PEPALA wa Informant * wa December 1937 (mu London) wakambizhe’mba: “Anweba Basapwishi ba Bufumu mu Britain Ingilainga na Mukoyo!!” Kamutwe kacheche kaambile’mba: “Pa Myaka Jikumi Yapitapo Mwingilo Kechi Wayilako Palutwe Ne.” Sawakya wa mwingilo wajinga pa jipa jitanshi wamwesheshe’mba kufuma mu mwaka wa 1928 kufika mu 1937, mwingilo waimenetu pamo.

Ki ka kyalengejile basapwishi mu Britain kuleka kwingila na mukoyo? Kyamweka basapwishi mu bipwilo balondejilengatu jishinda jimo jasapwilangamo basapwishi bajingako mu myaka ya kunyuma. Kunungapo, ofweshi wa musampi wafuukwilepo’mba nyaunda yabo yafwainwe kwikalatu na bapainiya 200, kabiji bano bapainiya bebatumanga kuya na kwingijila mu mapunzha a mwalepa mwabujile bipwilo. Onkao mambo, musampi wabuujile basapwishi bakebelenga kwikala bapainiya amba bafwainwa kuya ku byalo bikwabo bya mu Europe mambo bapainiya mu Britain bavujishe. Kyawaminekotu ke kya kuba’mba bapainiya bamo mu Britain bavilukijile ku byalo bikwabo nabiji kyalo kya France, nangwa kya kuba kechi bayukile milaka ya mu bino byalo ne.

Kino kibaaba kyajinga mu pepala wa Informant wa mu 1937 kyatundaikile basapwishi bonse pamo kwingila maola 1 milyonyi mu mwaka wa 1938. Pa kuba’mba bafikizhe kino kikonkwanyi, musapwishi yense wafwainwe kwingila maola 15 pa ñondo pa ñondo, ne bapainiya kwingila maola 110 pa ñondo pa ñondo. Kimo kibakwashishe ke kunengezha mabumba a basapwishi ba kwingila maola atanu pa moba amo o basajile. Kikwabo ke kubwelako ku bantu bakebelanga kufunda, kikatakata mukachi ka mulungu mabanga.

Luno lunengezho lwa kusapwila lwatundaikile bavula. Ba Hilda Padgett * bashimikizhe’mba: “Uno mukambizho wafumine ku ofweshi mukatampe ye ye twapembejilenga pa myaka yavula, kabiji mwafumine byawama byavula bingi.” Nyenga E. F. Wallis naye waambile’mba: “Mulanguluko wa kwingila maola atanu mu juba jimo wawamine bingi. Kafwako kikwabo kyakonsha kwituletela lusekelo lukatampe kukila kwingijila Nkambo yetu juba jonse ne. . . . Twabwelanga saka twakooka, bino saka tuji na lusekelo.” Nsongwalume wajinga musapwishi, aye Stephen Miller wivwangilemo mambo wamwene’mba kyanemene kwingila uno mwingilo bukiji bukiji. Wakebelenga kwingilako ponka po akonsheshe kwingila. Wavulukile mabumba a basapwishi byo azhikishanga juba jonse mu mwingilo na makinga abo, ne byo batelekanga ku maselechi a majashi mabanga mu kimye kya kisalo. Baingilanga na mukoyo mu busapwishi bwa kwingijisha bipabi panembwa mambo awama, ne kupana magazini mu mukwakwa.

Pepala wa Informant wakambizhe ne kuba’mba: “Tubena kukeba bapainiya bavula bafika ku 1,000.” Mukambizho mukwabo waambile’mba bapainiya kechi  bafwainwa kuya na kwingijila kwabula bipwilo ne, bino bafwainwa kwingijila pamo na bipwilo ne kwibikosesha. Ba Joyce Ellis baambile’mba: “Balongo bavula bamwesheshe kuba’mba bakebelenga kwikala bapainiya. Nangwa kya kuba najingatu na myaka 13, nakebeshe bingi kwikala painiya.” Baikele bapainiya mu July 1940, saka baji na myaka 15. Ba Peter basongwele ba Joyce, nabo byo baumvwine uno mukambizho batendekele kulanguluka pa mwingilo wa bupainiya. Mu June 1940, saka baji na myaka 17, bakyofwele nkinga kuya ku Scarborough palepele makilomita 105 kuya na kutendeka bupainiya.

Ba Cyril Johnson ne benakwabo ba Kitty nabo bepaine kwingila uno mwingilo wa bupainiya. Bafuukwilepo kupotesha nzubo ne bipe byabo pa kuba’mba bataane mali a kwibakwasha kwingila mwingilo wa bupainiya. Ba Cyril balekele nkito, kabiji mu yenkawa ñondo batendekele bupainiya. Bavuluka’mba: “Twayukile’mba tukekalatu bulongo. Twipaine na muchima yense.”

Bapainiya byo bavujijileko, bakulumpe mu bipwilo balangulukilepo mashinda a kwibakwashishamo. Mulongo Jim Carr wajinga kalume wa kijiiji (luno utelwa’mba kalama wa mwanzo) mu 1938, walondejile uno mulanguluko wa kunengezha mazubo mwa kwikala bapainiya mu mizhi ikatampe. Bapainiya bebatundaikile kwingijila pamo mu mabumba ne kwikala pamo pa kuba’mba bakepesheko mali a kwibakwashishamo. Mu muzhi wa Sheffield, basonkelanga nzubo ikatampe kabiji batongwele mukulumpe mu kipwilo wa kutala pa ino nzubo. Kipwilo kyapaine mali ne bipe bya mu nzubo. Ba Jim bavuluka’mba: “Bonse batundaikile uno mwingilo.” Bapainiya 10 baikelenga mu ino nzubo batwajijile kukosesha bulunda bwabo na Lesa. “Babalaulanga kinembelo kya juba lukelo pa kuja kajo ka kwiaula,” kabiji “bano bapainiya bayanga na kusapwila moba onse mu manyaunda apusana pusana mu uno muzhi.”

Basapwishi ne bapainiya bonse bafikizhe kikonkwanyi kyabo kya kusapwila maola 1 milyonyi mu mwaka wa 1938. Masawakya amwesha’mba mbaji yonse ya kusapwila yayijileko palutwe. Byo papichile myaka itanu, basapwishi mu Britain bavujijileko bingi. Lutundaiko lwa kwingilako pakatampe mu mwingilo wa Bufumu lwakwashishe bantu ba Yehoba kwinengezha ku makatazho ajingako mu kimye kya nkondo.

Lelo jino, nkondo ya Lesa ya Amagedonyi byo yafwenya pepi, bapainiya mu Britain batendeka kuvujilako jibiji. Pa myaka 10 yapitapo, bapainiya batwajijila kuvujilako, kabiji mu October 2015, bafikile 13,224. Bano bapainiya bayuka’mba mwingilo wa kimye kyonse ye yenkatu wakonsha kwibaletela lusekelo.