala ne. Kabiji kintu kyanema kechi byo amwekanga ne, bino kyanema ke byo tulanguluka pe aye.

Juba jo aambile bino byambo, jo juba Yesu jo afwile ne kumuzhika. (Yoano 14:19) Wapaine bumi bwanji “kwikala bukuzhi bwa kukuula bavula.” (Mateo 20:28) Pa juba ja busatu, Lesa wamusangwile “mu mupashi” kabiji ‘wamusolwele’ ku baana banji ba bwanga bamo. (1 Petelo 3:18; Byubilo 10:40) Yesu byo amwekele ku baana banji ba bwanga, nanchi mwekelo yanji yapimpwilwe nyi? Mwekelo yanji yapimpwilwe mambo baana banji ba bwanga kechi bamuyukile bukiji ne. Maliya Mangadala wamwene Yesu nobe wa mwingilo wa mu bujimi, kabiji baana banji ba bwanga babiji bayilenga mu jishinda jaya ku Emasa nabo kechi bamuyukile ne.—Luka 24:13-18; Yoano 20:1, 14, 15.

Nga ano moba Yesu umweka byepi? Byo papichile myaka 60 panyuma ya lufu lwa kwa Yesu, Yoano bamumwesheshe kimwesho mo amwene Yesu. Mu kino kimwesho, Yoano kechi wamwene Yesu saka abena kufwa pa kichi ne. Bino, wamumwene nobe “Mfumu wa bamfumu kabiji Nkambo wa bankambo” ukekala Mfumu mu Bufumu bwa Lesa ukashinda balwanyi ba Lesa ko kuba’mba bandemona ne bantu batama ne kuleta mapesho akabula kupwa ku bantu.—Lumwekesho 19:16; 21:3, 4.